Mä 1 Korintʉ 6:1-8, japë apostëlë Pääblë ojts tnigajxy ti mbäät nduˈunëm ko jam ti nyajtsiptakëm mëdë nmëguˈukˈäjtëm diˈib mëët nˈëxpëjkëm. Tim jawyiin mä bersikulo 1 ojts tˈanëëmë ja Dios mëduumbëty diˈib Korintë: “¿Wiˈix ko mnejxy ëˈëmbë mä yëˈë fes diˈibë kyaj Dios mëduumbëty?”. Ta net ojts jyënaˈany ko pën jam pën kyanayaˈoyëty mëdë myëguˈuk, mbäät dyaˈoyë jyotmay mä naymyujkën ets kyaj jyamëty mä yajkutujkpë. Min jawyiin nˈokˈijxëm tiko duˈunë apostëlë Pääblë ojts dyakyë tyäˈädë käjxwijën, ets ta net nˈijxëm diˈibë jotmay mbäät yˈoyë mä yajkutujkpë.

Ko jam ti negosyë nyajtsiptakëm mëdë nmëguˈukˈäjtëm mbäät nyaˈoˈoyëm extëmë Jyobaa ttseky, kyaj dyuˈunëty extëm nwinmäˈäyëm (Proverbios 14:12). Jesus nanduˈun ojts jyënaˈany ets tsojk nyaˈoˈoyëmë jotmay kyaj naˈijxëm ets niˈigyë myëjwindäˈägët (Matewʉ 5:23-26). Jotmaymyëët njënäˈänëm ko näägë Dios mëduumbë nyaynyibëdëˈëgëdë etsë net nyaymyëjäˈtëdë mä yajkutujkpë. Päätyë Pääblë jyënany mä bersikulo 7: “Mdëgooynyëdëp ak miits ko kyëxeˈeky ja tsip mä miitsëty”. ¿Tiko duˈun jyënany? Yëˈko mbäädë jäˈäy tkäjxpäätyë Dios etsë kyäjpn. Pääty parë kyaj duˈun jyatët, nˈokkuytyuˈunëmë extëm yˈakjënäˈäny: “Nik waanë oy ko xymyëdanëdët ko mdunëdët axëëk o mdimaatsëdët”.

Pääblë nan ojts tnigajxy ko Dios të tpëjtaˈagyë mëjjäˈäytyëjk mä naymyujkën diˈib mbäät xypyudëjkëm parë dyaˈoyëdë jotmay ko ti nyajtsiptakëm. Tyäˈädë mëjjäˈäytyëjk myëdäjttëbë wijyˈäjtën mët ko yˈëxpëjktëbë Biiblyë. Mä bersikulo 3-5 jyënaˈany ko nyijäˈäp wiˈix “mbäät dyajxeemyë tsip akë mä Dios mëduumbëty” ko tijaty dyajtsiptäˈäktët “mä tyäˈädë jikyˈäjtën”. Jesus nan ojts tnigajxy tëgëk peky ti mbäät yajtuny extëm ko jäˈäy nyaynyiwäämbatëdët o nyaymyaatsëdët. Tim jawyiin myaytyäˈägët mët ja myëguˈuk anaytyuˈuk. Pën kyaj tjaygyukë, ta tmënëjxët “tuˈuk o majtsk  diˈibë myëdowëp” ja jotmay ets pën nan kyaj yˈoyë, taanëmë net tˈanëëmët ja mëjjäˈäytyëjk diˈib tuundëp mä naymyujkën (Matewʉ 18:15-17).

Perë mëjjäˈäytyëjk kyaj mbäät tyundë extëmë nikäjxtutpë o extëmë jäˈäy diˈib jyajtypyë jotmay dyaˈoyët mä negosyë, kyaj mbäät duˈun nyayajnaxëdë. Kyaj mbäät tˈanëëmëdë ja myëguˈuk tijaty tyundëp parë ja jyotmay dyaˈoyëdët. Diˈibën patëdëp ttundët yëˈë tpudëkëdët ja myëguˈuktëjk wiˈix mbäät tkuytyunyë Biiblyë kyäjxwijën ets tpudëkëdët parë oy nyayajwëˈëmëdët. Per pën mëjwiin ja jotmay ta tˈanëëmëdët ja sirkuitë o dyajtëwdët betel. Minë net nˈokˈijxëm diˈibë jotmay mbäät näˈäty yˈoyë mä yajkutujkpë.

Ko tuˈugë jäˈäy nyejxy ëˈëmbë mä yajkutujkpë kyaj yëˈë tˈandijy ko xëmë wyinmäˈäny ttimtukpëtsëmäˈäny. Mbäät nyejxy parë yˈoyët ja jyotmay extëmë ley jyënaˈany. Extëm nˈokpëjtakëm, parë yaˈˈajääywyäˈxtëdë jäˈäy diˈib të pyëktë, yaˈixët pën ja uˈunk ënäˈk myëwëˈëmëp, tkajxyˈattët nëˈën ja meeny sentääbë yajmoˈoyët, dyajnekytyëkët tijaty, tˈamdowëdë myëjuˈuny pën jam tuˈugë empresë kyaj nyekyˈoyë, o parë yajkujuyët pën myëdäjtypyë syeguurë. Mbäät nanduˈun tuˈugë Dios mëduumbë nyejxy mä yajkutujkpë parë nyaynyitsiptunëdët pën të yajniˈëënë. *

Ko tuˈugë Dios mëduumbë tmëdatëdë duˈumbë jotmay, mbäät tninejxyë yajkutujkpë. Pën kyaj tninejxy jeˈeyë parë tsyiptunäˈäny kyaj naty tkutëjˈyë tadë käjxwijën diˈibë apostëlë Pääblë yäjk. * Nˈokmëdäjtëm winmäˈänyoty parë kyaj nyaˈˈaxëˈkëmë Diosë xyëë ets kyaj nyajtëjkëmë tsip mä naymyujkën. Pes pënaty pyanejxypyë Jesus yëˈë yajtukˈijxwëˈëmp ko tmëdattë tsojkën, tuˈugë tsojkën diˈib “kyaj tˈëxtäˈäy diˈibë yëˈëyë tyukˈoyˈatëp këˈëm” (1 Korintʉ 13:4, 5; Fwank 13:34, 35).