1-3. 1) ¿Wiˈix mayë jäˈäy tˈixtë tyuunk? 2) ¿Wiˈixë Biiblyë xyˈanmäˈäyëm ets nˈijxëmë tuunk ayoˈon, ets tijaty yajtëˈëwën yaˈˈatsoojëmbitäämp mä tyäˈädë kapitulo?

TYAM mayë jäˈäy kyaj tˈoyjawëdë tyuunk yˈayoˈon, duˈun tˈixtë extëmë tëytyuˈunën. Jabom jabom kyaj ttukxondäˈäktë ti tyuundëp, ets kyaj nyëjxtë tuumbë xondaˈakyˈää xondaˈaky jot. Per kyaj tiko mbäät duˈun nˈijxëmë tuunk ayoˈon, min nˈoknijäˈäjëm ti mbäät xypyudëjkëm parë ndukxondakëmë tuunk ets jotkujk nayjäˈäjëm.

² Biiblyë xyˈanmäˈäyëm ets kyaj tëgatsy nˈijxëmë tuunk, pes jyënaˈany ko yëˈë Diosë kyunuˈxën ko nmëdäjtëmë tuunk ets nˈijxëm wiˈix wyimbëtsemy. Duˈun ojts tkujayë Salomonk: “Dios yëˈë duˈun tyukmayˈajtypyë naxwinyëdë jäˈäy ets kyay yˈuugët ets tˈixët wiˈix yˈoybyëtsemy ko mëk tyuny yˈayoy” (Eclesiastés 3:13). Jyobaa mëk xytsyojkëm ets ninäˈä xykyatukmëtsojkëmë ayoˈon, yëˈë tsyejpy ets jotkujk nayjäˈäjëm mä ja tuunk ayoˈon ets ndukxondakëm ko nˈijxëm wiˈix wyimbëtsemy. Parë nˈijtëm mä tsyojkën, jëjpˈam ets nˈijxëmë tuunk extëm yëˈë tˈixy, ets nguytyuˈunëmë yˈanaˈamën mä nduˈun nˈayoˈojëm (Eclesiastés 2:24; 5:18).

³ Mä tyäˈädë kapitulo yaˈˈatsoojëmbitäˈäny mäjtaxkë yajtëˈëwën: ¿Wiˈix mbäädë Dios mëduumbë “tˈixy wiˈix yˈoybyëtsemy ko mëk tyuny yˈayoy”? ¿Diˈibë tuunk kyaj tˈaxäjët? ¿Wiˈix mbäät dyajkijxyë tyuunk yˈayoˈon mët ja Diosë tyuunk? ¿Diˈibë tuunk mbäät niˈigyë tjotmoˈoy? Per min jawyiin nˈokˈijxëm wiˈix tyundë Jyobaa mëdë Jesukristë.

4, 5. ¿Wiˈixë Biiblyë xytyuknijäˈäjëm ko Jyobaa mëk tuumbë jäˈäy?

⁴ Nipën kyatuumbë jäˈäyëty extëmë Jyobaa. Mä Biiblyë jyënaˈany: “Ko tsyoˈonëˈky tsyoˈondaky, yëˈë Dios yëˈë ojts dyäjkojy ëgäˈäny yëˈë tsäjp ets yëˈë nääxwiinyëdë”. Ets ko dyajkojtääy tyäˈädë naxwinyëdë ta jyënany ko jantsy oy tukëˈëyë “mëdiˈibë naty të dyajkojˈyën” (Génesis 1:1, 31, MNM). Ko Jyobaa duˈun jyënany yëˈë yaˈijxë ko jotkujkë naty nyayjawëty mä tijaty të ttuny. Mbäät nwinmäˈäyëm ko tadë “Diosë jotkujkpë” mëjwiin kajaa xyondaky ko tˈijxy wiˈixë tyuunk wyimbëtsemy (1 Timoteo 1:11, NM).

⁵ Jyobaa Dios jantsy tuumbë jäˈäy yëˈë, ninäˈä kyawäˈkpeˈxy. Pääty kanäk mëgoˈpx jëmëjtë naty të nyäjxnë mä të dyajkojˈyë tsäjp etsë nax ko Kristë jyënany: “Yëˈë ndeetyëts tuumpnëm tyambäät” (Fwank 5:17). Per ¿tidën tyuumpy tyambäät? Yëˈë kyuentˈäjtypyë naxwinyëdë jäˈäy ets tnëˈëmoˈoy ttuˈumoˈoy. Ets yä naxwiiny të dyajpëtsemyë “jemy jyaˈay” diˈib të twinˈixy parë nëjx yˈaneˈemy tsäjpotm mëdë Jesus (2 Corintios 5:17, ØXN). Jyobaa tuunˈadëtsp axtë tyambäät parë dyaˈˈadëwäˈäny ti të ttuknibëjtäägë, extëm nijäˈäjëm, dyajjëmbitäˈänyë naxwinyëdë jantsy tsuj etsë jäˈäy jyukyˈattët xëmëkyëjxm (Romanʉs 6:23). Ets mbäät nwinmäˈäyëm ko Jyobaa jantsy jotkujk nyayjawëty ko tˈixy wiˈix wyimbëtsemyë tyuunk, pes miyonkˈamë jäˈäy kujk tmëdoyë jembyë ayuk ets tmëjwoy parë myëwingonëdët ets dyajtëgäjtsë jyukyˈäjtën parë yˈittët mä yëˈë tsyojkën (Fwank 6:44).

6, 7. ¿Ti ijxpajtënë Jesus yajkypy mä wiˈix tjotmooy ja tyuunk?

⁶ Nëˈën kujkë xëë tiempë nyaxy, Jesus të dyakyë oybyë ijxpajtën mä wiˈix tyuumbë jäˈäyëty. Mä naty kyaminyëm yä naxwiiny, ojts yˈity “oybyë putuˈunëbë” tpudëjkë Jyobaa parë ojts dyajkojy “tëgekyë diˈibë jam tsäjpotm  es yä naxwiiny” (Proverbios 8:22-31; Kolosʉ 1:15-17). Ets ko jyukyˈajty yä naxwiiny duˈunyëm tyuuny. Ko myutskˈäjty ojts tjatyë tsajts jëˈtk, päätyë jäˈäy ojts yˈixyˈatëdë extëm “ja tsajtspë” (Markʉs 6:3). Nˈokjamyajtsëm ko mä tadë tiempë kyaj naty jyamëtyë kepytyoˈkpë, nan kyaj jyamëtyë tuumbajnë jëën mëëtpë. Ja tsajtspë ak këˈam tukëˈëyë dyaˈoˈoyëtyaˈay, dyajtunyë jyot myëjää etsë jyot wyinmäˈäny parë tijaty dyaˈoyë. ¿Nbawinmäˈäyëmë Jesus tsyoony ets nyejxy kepy ëxtaabyë, tpoˈteˈeky, twimbuxy twimbooty etsë net tmëjäˈty mä dyajtunäˈäny? Ets ko net dyaˈoˈoyëtyaˈay, ¿nbawinmäˈäyëm tmënejxy mä jäˈäyë tyëjk parë nëjx tpëjtakë tyëjktukwitsë, tyëjkˈagäj o tijatyë jäˈäy tukˈanaˈamëp? Mbäät nwinmäˈäyëm ko Jesus ojts yajxon tnijawë wiˈixë jäˈäy jantsy jotkujk nyayjawëty ko yajxon tijaty ttuny.

⁷ Jesus nan ojts yajxon ttuunë Diosë tyuunk. Tëgëk jëmëjt ja kujm ojts tjotmoˈoy ja tuungë jëjpˈambë diˈibë naty të yajtuknipeky. Kom myëtmaytyäˈägan nimayë jäˈäy, pääty kyaj dyajtëgooyë xyëë tiempë, tsejkyë tsejkyë pyëdeˈky ets axtë kootspäät tyuuny (Lukʉs 21:37, 38; Fwank 3:2). Ojts nyejxy “käjpn gäjpn es tkäjxwaˈxy ja oybyë ayuk diˈibë nyigajxypy ja Diosë kyutujkën” (Lukʉs 8:1). Oorëˈam ojts tyuˈuyoˈoy tekyˈam parë ojts tnigajxy tnimaytyaˈaky ja oybyë ayuk.

8, 9. ¿Wiˈixtsoo Jesus ojts tˈixy ko oybyëtsëëmp ja tyuunk?

⁸ ¿Ojtsë Jesus tˈixy wiˈix yˈoybyëtsemy ja tyuunk? Ojts tˈixy. Pes kajaa ojts tniˈipy tkojy ja tëyˈäjtën ets jeˈeyë ja kam ojts tnikaknë parë ja pëjtaˈaky pyëdëˈëgët. Ko ojts ttuunë Diosë tyuunk yëˈë diˈib ojts myëjämoˈoyëty ets yaˈijtë mëk, pes axtë myëdënääyë yuu mët ko ttuuny ja Diosë tyuunk (Fwank 4:31-38). Mbäät nbawinmäˈäyëm ko jantsy jotkujk ojts nyayjawëty ko ojts dyajjëjpkëjxnë ja tyuunk yä naxwiiny, päätyë tyeety ojts tˈanëëmë: “Tëts mij  nmëjˈixy mët ko tëts nguytyuundäˈäy tëgekyë diˈibëts mij xytyukˈanaˈam es ndunëdëts yä naxwiiny” (Fwank 17:4).

⁹ Extëm nˈijxëm, Jyobaa mëdë Jesus yˈijxtëp wiˈix yˈoybyëtsemy ko mëk tyundë. Ko ntsojkëmë Jyobaa yëˈë xypyudëjkëm parë nbanëjxëmë yˈijxpajtën. Jesus nan të “xymyoˈoyëm tuˈugë ijxpajtën ets nbaduˈunëm yëˈë” (1 Peedrʉ 2:21; Éfesʉ 5:1). Minë net nˈokˈijxëm wiˈix mbäät nayjäˈäjëm jotkujk ko nˈijxëm wiˈix yˈoybyëtsemy ja tuunk.

10, 11. ¿Ti mbäät xypyudëjkëm parë nwinmäˈäyëm ko tuunk ayoˈon xëmë yˈoybyëtsëmäˈäny?

¹⁰ Niˈamukë Dios mëduumbë nmëdäjtëmë tuunk ets nayjawëyäˈänëm jotkujk mä nduˈun nˈayoˈojëm. Per mbäät kyaj jotkujk nayjäˈäjëm pën yëˈë nduˈunëm diˈib kyaj ntsojkënyëˈäjtëm. Pääty, ¿ti mbäät nduˈunëm parë nˈijxëm wiˈix yˈoybyëtsemy ko mëk nduˈun nˈayoˈojëm?

¹¹ Nˈokwinmäˈäyëm ko xëmë yˈoybyëtsëmäˈäny ja nduunkˈäjtëm. Näˈäty kyaj mbäät nyajtëgäjtsëm ja tuunk ayoˈon diˈib ndukjukyˈäjtëm, per diˈib mbäät nyajtëgäjtsëm yëˈë jot winmäˈäny mä wiˈix nˈijxëm ja tuunk. Diˈib mbäät xypyudëjkëm, yëˈë ko nwinmäˈäyëm wiˈixë Dios tˈixy. Extëm nˈokpëjtakëm, pën mijts mnigëbäjkˈäjtypyë mfamilyë oy ko xymyëdatët mwinmäˈänyoty ko Dios mëj tˈixy oy ti tuunk xytyunët. Pesë yˈAyuk jyënaˈany ko diˈib kyaj tˈixyë fyamilyë, “të dëˈën tˈëxtijy ja mëbëjkën es waanë axëëk yëˈë wyeˈemy këdiinëm ja diˈibë kyaj tmëbeky[ë]” Jyobaa (1 Timotee 5:8). Ko njaygyujkëm ko Dios yëˈë të xytyuknipëjkëm ets nduˈun nˈayoˈojëm ta jotkujk nayjäˈäjëm ets niˈigyë ndukxondakëm ja tuunk, kyaj dyuˈunëty extëmë wiink jäˈäy diˈib mëët nduˈunmujkëm.

12. ¿Wiˈix yˈoybyëtsemy ko nˈijtëm tuumbë jäˈäy ets ko tëyˈäjtën mëët tijaty nduˈunëm?

¹² Nˈokˈijtëm tuumbë jäˈäy ets nˈoktuˈunëm tijaty tëyˈäjtën  mëët. Niˈamukë Dios mëduumbë tsojkëp nˈijtëm tuumbë jäˈäy ets yajxon tijaty nduˈunëm. Mëjwiin kajaa yˈoybyëtsemy ko duˈun njukyˈäjtëm, pes mbäät niˈigyë xytsyojkëm ja jäˈäy diˈib nmëduˈunëm (Proverbios 12:24; 22:29). Nan kyaj yˈoyëty nyajtëgoˈoyëmë xëë tiempë mä nmëduˈunëm ets kyaj nmaˈtsëm tijaty (Éfesʉ 4:28). Extëm të nijäˈäjëm mä kapitulo 14, mbäät ja diˈib nmëduˈunëm niˈigyë tijaty xytyuknipëjkëm, per oy tkapëkëdë kuentë ko yajxon tijaty nduˈunëm, jotkujk nayjäˈäjëm ko nduˈunëm tijaty extëmë Dios ttukjotkëdaˈaky ets kyaj ti nbokyjäˈäjëm (Ebreeʉsʉty 13:18; Kolosʉ 3:22-24).

13. ¿Wiˈix wyimbëtsemy ko oyë jot winmäˈäny nmëdäjtëm mä nmëduˈunëm?

 ¹³ Ko oyë jot winmäˈäny nmëdäjtëm mbäädë Dios nyajmëjpëtsëˈëmëm. Ko jantsy oyë jot winmäˈäny nmëdäjtëm niˈamukë jäˈäy tpekyë kuentë. ¿Ets wiˈix wyimbëtsemy? Pes ko oypyënëty mbäät tˈixy “ko ja yˈëxpëjkënë Dios, yëˈë nYajnitsokpëˈäjtëm, byeen jyantsy oy jyantsy tsyujëty” (Titʉ 2:9, 10). Duˈunë duˈun, ko oyë jot winmäˈäny nmëdäjtëm, ta nyajmëjpëtsëˈëmëmë tadë relijyongë tëyˈäjtënbë, ets mbäät mayë jäˈäy tˈoyˈixy. ¡Okpawinmay wiˈix mnayjawëdët ko tuˈugë jäˈäy tnijawëyäˈänëdë tëyˈäjtën mët ko oyë mjot mwinmäˈäny xyaˈixyëty mä mduny! Ets diˈib mas jëjpˈam yëˈë ko nitii duˈun jotkujk xykyayajnayjäˈäjëm extëm ko nyajxondakëmë Jyobaa ets nyajmëjpëtsëˈëmëm (Proverbios 27:11; 1 Peedrʉ 2:12).

14-16. ¿Ti majtsk peky mbäät nayajtëˈëjëm ko nyaˈˈawäˈänëmë tuunk?

¹⁴ Mä Biiblyë kyaj tnigäjxtäˈäy tijaty mbäät nduˈunëm ets tijaty kyaj. Per kyaj yëˈë tˈandijy ets ngupëjkëm oytyim diˈibëtyë tuunk. Biiblyë xypyudëjkëm parë nijäˈäjëm ti tuunk mbäät nduˈunëm ets ti tuunk kyaj, ets xyˈanmäˈäyëm ko yëˈë mbäät nduˈunëm diˈibë Dios kyaj axëëk yajnayjawëdët (Proverbios 2:6). Per ¿wiˈix mbäät nijäˈäjëm pën tyukjotkëdäˈägëp tuˈugë tuunk? Min nˈokˈijxëm majtsk peky diˈib mbäät nayajtëˈëjëm.

¹⁵ ¿Yëˈëtsë jäˈäy xytyuktunäämp diˈibë Biiblyë yajkubojkypy? Diosë yˈAyuk yajkubojkypy ko nmaˈtsëm, ko nˈandakëm ets ko nyaˈoˈoyëmë awinax (Éxodo 20:4; Apostʉlʉty 15:29; Éfesʉ 4:28; Diˈibʉ Jatanʉp 21:8). Pääty kyaj ngupëjkëmë duˈumbë tuunk. Pën ntsojkëmë Jyobaa ta kyaj nëjx nˈaxäjëmë tuunk diˈibë Diosë yˈanaˈamën yajkubojkypy (1 Fwank 5:3).

 ¹⁶ ¿Mbäädëts nikëjxmˈatyë poky kots nmëdunët mä jäˈäy ttundë diˈibë Biiblyë yajkubojkypy? Nˈokwinmäˈäyëm ko nyaˈˈawäˈänëm tuˈugë tuunk parë nmëbadëˈkëm. Tyäˈädë tuunk kyaj yˈaxëëgëty, per ¿oyëdaa ko tuˈugë Dios mëduumbë myëbadëˈëgët mä tuˈugë tëjk mä yetyëjk toxytyëjk ttooktë nyiniˈx kyëbäjk? Mbäät kyaj yëˈë jap ttimtuny ja axëkˈäjtën. Per ¿ti kyaj naty nanduˈun tnikëjxmˈaty ja poky diˈibë Biiblyë yajkubojkypy? (1 Korintʉ 6:9). Kom ntsojkëmë Jyobaa kyaj ti ndunäˈänëm diˈib yˈaxëkˈijxypy.

17. 1) ¿Tijaty tsojkëp nwinmäˈäyëm parë nˈijxëm pën mbäät nduˈunëm tuˈugë tuunk o kyaj? (Ixë rekuäädrë “ ¿Oyëbëdaa kots nˈaxäjëdë tyäˈädë tuunk?”.) 2) ¿Ti mbäät nduˈunëm parë jot winmäˈäny xypyudëjkëm ets nduˈunëm diˈibë Dios tyukjotkëdäˈägëp?

 ¹⁷ Mbäät nyaˈˈawäˈänëm kanäk pekyë tuunk ayoˈon, per diˈib mbäät xypyudëjkëm parë yajxon nwinˈijxëm pën mbäät nduˈunëm o kyaj, yëˈë tadë yajtëˈëwën diˈib mä parrafo 15 etsë 16. Per taaˈäjtp kanäk peky diˈib nanduˈun mbäät xyajwinmäˈäyëm pën mbäät nˈaxäjëm ja tuunk o kyaj. * Kyaj mbäät nˈawijxëm ets tukëˈëyë myiindäˈäyët mä ëxpëjkpajn diˈib yajpëtseembyë tuumbë diˈib kuwijy ti mbäät nduˈunëm ets ti kyaj. Ets ja net mä tsyekyëty nyajˈyoˈoyëm këˈëm ja jot winmäˈäny ti mbäät nduˈunëm. Mä  kapitulo 2 të nijäˈäjëm ko mbäädë jot winmäˈäny yajxon nduˈumoˈoyëm ko nˈëxpëjkëmë Biiblyë ets nmëmäˈäy nmëdäjëm wiˈix mbäät nyajtuˈunëmë kyäjxwijën. Duˈuntsoo nmëwinmäˈänybyatëm wiˈix mbäät tijaty nduˈunëm, ets xypyudëjkëm ja jot winmäˈäny parë nduˈunëm diˈibë Dios tyukjotkëdäˈägëp ets nˈijtëm mä tsyojkën (Ebreeʉsʉty 5:14).

18. ¿Tiko tsyiptaˈaky nduˈunëm tijatyë Jyobaa yˈoyˈijxypy?

¹⁸ Mä tyäˈädë tiempë diˈib jëjpkëxanëp “jantsy tsep ja xëëw ja jumëjt” nyaxy, pääty tsiptakp nduˈunëm tijatyë Jyobaa yˈoyˈijxypy (2 Timoteo 3:1, ØXN). Nijäˈäjëm ko tsip nbatëmë tuunk diˈib mbäät ndukjukyˈäjtëm, ets winmäˈänyoty nmëdäjtëm ko të nyajtuknipëjkëm parë familyë nyajkäˈäy nyaˈukëm. Per pën kyaj naygyuentˈäjtëm mbäät nwinmäˈäyëm extëmë naxwinyëdë jäˈäy wyinmay mä ja meeny sentääbë ets mbäät yëˈë xyajtuˈudujkëm parë kyaj yajxonë Jyobaa nmëduˈunëm (1 Timotee 6:9, 10). Min nˈokˈijxëm ti mbäät xypyudëjkëm parë nˈijxëm diˈibë “dëˈën oy” ets yëˈë jëjpˈam nbëjtakëm (Filipʉs 1:10).

19. 1) ¿Tiko mbäädë Jyobaa nmëbëjkëm amumduˈukjot? 2) Ets pën njantsy myëbëjkëm, ¿ti diˈib kyaj nëjx nduˈunëm?

¹⁹ Nˈokmëbëjkëmë Jyobaa amumduˈukjot (Proverbios 3:5, 6). ¿Oyëdaa ko nmëbëjkëmë Jyobaa amumduˈukjot? Tiko këdii, pes yëˈë xykyuentˈäjtëm ets xytsyojkëm (1 Peedrʉ 5:7). Jyobaa xëmë xymyoˈoyëm tijaty xytyëgoyˈäjtxëm, pes yëˈë niˈigyë tnijawë ets kyaj dyuˈunëty ëtsäjtëm (Salmo 37:25). Pääty, nˈokjamyajtsëm extëmë Biiblyë xyˈanmäˈäyëm: “Katë xyˈatsoktë meeny. Jotkujkˈattë mët diˈibë mëdäjttëp, mët ko Dios të jyënaˈany: Ninäˈä nganaˈixët, es ninäˈä ngamastuˈudët” (Ebreeʉsʉty 13:5). Mayë nmëguˈukˈäjtëm diˈib kajaa tiempë yajtuundëp mä Diosë  tyuunk, të tˈixtë ko Dios xëmë myoˈoyëdë tijaty tëgoyˈäjtxëdëp. Pääty pën njantsy myëdäjtëmë mëbëjkënë mä Jyobaa ta kyaj nëgoo nmëmäˈäy nmëdäjëm wiˈix nyajnäjxëmë xëë tiempë mëdë familyë (Matewʉ 6:25-32). Ninäˈä nganasˈijxëm etsë tuunk ayoˈon naytyukwinˈëˈënëm ets  kyaj nekytyuˈunëmë Diosë tyuunk, extëm kyaj nekynyëjxëm ëwäˈx käjxwäˈxpë o ndëgoyˈäjtëm mä naymyujkën (Matewʉ 24:14; Ebreeʉsʉty 10:24, 25).

20. ¿Ti yˈandijpy nmëdäjtëm oy ja wiin, ets ti mbäät xypyudëjkëm parë tuktëyë njukyˈäjtëm?

²⁰ Nˈokmëdäjtëm oyë wiin (Matewʉ 6:22, 23). Tyäˈädë yëˈë yˈandijpy ko kyaj nëgoo tijaty nmëmäˈäy nmëdäjëm. Dios mëduumbë jam jeˈeyë mbäädë yˈijxënë tpëjtaˈaky mä Diosë tyuunk. Pën yajxon ja ijxënë jam nbëjtakëm, ta kyaj nëjx aduˈuk nmëmäˈäy nmëdäjëmë tuunk mä tsobääty nyajmëjuˈuyëm o nmëdatäˈänëm tijaty mëjwiin kajaa. Ets nan kyaj nëjx nbaˈoˈktëˈëjëm tijaty jembyëtsëëmp o diˈibë jäˈäy myaytyakypy ko jëjpˈam nmëdäjtëm parë jotkujk nˈijtëm. Per ¿ti mbäät xypyudëjkëm parë tuktëyë njukyˈäjtëm? Ko kyaj nëgoo naynyijuˈuy naynyinuˈxëm, kyaj nmëdäjtëm tijaty diˈib mbäät xypyëjkëm kajaa tiempë. Ets extëm jyënaˈanyë Biiblyë, pën “nmëdäjtëm ja käˈäy ukën es ja wit nijam, mët yëˈëyë tyäˈädë njotkujkˈäjtëm” (1 Timotee 6:8). Nˈokˈëxtäˈäyëmë winmäˈäny wiˈix mbäädë jukyˈäjtënë tuktëyë nyajnäjxëm.

21. ¿Tiko tsyekyëty ets nduknibëjtakëm tijaty jëjpˈam ndunäˈänëm, ets ti diˈib mbäät jawyiin nbëjtakëm mä jukyˈäjtën?

²¹ Nˈokpëjtakëm jëjpˈamë Diosë tyuunk. Tsojkëp nduknibëjtakëm tijaty jawyiin ndunäˈänëm, pes kyaj nëgoo tiempë nmëdäjtëm. Mbäät ja xëë tiempë nyajtëgoˈoyëm mä diˈib kyaj jyëjpˈamëty ets kyaj nduˈunëm diˈib jëjpˈam. ¿Ets ti diˈib mbäät nbëjtakëm jëjpˈam? Jesus ojts tˈanëëmëdë ja yˈëxpëjkpëty ets “tjotmoˈoytyët” ja Diosë tyuunk, oy tyam mayë jäˈäy yëˈë pyëjtaktëp jëjpˈamë ëxpëjkënë mä eskuelë parë tpäättëdë tyuunk mä tsooxë yajmëjuyët (Matewʉ 6:33). Niˈamukë Dios mëduumbë yëˈë jëjpˈam nbëjtakëmë Diosë jyaˈa. Tijaty nduˈunëm ets tijaty nwinmäˈäyëm ja mä nyaˈijxëm ko diˈib mas jëjpˈam parë ëtsäjtëm yëˈë nmëduˈunëmë Dios ets nduˈunëm tijaty tsyejpy,  kyaj yëˈëjëtyë jukyˈäjt madakën o tijatyë naxwinyëdë jäˈäy yˈawäˈänëp.

22, 23. 1) ¿Diˈibë tuunk mas jëjpˈam nbëjtakëm, ets wiˈix nyaˈijxëm ko yëˈë diˈib jëjpˈam nduˈunëm? (Ixë rekuäädrë “ Kots nbëjtakyë nwinmäˈäny nmëdunëdëtsë dios yëˈëts diˈib xyajjotkujkˈäjtp”.) 2) ¿Wiˈixë net mbäät nˈijxëm ja tuunk ayoˈon?

²² Niˈamukë Dios mëduumbë nijäˈäjëm ko tyam njukyˈäjtëm mä wingon yˈijnë ja kutëgoˈoyën. Päätyë tadë tuunk diˈib mas jëjpˈam nbëjtakëm yëˈë ngäjxwäˈxëm ja Diosë yˈanaˈamën, ets nyaˈëxpëjkëmë jäˈäy (Matewʉ 24:14; 28:19, 20). Yëˈë nbanëjxëmë Jesusë yˈijxpajtën, jam ja jot winmäˈäny nbëjtakëm mä tyäˈädë tuunk diˈib yajnitsoˈogäämp. ¿Wiˈix nyaˈijxëm ko jëjpˈam nbëjtakëm? Ko nˈëwäˈx ngäjxwäˈxëmë Diosë yˈayuk mët winë jot mëjää. Ta näägë nmëguˈukˈäjtëm diˈib tuundëp prekusoor o ta nääk diˈib nëjxtëp wiink paˈis Dios mëduumbë. Ets mayë uˈunktääk uˈunkteety ko jëjpˈam tpëjtäˈäktë Diosë tyuunk, ta tpudëkëdë yˈuˈunk yˈënäˈk parë duˈunë Dios tmëdundët. Ko njotmoˈoyëmë Diosë tyuunk, ¿nˈijxëmë net wiˈix yˈoybyëtsemy ko mëk nduˈun nˈayoˈojëm mä nˈëwäˈx ngäjxwäˈxëm? Tiko këdii. Pes jantsy jotkujk nayjäˈäjëm ets nˈaxäjëmë kunuˈxën ko nmëduˈunëmë Jyobaa amumduˈukjot (Proverbios 10:22).

²³ Niˈamukë nduˈun nˈayoˈojëm mëk parë nmoˈoyëmë familyë tijaty tëgoyˈäjtxëp. Per nˈokjamyajtsëm ko Jyobaa yëˈë tsyejpy ets nˈijxëm wiˈix yˈoybyëtsemy ja tuunk ayoˈon. Pën nduˈunëm tijaty extëm yëˈë wyinmay ets extëmë yˈanaˈamën jyënaˈany, ta nëjx nayjäˈäjëm jotkujk mä ja tuunk ayoˈon. Nˈokpëjtakëmë winmäˈäny parë nitii xykyayajtuˈudujkëm ets ngatuˈunëmë tyäˈädë tuunk diˈib mas jëjpˈam, ngäjxwäˈxëmë oybyë ää ayuk diˈib myaytyakypy Diosë kyutujkën. Duˈuntsoo naty nyaˈijxëm ko ntsojkëmë Jyobaa ets ko xëmë nˈitäˈänëm mä tsyojkën.