Parë niˈamukë pënaty tsyojktëbë Jyobaa:

Jesus ojts jyënaˈany: “[Miitsëty] mˈixyˈattëp ja tëyˈäjtën, es yëˈë tëyˈäjtën yëˈë myajwëˈëmëdët awäˈätstuuy” (Fwank 8:32). ¡Mëjwiin kajaa tyäˈädë ää ayuk xyjotkujkmoˈoyëm! Pes mbäädë tëyˈäjtënë nijäˈäjëm oy tyam jyaˈˈatyë naywyinˈëën naywyinxäjë mä tyäˈädë xëë tiempë “kyëxaan tyëgoyaanëjëny” (2 Timoteo 3:1, NTM). ¿Njamyajtsëm wiˈix ojts nayjäˈäjëm ko tim jawyiin ojts nijäˈäjëm ja tëyˈäjtën diˈib yajpatp mä Diosë yˈAyuk? ¡Jantsy jotkujk ojts nayjäˈäjëm!

Per kyaj jeˈeyë tsyekyëty nijäˈäjëm yajxonë tëyˈäjtën ets ndukmëtmaytyakëmë jäˈäy. Jëjpˈam ets nguytyuˈunëm wiˈix ja tëyˈäjtën jyënaˈany. Pääty tsojkëp nˈijtëm mä Diosë tsyojkën. ¿Ti tyäˈädë yˈandijpy? Jesus ojts tˈanëëmë yˈapostëlëtëjk ja ux mä naty yajmatsanë: “Pën mguytyuundëp ja nˈanaˈamënëts, mbadundëbë tyäˈädë tsojkën diˈibëts ëj nmëdäjtypy mët miitsëty, extëmëts ëj nguytyunyëts ja nDeetyëtsë yˈanaˈamën es nbadunyëts ja tsyojkën diˈibë yëˈë myëdäjtypy mët ëj” (Fwank 15:10).

¿Nbëjkëmë kuentë ti Jesus tyuun parë nyayaˈijtë mä Diosë tsyojkën? Yëˈë kyuytyuun ja tyeetyë yˈanaˈamën. Ëtsäjtëm nanduˈun mbäät nguytyuˈunëm. Parë nyayaˈijtëm mä Diosë tsyojkën jëjpˈam ets njukyˈäjtëm jabom jabom extëm ja tëyˈäjtën jyënaˈany. Ets extëmë Jesus jyënany: “Pën mjaygyujkëdëbë tyäˈädë es pën mbaduundëp, mˈittëp agujk jotkujk” (Fwank 13:17).

Ntsojktëbëts etsë tyäˈädë liibrë mbudëkëdët parë xëmë xykyuytyundët ja tëyˈäjtën, ets mnayaˈitëdët “mä ja Diosë tsyojkën” ets xyjëjpˈixtët “ja jikyˈäjtën winë xëë winë tiempë” (Juudʉs 21).