YAJTËˈËWËN 3
¿Wiˈixëts mbäät ngajpxy nmaytyaˈaky mëdëtsë ndääk ndeety?
¿TIXYËP MIJTS MDUUMPY?
Okwinmayë tyäˈädë: Geoffrey diˈibë jyëmëjt 17 të ttuundäˈäyë tyarea mierkëlës tsuu, ta net pyoˈkxäˈäny, ¡pes nitëjkëp pyoˈkxët! Ta nyaxweetsy mä siyonk mä xëmë pyoˈkxy parë tˈixäˈänyë telebisionk.
Ko ajotkumonë jyaˈtyë tyeety ets të wyiin jyëjp dyajmäˈtäˈäy.
“¡Geoffrey! ¿Tiko jeˈeyë mxëëw mdiempë xyajtëgoy mëdë telebisionk? ¿Këdii tapxyëbë mˈutsy xypyudëkë mä dyaˈoyë tyarea? ¡Ninäˈä xykyatuny diˈib ndukˈaneˈempy!”.
Ta Geoffrey yˈatsoy tyëtsoty: “Ta jatëgok xyajtsondakojnë”.
Ta tyeety myëwingonyëty ets yajtëyëty: “¿Wiˈix të mjënäˈäny?”.
“Kyaj niwiˈix tatë”, ta Geoffrey myëkxejy të wyiin jyëjp dyajmäˈtäˈäy.
Të jyantsy jyotˈambëkyë tyeety. Ta yˈanëˈëmxëty, “¡këdiits duˈun xymyëgajpxy!”.
Koxyëp mijts Geoffrey, ¿tixyëp të xytyuny parë kyaj të myëjwindëkë ja jotmay?
WÄˈKWËˈËMË ETS WINMAY
Ko xyajˈyoˈoyë karrë ets xypyaatyë tuˈu diˈib aduky, ta xyˈëxtäˈäyë wiink tuˈu. Nanduˈunën mbäät xyˈëxtäˈäyë winmäˈäny parë mëët mgäjpx maytyäˈägëdë mdääk mdeety.
EXTËM NˈOKPËJTAKËM:
Leah jyënaˈany: “Xytsyiptakxëbëts nmëtmaytyäˈägëdëtsë ndeety, näˈäty kots nˈokmëtmaytyaˈaky, tatsë net xyajtëy: Okmaˈkx, ¿wiˈix të mjënäˈäny?”.
TËGËK PËKY DIˈIB MBÄÄDË LEAH TTUNY
-
Tmëyaxkaˈagëdë tyeety.
Leah ta tmëyaxkeˈegyë tyeety: “¡Okmëdoowˈit! ¡Jëjpˈamë tyäˈädë!”.
-
Kyaj tnekytyukmëtmaytyäˈägët.
Leah kyaj tnekytyukmëtmaytyäˈägäˈänyë tyeety ja jotmay diˈib myëdäjtypy.
-
Tˈixët näˈä mbäät ttukmëtmaytyaˈaky.
Leah, ta ok myaytyaˈaky mëët ja tyeety o tjäˈäy tuˈugë neky mä ttukmëtmaytyaˈagyë jyotmay.
¿Diˈibëxyëbë Leah mˈanmaapy ttunët?
WINMAYË TYÄˈÄDË: Leah tyeety, kanäk pëky tijaty tjantsy wyinmay ets kyaj tpëkyë kuentë ko nyëëx myëgajpxyëty. Koxyëbë Leah twinˈixyë myëduˈukpë ets tmëyaxkeˈegyë tyeety, kyajxyëp ja tyeety tjaygyukë tiko duˈun yˈadëˈëtsy. Ets ko duˈun yˈadëˈëtsët, yajtëgoyëp ja mayˈäjt wintsëˈkën ets kyaj yajmëdoowˈitët (Éfesʉ 6:2). Tyäˈädë kyaj yˈoyëty parë ja uˈunkteety ets ni parë ja uˈunk.
Oy ti myajtuˈuˈadukëdët, mbäät xyˈëxtäˈäyë wiink tuˈu parë xymyëtmaytyäˈägëdë mdääk mdeety ets tjaygyukëdët wiˈix mnayjawëty.
Myëmajtskpë, yëˈë diˈib mbäät pojënë tjatuny, per kyaj yˈoybyëtsëmäˈäny. ¿Tiko? Yëˈko pënë Leah yaˈoyëyaambyë jyotmay, tsojkëbë tyeety tmëtmaytyäˈägët. Ets tsojkëp ja tyeety tnijawët ti jäjtëp parë yajpudëkët. Pën kyaj tnigajpxy, kyaj mbäät yˈoyë ja jyotmay.
Etsë myëdëgëëkpë, Leah kyaj tnasˈixë parë ti yajtuˈuˈadukëdët etsë tyeety tmëtmaytyäˈägët. Yˈëxtaabyë winmäˈäny näˈä mbäät tmëtmaytyaˈaky. Ets pën nyijäˈäyëp ja tyeety, mbäät mas oy nyayjawëty.
Ko Leah tjäˈäyët tuˈugë neky mbäät pyudëkëty parë yajxon tnigäjpxët ti të tmaytyäˈägäˈäny. Ko net ja tyeety tkäjpxët, ta niˈigyë tjaygyukët wiˈix ja nyëëx nyayjawëty. Tyäˈädë myëdëgëk pëkypyë mbäät nimajtsk pyudëkëdë, oy wyingëjxm jëjpkëjxm myaytyäˈäktët o tjäˈäyët tuˈugë neky. Ko duˈun ttundët, yëˈë nety pyanëjkxtëbë tyäˈädë Biiblyë kyäjpxwijën, nduˈunëm diˈib xymyoˈoyëm “ja agujkˈäjt jotkujkˈäjtën” (Romanʉs 14:19).
¿Tijaty mbäät tˈaktunyë Leah?
Pën jap ti yˈakminy mä mwinmäˈäny, këxjäˈäy yä abatkëˈëy. Nan këxjäˈäy wiˈix mbäät wyimbëtsëmy.
NIGÄJPX TI MYAJJAYGYUKËYANËP
Jamyats ko extëm xyˈanëëmë mdääk mdeety mbäät kyaj duˈun tjaygyukëdë.
EXTËM NˈOKPËJTAKËM:
Ko mdääk mdeety myajtëwëdët tiko xëmë mˈawäˈändaˈaky. Ets xyˈatsoy: “Kyajtsë tadë nmaytyäˈägäˈäny”.
Ko duˈun mˈatsowët, mbäät tjaygyukëdë ko kyaj xyˈoktukjotkujkˈäjnëdë. Ets ko yëˈëyë nmëtnaymyaayëbë ndukmëtmaytyäˈägaambyë mjotmay.
Okwinmay ko xywyinguwäˈägë tuˈugë mëj jotmay ets mbudëkëyanëp ja mdääk o mdeety. Per xyˈatsoy: “Këdii mmay mdäjy, mbäädëts këˈëm nyaˈoyë”.
-
Mbäät ja mdääk mdeety tjaygyukëdë:
-
¿Wiˈixxyëp mbäät xyˈanëëmë?
