Jyobaa * Dios yëˈë yajpëjk ja tim jawyiimbë yetyëjk etsë toxytyëjk. Biiblyë jyënaˈany ko yëˈë yajkoj ja tim jawyiimbë toxytyëjk ets ta “ojts tmoˈoy ja yeˈeytyëjk”. Jantsy jotkujkë Adán nyayjäˈäwë axtë jyënany: “¡Yäˈädë tëy ngëˈëmniniˈkxëts yëˈë, ets ngëˈëmbäjkëts yëˈë!” (Génesis 2:22, 23, Mʉgoxpʉ ja̱ noky mʉdiˈibʉ jyaayʉn yʉ Moisés). Jyobaa duˈunyëm ttukmëtsekyë kasäädë jäˈäy ets yˈittët jotkujk.

Ko jäˈäy pyëktë, mbäät wyinmaytyë ko kyaj ti amay jotmay tmëdatäˈändë. Per kyaj dyuˈunëty, pes axtë kasäädë jäˈäy diˈib jantsy naytsyojkëdëp myëdäjttëbë amay jotmay (1 Korintʉ 7:28). Tyäˈädë foyetë myëmiimbyë käjpxwijën diˈib yajpatp mä Biiblyë, pën mguytyuumpy, ta mˈitët agujk jotkujk mëdë mfamilyë (Salmo 19:8-11).

BIIBLYË JYËNAˈANY: Yetyëjk kasäädë yëˈë nyigëbäjkˈäjtypyë fyamilyë (Éfesʉ 5:23).

Jyobaa tsyejpy ets mijts yetyëjk kasäädë xykyuentˈatët tsuj yajxonë mnëdoˈoxy (1 Peedrʉ 3:7). Pes ojts dyajkojy parë mbudëkëdët, ets yˈawijxypy parë xymyëjˈixët ets xytsyokët (Génesis 2:18). Mëk mbäät xytsyekyë mnëdoˈoxy axtë xypyëjtäˈägët jëjpˈam tijaty yëˈë tsyejpy, ets ok, tijaty mijts mtsejpy (Éfesʉ 5:25-29).

Ets mijts toxytyëjk kasäädë, Jyobaa tsyejpy parë mëjwiin kajaa xywyintsëˈëgëdë mnyaˈay ets xypyudëkët parë oy tnigëbäjkˈatëdë fyamilyë (1 Korintʉ 11:3; Éfesʉ 5:33). Kyaj xyjyëjpkugäjpxët tijaty tyuknibëjtakëp, pudëkë xondaˈakyˈää xondaˈakyjyot (Kolosʉ 3:18). Ko duˈun xytyunët, ta jantsy tsuj mˈixëdët ja mnyaˈay etsë Jyobaa (1 Peedrʉ 3:1-6).

DIˈIB MBÄÄT XYTYUNY:

• Yajtëw ja mjamyëët mä mbäät mnayaˈoyëty. Mmëdooˈit yajxon ets tunë mëjää parë xytyunët extëm të mˈanëˈëmxëty

• Mmaˈkxtuk. Myënëjkxypyë tiempë parë xynyijawët wiˈix ja mjamyëët jotkujk xyajnayjawëdët

BIIBLYË JYËNAˈANY: Jëjpˈam ets xyˈixët ti tyukˈoyˈatëp ja mjamyëët (Filipʉs 2:4). Kyaj axëëk xyajnayjawëdët, jamyats ko Jyobaa tsyejpy ets pënaty mëduundëp xëmë yˈoyjyaˈayˈatët (2 Timotee 2:24). Winmay wiˈix xyˈanëëmëyaˈany, pesë Biiblyë jyënaˈany: “Diˈib nëgoo käjpxp ets kyaj tniwinmayë duˈun extëm ko kyumy tuˈugë espäädë, perë yˈää yˈayukë jäˈäy diˈib wijy, yajtsoybyajtp” (Proverbios 12:18). Diosë myëjää yëˈë mbudëkëyanëp parë xyajtunëdë ää ayuk diˈib oy yajnayjawëdëp ja mjamyëët (Galasyʉ 5:22, 23; Kolosʉ 4:6).

DIˈIB MBÄÄT XYTYUNY:

• Ko ti jotmay xytyukmëtmaytyäˈägäˈänëdë mjamyëët, amdow jawyiinë Diosë nyaybyudëkë parë mmaˈkxtukët ets parë kyaj xytyukpëtsëmäˈänëdë mwinmäˈäny

• Winmay yajxon ti mdukmëtmaytyäˈägaampy ets wiˈix

BIIBLYË JYËNAˈANY: Ko jäˈäy pyëjknë, ta jyëmbijnë extëmxyëp jeˈeyë tuˈuk (Matewʉ 19:5). Per kom nimajtskë jäˈäy diˈib të tyuˈukmuky, näˈäty tëgatsyaty wyinmaytyë. Pääty jëjpˈam ets tjattët wiˈix dyajtuˈugyëdët ja jyot wyinmäˈäny ets tjaygyukëdët wiˈix nyayjawëdë (Filipʉs 2:2). Jëjpˈam ets nyaytyuknijawëdët tijaty tyunandëp. Pesë Biiblyë jyënaˈany: “Mët ja käjpxwijën wyeˈemy täˈtspëky tijaty yajtukniwinmäˈäyëp” (Proverbios 20:18). Ko ti xytyunäˈändët diˈib jëjpˈam, nasˈixëdë etsë Biiblyë kyäjpxwijën mduˈumoˈoyëdët (Proverbios 8:32, 33).

DIˈIB MBÄÄT XYTYUNY:

• Kyaj jeˈeyë tijaty xynyimaytyäˈäk xykyumaytyäˈägët; tuknijawë ja mjamyëët wiˈixën meerë mnayjawëty

• Mä ti kompromisë xykyatunynyëm yajtëw jawyiin ja mjamyëët