ËXPËJKËN 10
Yajpat yajjënak ja mˈääw mˈyoˈkn
Proverbios 8:4, 7
¿TI YˈANDIJPY? Ko oy xymyoˈoyët ja mˈääw mˈyoˈkn, ko xyyajpat xyyajjënakët ets ko xykyäjpxët peˈtypy o oytyaˈagyë, ta yajxon yajjaygyukët ti mmaytyäˈägaampy ets pënaty myëdoowˈijttëp nyaybyëjtäˈägäˈänëdë mä ti jam mnimaytyakypy.
WIˈIX YAJTUNÄˈÄNY:
-
Yajpat yajjënakë mˈyoˈkn. Yajpat parë xynyimaytyäˈägët diˈib jëjpˈam ets parë xymyëjääwmoˈoyëdë jäˈäy. Yajpat nanduˈunë mˈyoˈkn ko xykyäjpxët wiˈixë Dios tˈanmääyë jäˈäy diˈib tijaty tyukkumëdoow. Yajjënakë mˈyoˈkn ko xykyäjpxët diˈib atsëˈkëp, diˈib yajmääy yajtäjp o diˈib tunan jatanëp.
-
Yajtëgatsë mˈyoˈkn. Käjpx abejy yoˈkpejy pën yëˈë mmaytyäˈägaampy diˈib yajtukxondakp o diˈib mëj, mutsk o diˈib jagam o wingon. Ets pën yëˈë mmaytyäˈägaampy diˈib mon tuk, käjpx amëj yoˈkmëj.
-
Käjpx peˈtypy o oytyaˈagyë. Käjpx peˈtypy pën yëˈë myajjaygyukëyanëp diˈib yajtukˈijt yajtukxoomp. Ets pën yëˈë mnigäjpxaampy diˈib jëjpˈam, käjpx mas oytyaˈagyë.
