Pënaty näämnëm pëjktëp xëmë jyajukyˈatäˈändë agujk jotkujk extëm ja xëëw mä pyëjktë. ¿Mbäädëdaa duˈun jukyˈattë? Mbäät, pesë Diosmëduumbëty mëdiˈibë jeky kujk kyasäädëˈäjnëdë të tˈixtë ko mbäät jyukyˈattë agujk jotkujk ko tpadundë ja Biiblyë kyäjpxwijën.

1. ¿Wiˈixë Biiblyë tkäjpxwijy ja yetyëjk kasäädë?

Jyobaa të ttuknipëkyë yetyëjk kasäädë parë tnigëbäjkˈatëdë fyamilyë (käjpxë Éfesʉ 5:23). Ets tsyojkypy parë ttunët tijaty extëm mbäät ja fyamilyë ttukˈoyˈaty. Biiblyë duˈun tkäjpxwijy ja yetyëjk kasäädëty: “Mtsoktëp yëˈë mˈuˈunk mnëdoˈoxyëty o mgujëën mgudëjkëty” (Éfesʉ 5:25). Ja yetyëjk mëdiˈibë tsyojkypy ja kyudëjk, yajnigëxëˈkypy jyënoty tyëgoty ets mayjyaˈay wyindum. Yˈijxˈijty kyuentëˈäjtypy, myoopy tijaty yajtëgoyˈajtypy ets yajnayjyäˈäwëp agujk jotkujk (1 Timotee 5:8). Per mëdiˈibë mas jëjpˈam tyuumpy, yëˈë ko tpudëkë ja kyudëjk ets niˈigyë Jyobaa tmëwingonët (Matewʉ 4:4). Extëm ko mëët nyuˈkxtaˈaky ets tkäjpxtë Biiblyë. Pën ja yetyëjk yˈijxˈijty kyuentëˈäjtypy tsuj yajxon ja kyudëjk, ta oy yˈity mëdë Jyobaa (käjpxë 1 Peedrʉ 3:7).

2. ¿Wiˈixë Biiblyë tkäjpxwijy ja toxytyëjk kasäädë?

Biiblyë jyënaˈany: “Es yëˈë kasäädë toxytyëjk twintsëˈëgëdët yëˈë nyaˈay o myëmëjjäˈäy” (Éfesʉ 5:33). ¿Wiˈix mbäät duˈun ttuny? Ko tpawinmayët wiˈix jantsy oy jyaˈayˈaty ja myëmëjjäˈäy ets nuˈunën ttunyë mëjääw parë yˈijxˈity kyuentëˈatyëty mët ja yˈuˈunk yˈënäˈk. Wyingutsëˈkëbë nety nanduˈun ko tkupëkët wiˈix tijaty ttunäˈäny, ko tsuj yajxon tmëˈˈëw tmëgäjpxët ets ko kyaj axëëk tnimaytyäˈägët, oyxyëp ja myëmëjjäˈäy kyaDiosmëduumbë.

3. ¿Ti mbäädë kasäädë jäˈäy ttundë parë kyopkpëkët ja tsyënäˈäy jyukyˈäjtën?

Biiblyë nyigajpxypy wiˈix mbäät yˈittë ja kasäädë jäˈäy, jyënaˈany: “Es dëˈën nimajtsk yˈittët tiˈigyë” (Matewʉ 19:5). Yäˈädë yëˈë yˈandijpy ko tsojkëp tjëjpkudijëdët tijaty mbäät yajnaywyäˈkxëdë. Pääty, tsojkëp nimajtsk dyajnaxtëdë tiempë, nyaytyukmëtmaytyäˈägëdët tsuj yajxon wiˈix wyinmayë ets wiˈix nyayjyawëdë. Mä kyasäädëˈattë, yëˈëyë mbäät dyajtëkëdë Jyobaa, ja kyudëjk o ja myëmëjjäˈäy ets kyaj pënë wiinkpë. Mëk mbäät nyaygyuentëˈatëdë këdiibë pën niˈigyë ttimymyëwingonët.

 AK NIJAWË NIˈIGYË

4. Yetyëjk kasäädë, tsok ja mgudëjk ets ijxˈit kuentëˈat

5. Toxytyëjk kasäädë, tsok ja mmëmëjjäˈäy ets wingutsëˈëgë

Biiblyë duˈun tkäjpxwijy ja toxytyëjk kasäädë ets twingutsëˈëgët ja myëmëjjäˈäy oy tmëduny tkamëdunyë Jyobaa. Käjpxtë 1 Peedrʉ 3:1, 2 ets nimaytyäˈäktë mëdiˈibë yä yajtëëpy:

• Pën ja mmëmëjjäˈäy kyaj tmëdunyë Jyobaa, seguurë ko mjatsojkypy ets tmëdunët. Per wiˈix mˈokwinmay, ¿tidaa niˈigyë pudëkëdëp: ko xënaxy xytyukmëtmaytyäˈägët ja Diosë yˈayuk o ko xywyingutsëˈëgët ets xytyukˈixët ja mˈoyjyot mˈoywyinmäˈäny? ¿Ets tiko duˈun mwinmay?

Kasäädë jäˈäy tsojkëp nimajtsk ttukniwitsëdët tijaty tyunandëp. Per pën ja toxytyëjk kyaj näˈäty tˈoymyëdoy ti ja myëmëjjäˈäy tyunaampy, oy ko tsuj yajxon tˈanëëmët wiˈix wyinmay ets mëdë  mayˈäjt wintsëˈkën. Oy ko nanduˈun tjamyatsët ko Jyobaa yëˈë të ttuknipëky ja yetyëjk ets tˈixët wiˈix tijaty ttunäˈäny duˈun extëm mbäät ja fyamilyë ttukˈoyˈaty. Pääty, oy ko ja toxytyëjk tpudëkët ja myëmëjjäˈäy, duˈuntsoow ja fyamilyë yajpäädët agujk jotkujk. Käjpxtë 1 Peedrʉ 3:3-5 ets nimaytyäˈäktë mëdiˈibë yä yajtëëpy:

• ¿Wiˈixë Jyobaa nyayjyawëty ko tˈixy ja toxytyëjk twingutsëˈëgë myëmëjjäˈäy?

6. Mbäät xywyinguwäˈägëdë ja amay jotmay

 TI TË NJÄJTËM

Kasäädë jäˈäy mbäät agujk jotkujk tsyëënëdë pën naytsyojkëdëp, naywyingutsëˈkëdëp ets pën kyuytyuundëp ja käjpxwijën mëdiˈibë yajpatp mä Biiblyë.

Ajamyatsë

• ¿Ti mbäät ttuny ja yetyëjk parë agujk jotkujk kyasäädëˈattët?

• ¿Ti mbäät ttuny ja toxytyëjk parë agujk jotkujk kyasäädëˈattët?

• Pën mijts mgasäädëˈäjtp, ¿mëdiˈibë Biiblyë kyäjpxwijënë mbäät mbudëkëty parë kyopkpëkët ja mtsënäˈäy mjukyˈäjtën?