Jyobaa tsyojkypy etsë tääk teety tkuentëˈattët yajxon ja yˈuˈunk yˈënäˈk mët ko yëˈë të ttukumaytyë. Pääty tmoˈoyë ëwij käjpxwijënë wiˈix mbäät dyajˈyaak dyajpattë. Myoopy nanduˈunë ëwij käjpxwijënë ja uˈunk ënäˈk parë yˈittët jotkujk tuk familyë.

1. ¿Ti käjpxwijënë myoobyë Jyobaa ja tääk teety?

Jyobaa tsyojkypy etsë tääk teety ttsoktët ja yˈuˈunk yˈënäˈk, dyajnaxtët mëdë tiempë, tkuentëˈattët këdiibë ti ayoˈon tpäättët ets tˈëwij tkäjpxwijtët extëmë Biiblyë jyënaˈany (Proverbios 1:8). Diosë yˈAyuk yˈanmaapy pënaty nyigëbäjkˈäjttëbë fyamilyë ets ja yˈuˈunk yˈënäˈk “dyajˈyaak dyajpatët mä Jyobaa […] yˈëwij kyäjpxwijën” (käjpxë Efesios 6:4, TNM). Jyobaa jantsy jotkujk nyayjyawëty ko ja tääk teety dyajˈyaak dyajpattë yˈuˈunk yˈënäˈk extëm yëˈë tnëˈëmoˈoy ttuˈumoˈoy ets kyaj ttukmënikaagëdë wiink jäˈäy mëdiˈibë kyaj pyäädëdë.

2. ¿Ti käjpxwijënë Jyobaa myoopy ja uˈunk ënäˈk?

Jyobaa duˈun tˈanëëmë ja uˈunk ënäˈk: “Mëmëdowdë ja mdääk mdeety” (käjpxë Kolosʉ 3:20). Pääty ko tmëmëdowdë tyääk tyeety ets twingutsëˈëgëdë, agujk jotkujk dyajnayjyawëdë ets nanduˈunë Jyobaa (Proverbios 23:22-25). Jesus ojts tpëjktaˈagyë oybyë ijxpajtën, pes ko myutskˈäjty myëmëdoow ja tyääk tyeety ets wyingutsëˈkë oyë nety pokyjyaˈay yajpäättë (Lukʉs 2:51, 52).

3. ¿Ti mbäät ttundë ja familyë parë tmëwingondëdë Jyobaa?

Pën jamë mˈuˈunk mˈënäˈk, seguurë ko mtsojkypy ets nanduˈun ttsoktëdë Jyobaa extëmë miitsëty xytsyoktë. Per ¿ti mbäät xytyundë? Ko xypyanëjkxtëdë yäˈädë käjpxwijën mëdiˈibë yajkypyë Biiblyë: “Tsojkëp janääm jatsojk xynyikäjpxëmbitët [ja Jyobaa yˈääw yˈayuk] mä mˈuˈunk mˈënäˈk ets xytyukmëtmaytyäˈägët ko mˈuˈuny mtsëënët mjënoty mdëgoty ets ko mduˈuyeˈeyët nëˈääy tuˈääy” (Deuteronomio 6:7). Tääk teety nyijäˈäwëdëp ko parë yˈuˈunk yˈënäˈk tjamyatstët tijaty tyukˈaneˈempy, tsojkëp tnikäjpxëmbittët kanäkˈok. Pääty mëdiˈibë yäˈädë tekstë myaytyäˈägaampy, yëˈë ko tsojkëp xyˈixët näˈäjaty mbäät xytyukmëtmaytyaˈagyë mˈuˈunk mˈënäˈk ja Jyobaa yˈayuk mä mëët mxëëwnaxtë. Oy ko nanduˈun xyajnibäädëdët sëmään sëmään parë mDiosˈawdattët tuk familyë. Ets pën mijts kyaj mˈuˈunk mˈënäˈk, mbudëkëyanëp nanduˈun mëjwiin kajaa ko xyˈëxpëkëdë Biiblyë sëmään sëmään.

 AK NIJAWË NIˈIGYË

 6. Wingutsëˈëgë ja mdääk mdeety

 TI TË NJÄJTËM

Jyobaa tsyojkypy etsë tääk teety ttsoktët ja yˈuˈunk yˈënäˈk, tˈëwij tkäjpxwijtët ets tˈijxˈit tkuentëˈattët; ets ja uˈunk ënäˈk twingutsëˈëgëdët ja tyääk tyeety ets tmëmëdowdët. Duˈun tˈawdattëdë Jyobaa tuk familyë.

Ajamyatsë

• ¿Wiˈix mbäädë tääk teety tˈëwij tkäjpxwijtë yˈuˈunk yˈënäˈk ets tˈijxˈit tkuentëˈattë?

• ¿Wiˈix mbäädë uˈunk ënäˈk twingutsëˈëgëdë ja tyääk tyeety?

• ¿Wiˈix ttukˈoyˈattë ja familyë ko tjuuttë tiempë sëmään sëmään parë Diosˈawdattë?