Mä näägë lugäär, duˈunë jäˈäy wyinmääytyë ko net jyotkujkˈatët pën pëjktëp. Per kyaj niˈamukë jäˈäy mëdiˈibë të pyëktë yˈagujkˈat jyotkujkˈattë ets mëdiˈibë naytyuˈukˈäjtp kyaj nanduˈun niˈamukë yajpäättë mon tuk. Biiblyë jyënaˈany ko ak oy, duˈun ko jäˈäy nyaytyuˈukˈaty ets ko kyasäädëˈaty.

1. ¿Wiˈixë jäˈäy ttukˈoyˈaty ko nyaytyuˈukˈaty?

Biiblyë jyënaˈany: ‘Pën të [pyeky] extëmë ënaty të ttuknibëjktäägën oy jëduˈun; ets pën käˈäp të [pyeky] waanë oy ënaty tii ttuny’ (käjpxë 1 Corintios 7:​32, 33, 38, TY). ¿Ti myaytyäˈägaampy ko jyënaˈany ko pënaty kyaj pyëktë ‘waanë oy ënaty tii ttuny’? Tuˈugë Diosmëduumbë mëdiˈibë naytyuˈukˈäjtp kyaj jyotmaytyunyëty wiˈix tˈokˈyajjotkujkˈatët ja myëmëjjäˈäy o ja kyudëjk, pes awäˈätstum yajpääty. Pääty mbäät mas niˈigyë dyajmëjwindëkë Diosë tyuunk, extëm ko nyëjkxët wiink lugäär ëwäˈkx käjpxwäˈkxpë. Ets ja tuk pëky, yëˈë ko naytyuˈuktëjk myëdäjttëp niˈigyë tiempë parë tmëwingondëdë Jyobaa.

2. ¿Wiˈixë jäˈäy ttukˈoyˈaty ko kyasäädëˈaty?

Ko jäˈäy kyasäädëˈaty tyukˈoyˈajtypy nanduˈun. Pesë Biiblyë jyënaˈany ko “niˈigyë yˈoyëty nimajtsk ets kyaj dyuˈunëty naytyuˈuk” (Eclesiastés 4:9). Ets jantsy duˈun, per net ko ja kasäädë jäˈäy tpadundë ja ëwij käjpxwijën mëdiˈibë miimp mä Biiblyë. Ko jäˈäy syëbilpëky, ta nyaytyukwandäˈägëdë ko xëmë nyaytsyokäˈänëdë, nyaywyingutsëˈëgëyäˈänëdë ets nyaygyuentëˈatäˈänëdë. Pääty niˈigyë kyopkpëky ja tsyënäˈäy jyukyˈäjtën këdiinëm ja jäˈäy mëdiˈibë duˈunyë tsënääytyëp ets ja yˈuˈunk yˈënäˈk agujk jotkujk nanduˈun yaak pyattë.

3. ¿Wiˈixë Jyobaa tˈixyë pëjk ukën?

Ko Jyobaa dyajpëjky ja tim jawyiimbë naxwinyëdë jäˈäy, duˈun jyënany: “Ta yëˈë yeˈeytyëjk tˈixmäjtsnëty yëˈë tyeety ets yëˈë tyääk ets tpuwäˈägëty yëˈë tyoˈoxytyëjk [o kyudëjk]” (Génesis 2:​24, MNM). Jyobaa tsyojkypy etsë kasäädë jäˈäy nyaytsyokëdët ets tuˈugyë yˈittët nuˈun ja xyëëw jyukyˈäjtënëty. Jaayë dyajnigutukë yaˈˈajääywyäˈkxtët ko niduˈuk pyokytyuny mëdë wiinkpë. Ja mëdiˈibë të yajmëdëgoy, yëˈë mbäät tˈixy pën yaˈˈajääywyäˈkxäämp o pën kyaj (Matewʉ 19:9). a Jyobaa kyaj tkupëky ets pënaty mëduunëp tpëkët kanäägë toxytyëjk o yetyëjk (1 Timotee 3:2).

 AK NIJAWË NIˈIGYË

5. Winˈix yajxon pën mbëkaampy

Yajxon mbäät xywyinˈixy pën mbëkaampy. Käjpxtë Matewʉ 19:​4-6, 9 ets nimaytyäˈäktë mëdiˈibë yä yajtëëpy:

• Mä tuˈugë Diosmëduumbë kyapëkynyëm, ¿tiko jyëjpˈamëty ets yajxon twinmayët?

Biiblyë mbudëkëyanëp parë xynyijawët wiˈix mbäät jyaˈayˈaty ja mixy o ja kiixy mëdiˈibë mbëkaampy. Per mëdiˈibë niˈigyë mbäät xyˈixy, yëˈë pën tsyojkypyë Jyobaa. b Käjpxtë 1 Korintʉ 7:​39 etsë 2 Korintʉ 6:​14, ta net xynyimaytyäˈäktët mëdiˈibë yä yajtëëpy:

• Pën tuˈugë Diosmëduumbë pëkäämp, ¿tiko jyëjpˈamëty ets yëˈëyë tpëkët ja mëdiˈibë nanduˈun Diosmëduump?

• Pën yëˈë pyejkypy mëdiˈibë kyaj ttsokyë Jyobaa, ¿wiˈixëdaa nëjkx dyajnayjyawëty?

 6. Ix ja pëjk ukën extëmë Jyobaa tˈixy

Nääk ja israelitëty ojts yaˈˈajääywyäˈkxtë mët ja kyudëjk mët ko tpëjktë ja wiink toxytyëjk. Käjpxtë Malaquías 2:​13, 14, 16 ets nimaytyäˈäktë mëdiˈibë yä yajtëëpy:

• ¿Tiko Jyobaa kyaj tˈoyˈixy ko kasäädë jäˈäy nëgoogyëjxm yaˈˈajääywyäˈkxtë ets kyaj mët ko niduˈuk të tyëgoy mëdë wiinkpë?

Ixtë BIDEO ets nimaytyäˈäktë mëdiˈibë yä yajtëëpy:

• Pën mijts yëˈë mëët mgasäädëˈaty tuˈugë jäˈäy mëdiˈibë kyaj ttsokyë Jyobaa, ¿ti mbäät xytyuny parë mˈitët jotkujk?

7. Mmëmëdow ja anaˈamën mëdiˈibë Jyobaa të tpëjktaˈaky parë kasäädë jäˈäy

 TI TË NJÄJTËM

Ko jäˈäy nyaytyuˈukˈaty o kyasäädëˈaty, yëˈë Jyobaa kyumäˈäyën. Ets mbäät agujk jotkujk nyajpatëm pën nduˈunëm tijaty extëmë Dios ttsoky.

Ajamyatsë

• ¿Tijaty mbäät niˈigyë ttundë pënaty naytyuˈukˈäjttëp?

• ¿Tiko Biiblyë jyënaˈany ko tuˈugë Diosmëduumbë yëˈë mbäät tpëky ja mëdiˈibë nanduˈun Diosmëduump?

• ¿Näˈä jeˈeyë Biiblyë dyajnigutukë etsë kasäädë jäˈäy yaˈˈajääywyäˈkxtët?