LEKSION 16
¿Ti Jesus tyuun ko yˈijty yä Naxwiiny?
Mayë jäˈäy nyijäˈäwëdëp pënën Jesus, per yëˈëyë jyamyajtstëp wiˈix myaxuˈunkˈäjty ets wiˈix jyantsy yˈayooy ko yajkëxwojpy kepykyëjxy. Nääk nyijäˈäwëdëp nanduˈun ko wijy yˈijty. Per ¿këdii mbäät mas niˈigyë nˈixyˈäjtëm ko nnijäˈäwëm wiˈix jyukyˈajty yä Naxwiiny? Mä yäˈädë leksion nnijawëyäˈänëm tijatyë Jesus tyuun ets wiˈix mbäät xypyudëjkëm.
1. ¿Ti tuungë Jesus mas jëjpˈam pyëjktak?
Ja tuungë mas jëjpˈambë mëdiˈibë Jesus tyuun, yëˈë ko ojts tkäjpxwaˈkxy “ja oybyë ayuk diˈibë nyigajxypy ja Diosë kyutujkën” (käjpxë Lukʉs 4:43). Ja oybyë ayuk mëdiˈibë yˈëwäˈkx kyäjpxwäˈkx, yëˈë ko Dios tpëjktäˈägäˈäny tuˈugë gobiernë jam tsäjpotm mëdiˈibë yaˈoyëyaampy tukëˈëyë amay jotmay mëdiˈibë pyatypyë naxwinyëdë jäˈäy. a Tëgëk jëmëjt ja kujkmë Jesus dyajtuuny aduˈugë xyëëw tiempë parë tnimaytyaky ja oybyë ayuk (Matewʉ 9:35).
2. ¿Tiko Jesus ttuunyë miläägrë?
Biiblyë jyënaˈany ko Dios “Jesuskyëjxm ttuuny ja mëjˈäjtën, ijxwëˈëmën es diˈibë jäˈäy dëˈënyë mëët [wyëˈëmëtyaaytyë]” (Apostʉlʉty o Hechos 2:22). Extëm jyënaˈanyë yäˈädë tekstë, Dios yëˈë myooyë mëjääw ja Jesus parë dyajnäjxyë mëk tuu mëk poj, dyajkääy dyaˈuky milˈamë jäˈäy, dyaˈˈagëdakyë päˈäm jäˈäy ets axtë dyajjukypyejkyë oˈkpë (Matewʉ 8:23-27; 14:15-21; Markʉs 6:56; Lukʉs 7:11-17). Ja miläägrë mëdiˈibë Jesus tyuun, yëˈë yajnigëxëˈk ko Diosë nety të kyexyëty ets ko yëˈë myëdäjtypyë mëjääw parë dyaˈoˈoyëtyaˈayët ja nˈamayˈäjt njotmayˈäjtëm.
3. ¿Ti xytyukniˈˈijxëm extëmë Jesus jyukyˈajty yä Naxwiiny?
Jesus xëmë tmëmëdooyë Tyeety, Jyobaa (käjpxë Fwank 8:29). Tyuundääy tijaty tukˈanaˈamë, oy nuˈun yajtukmëtsipˈäjty axtë ko yˈoˈky tyëgooy. Jesus yajnigëxëˈk ko ëtsäjtëm mbäädë Dios nmëduˈunëm oy nuˈunë amay jotmay nbatëm. Duˈuntsoo ojts xymyoˈoyëm “tuˈugë ijxpajtën es nbaduˈunëm yëˈë” (1 Peedrʉ 2:21).
AK NIJAWË NIˈIGYË
Min nˈokˈijxëm wiˈixë Jesus ojts tkäjpxwaˈkxy ja oybyë ayuk ets ttuunyë miläägrë.
4. Jesus kyäjpxwäˈkx ja oybyë ayuk
Jesus tekyyeˈepy jyëdijty jagambäät parë ttukmëtmaytyakyë jäˈäy ja oybyë ayuk nääk ttimypyaty. Käjpxtë Lukʉs 8:1 ets nimaytyäˈäktë mëdiˈibë yä yajtëëpy:
-
¿Yëˈëyëdaa Jesus myëtmaytyak ja jäˈäy mëdiˈibë nimiinëdë?
-
¿Ti Jesus tyuun parë tpatyë jäˈäy?
Dios duˈunë nety të tnigajpxy ko ja Mesías tkäjpxwäˈkxäˈäny ja oybyë ayuk. Käjpxtë Isaías 61:1, 2 ets nimaytyäˈäktë mëdiˈibë yä yajtëëpy:
-
¿Wiˈixë Jesus dyaˈˈadëëyë yäˈädë tekstë?
-
¿Yajtëgoyˈajtypyëdaa tyamë naxwinyëdë jäˈäy parë tmëdowëdë yäˈädë oybyë ayuk?
5. Jesus yäjkë oybyë ëwij käjpxwijën
Jesus kyaj jeˈeyë ojts tˈëwaˈkxy tkäjpxwaˈkxy ja oybyë ayuk, yäjkën nanduˈun ja oybyë ëwij käjpxwijën. Min nˈokˈijxëm tuˈuk majtskë yäˈädë käjpxwijën mëdiˈibë yäjk mä tuˈugë kopk. Käjpxtë Matewʉ 6:14, 34 etsë 7:12, ets nimaytyäˈäktë mëdiˈibë yä yajtëëpy:
-
Extëm jyënaˈanyë yäˈädë tekstë, ¿ti ëwij käjpxwijënë yäjkë Jesus?
-
Wiˈix mˈokwinmay, ¿mbäädëdaa yäˈädë ëwij käjpxwijën xypyudëjkëm tyam?
6. Jesus tyuunë miläägrë
Jyobaa yëˈë myëjääwmooyë Jesus ets ttunëdë miläägrë. Parë xynyijawët tuˈugë miläägrë mëdiˈibë tyuun, käjpxtë Markʉs 5:25-34 o ixtë BIDEO. Ta net xynyimaytyäˈäktët mëdiˈibë yä yajtëëpy:
-
Extëm të xyˈixy mä bideo, ¿ti nety jyantsy myëbëjkypy ja toxytyëjk mëdiˈibë pëjkëp?
-
Ko duˈunë Jesus ttuuny ja miläägrë, ¿ti mëjˈixy mëjmëdoy mjäˈäwëp?
Käjpxtë Fwank 5:36 ets nimaytyäˈäktë mëdiˈibë yä yajtëëpy:
-
¿Ti yajnigëxëˈk ja miläägrë mëdiˈibë Jesus tyuun?
¿Mnijäˈäwëbë nety?
Jesus jap yajnimaytyaˈaky mä Mateo, Marcos, Lucas etsë Juan. Pënatyë yäˈädë liibrë jyaaytyë, wiˈixëm ojts tnimaytyäˈäktë Jesus. Pääty ko ngäjpxëm, ta yajxon njaygyujkëm wiˈix jyukyˈajty.
-
MATEO
yëˈë jyaay ja myëduˈukpë liibrë ets yëˈë niˈigyë kyujäˈäyë tijatyë Jesus tukniˈˈijxë, extëm ko tnimaytyaky ja Diosë kyutujkën o gyobiernë.
-
MARCOS
yëˈë jyaay ja liibrë mëdiˈibë mas kon ets yëˈë nyimaytyakypy tijaty tuun jäjtë.
-
LUCAS
yëˈë nyimaytyakypy ko jëjpˈam nnuˈkxtakëm ets ko Jesus myëjˈijx myëjpëjktak ja toxytyëjkjäˈäyëty.
-
JUAN
yëˈë nyimaytyakypy wiˈixë Jesus jyaˈayˈajty, pes kanäkˈok tkujäˈäyë wiˈix ojts kyajpxy myaytyaˈaky mët ja myëtnaymyaayëbëty ets nanduˈun mët ja wiink jäˈäy.
NÄÄGË JÄˈÄY JYËNÄˈÄNDË: “Jesus, yëˈë Dios”.
-
¿Wiˈix mijts mˈokwinmay?
TI TË NJÄJTËM
Jesus yˈëwäˈkx kyäjpxwäˈkx ja Diosë gyobiernë, tyuunë miläägrë ets xëmë tmëmëdooyë Jyobaa.
Ajamyatsë
-
Ko Jesus jyukyˈajty yä Naxwiiny, ¿ti tuunk mas jëjpˈam pyëjktak?
-
¿Ti Jesus yajnigëxëˈk ko ttuunyë miläägrë?
-
¿Tijaty ëwij käjpxwijën yäjkë Jesus?
AK PAYEˈEY
¿Ti mas niˈigyë Jesus nyimaytyak?
“¿Tiko Jesus jëjpˈam tpëjtaˈagyë Diosë yˈAnaˈam Kyutujkën?” (Diˈib Xytyukˈawäˈänëm, nobiembrë-disiembrë 2014)
Nijawë tiko mbäät nˈijtëm seguurë ko jantsy tuun jantsy jäjtë ja miläägrë mëdiˈibë Jesus tyuun.
“Ko Jesus ttuunyë miläägrë, ¿ti xytyukniˈˈijxëm?” (Diˈib Xytyukˈawäˈänëm, 15 äämbë julië 2004)
Ix wiˈix tuˈugë yetyëjk dyajtëgäjtsyë jyukyˈäjtënë ko tnijäˈäwë wiˈixë Jesus ojts tmëmay tmëdäjˈyë jäˈäy.
“Këˈëmëts naymyëmääy naymyëdäjë” (Diˈib Xytyukˈawäˈänëm, nobiembrë-disiembrë 2014)
Ix tijaty tuun jäjtë ko Jesus jyukyˈajty yä Naxwiiny.
“Tijaty tuun jäjtë ko Jesus jyukyˈajty yä Naxwiiny” (Naybyudëkë parë nˈëxpëjkëmë Diosë yˈAyuk, pajina 18)
a Mä leksion 31 axtë 33, jap niˈigyë yajnimaytyaˈagyë yäˈädë gobiernë.
You May Also Like
DIˈIB XËMË NAYAJTËËWËDËP
¿Wiˈixë Jyobaa tyestiigëty dyaˈëxpëktë jäˈäy?
Ko mˈëxpëkët mëdë Jyobaa tyestiigëty namayˈäjtën, mbäät xyajtunyë Biiblyë mëdiˈibë mdimytsyojkënyëˈajtypy. Mbäät nanduˈun xywyoy pënaty mdimywyowaampy, duˈunë mfamilyë o mëtnaymyaayëbë.
