LEKSION 17

¿Wiˈixë Jesus jyaˈayˈaty?

WINʼIX TI AYUK

Ko nnijäˈäwëm tijatyë Jesus tyuun yä Naxwiiny ets wiˈix ojts kyajpxy myaytyaˈaky, ta nˈixyˈäjtëm wiˈix jyaˈayˈaty ets mbäädë net nmëwingoˈonëm mëdë Tyeety, Jyobaa Dios. ¿Wiˈixë Jesus jyaˈayˈajty? ¿Ets wiˈix mbäät nanduˈun njäˈäyˈäjtëm?

1. ¿Wiˈixë Jesus tnaxyë Tyeety?

Nuˈunë Jesus jyukyˈajty kanäk miyonk jëmëjt jam tsäjpotm, ojts tˈixy wiˈixë Tyeety jyaˈayˈaty ets wiˈix tijaty ttuny (käjpxë Fwank 5:19). Pääty nanduˈun wyinmääy, jyaˈayˈajty ets duˈun tijaty ttuuny extëmë Tyeety. Jesus duˈunën meerë jyaˈayˈajty extëmë Tyeety, pääty jyënany: “Diˈibëts ëj xyˈixyˈäjtp, yˈixyˈajtypy nandëˈën ja Dios Teety” (Fwank 14:9). Pën mijts mˈixyˈajtypy yajxonë Jesus, ta xyˈixyˈatäˈäny yajxonë Jyobaa. Extëm nˈokpëjktakëm, ko nˈijxëm wiˈixë Jesus tpaˈˈayooyë jäˈäy, yëˈë xytyukˈijxëm ko Jyobaa nanduˈun xypyaˈˈayoˈowëm.

2. ¿Wiˈixë Jesus dyajnigëxëˈky ko tsyojkypyë Tyeety?

Jesus jyënany: “Es tnijawëdët ja naxwinyëdë jäˈäyëty ko ëj ja nDeetyëts ntsejpyëts es nguytyiimbyëts diˈibëts yëˈë xytyukˈanaˈamp” (Fwank 14:31). Ko Jesus jyukyˈajty yä Naxwiiny, ojts dyajnigëxëˈëky ko mëk ja Tyeety tjantsy tsyoky. ¿Wiˈix ojts dyajnigëxëˈëky? Ko tmëmëdooy oy dyajnäjxyë amay jotmayë mëjwiin kajaabë, ko ojts tnigajpxy tnimaytyaˈaky ets ko tpudëjkë jäˈäy parë yajmëwingonët ja Tyeety (Fwank 14:23).

3. ¿Wiˈixë Jesus të dyajnigëxëˈëky ko tsyojkypyë jäˈäy?

Biiblyë jyënaˈany ko Jesus mëk ttsoky “yëˈë naxwinyëdë jäˈäy” (Proverbios 8:31). Ets ojts dyajnigëxëˈëgyë yäˈädë tsojkën ko tjotkujkmooy ja jäˈäy ets ko tpudëjkë namayˈäjtën. Tyuun nanduˈun ja miläägrë mëdiˈibë yajnigëxëˈk ko myëdäjtypyë mëjääw ets ko pyaˈˈayoobyë jäˈäy (Markʉs 1:40-42). Ajëëky amëguˈuk jyaˈayˈajty mët niˈamukë jäˈäy ets nituˈuk jagam jëxkëˈëm ojts tkapëjktaˈaky. Pënaty ojts tmëdoowˈˈijtëdë ja Jesusë yˈääw yˈayuk, mëjwiin kajaa jyotkujkmooyëdë. Jesus mëk ttsojkyë naxwinyëdë jäˈäy, ojts tkuˈayowë ets axtë kyuˈoˈkë. Per pënaty mas niˈigyë tsyojkypy, yëˈë mëdiˈibë kyuytyuumpy tijaty yëˈë tukniˈˈijxëp (käjpxë Fwank 15:13, 14).

AK NIJAWË NIˈIGYË

Min nˈagaknijäˈäwëm wiˈixë Jesus jyaˈayˈajty ets wiˈix mbäät ëtsäjtëm nyajnigëxëˈkëm ja tsojkën ets nˈijtëm oyjyaˈay.

4. Jesus tsyojkypyë Tyeety

Jesus pyëjktakë ijxpajtën wiˈix mbäät ndukˈijxëmë Dios ko ntsojkëm. Käjpxtë Lukʉs 6:12 mëdë Fwank 15:10 etsë 17:26. Ko xykyäjpxtäˈäytyëdë yäˈädë tekstë, ta xynyimaytyäˈäktët mëdiˈibë yä yajtëëpy:

¿Wiˈix mbäät ndukˈijxëmë Jyobaa ko ntsojkëm extëmë Jesus ttuuny?

Jesus mëk ttsojkyë Tyeety ets janääm jatsojk tmënuˈkxtaky.

5. Jesus ojts tmëmay tmëdäjˈyë jäˈäy

Jesus mas niˈigyë jäˈäy ojts tmëmay tmëdäjy këdiinëm yëˈë duˈun ojts nyaymyëmay nyaymyëdäjˈyëty. Yajtuunë xyëëw tiempë etsë jyot myëjääw parë tpudëjkë jäˈäy oyë nety jyaˈˈanuˈkxë. Käjpxtë Markʉs 6:30-44 ets nimaytyäˈäktë mëdiˈibë yä yajtëëpy:

Extëm jyënaˈanyë yäˈädë tekstë, ¿wiˈixë Jesus ojts dyajnigëxëˈëky ko myëmääy myëdäjë jäˈäy? (Ixtë bersikulo 31, 34, 41 etsë 42).
¿Tiko Jesus tpudëjkë jäˈäy? (Ixtë bersikulo 34).
Komë Jesus duˈun jyaˈayˈajty extëmë Tyeety, ¿wiˈixë net mˈokwinmay jyaˈayˈatyë Jyobaa?
¿Wiˈix mbäät nanduˈun nmëmäˈäy nmëdäjëmë wiink jäˈäy extëmë Jesus?

6. Jesus ijt oyjyaˈay

Oyë netyë Jesus mëjwiin kajaa ti tkamëdaty, ijt oyjyaˈay ets ojts jyënaˈany parë nanduˈun njäˈäyˈäjtëm. Käjpxtë Apostʉlʉty o Hechos 20:35 ets nimaytyäˈäktë mëdiˈibë yä yajtëëpy:

Extëmë Jesus jyënany, ¿ti mbäät xyajnayjyäˈäwëm agujk jotkujk?

Ixtë BIDEO ets nimaytyäˈäktë mëdiˈibë yä yajtëëpy:

BIDEO: “Niˈigyë nnayjyäˈäwëm jotkujk ko nyäjkëm ets kyaj ko nˈaxäjëm” (jeˈeyë tuk pëky yaˈixy) (4:00)

¿Wiˈix mbäät nˈijtëm oyjyaˈay oy nëgoo ti ngamëdäjtëm?

¿Mnijäˈäwëbë nety?

Biiblyë jyënaˈany ko tsojkëp nmënuˈkxtakëmë Jyobaa xyëëwgyëjxmë Jesus (käjpxtë Fwank 16:23, 24). Ko duˈun nduˈunëm, yëˈë nety nmëjjäˈäwëm ko Jesus të dyaˈˈawatsy ja nëˈë tuˈu parë mbäät nmëwingoˈonëmë Jyobaa.

NÄÄGË JÄˈÄY JYËNÄˈÄNDË: “Dios yëˈë yaˈˈayoobyë naxwinyëdë jäˈäy”.