LEKSION 21
¿Wiˈix tyam yaˈëwaˈkxy yajkäjpxwaˈkxy ja oybyë ayuk?
Tim tsojkë Jyobaa dyajjëjptëgoyaˈanyë amay jotmay mëdiˈibë tyam jaˈäjtp, ets yëˈë yajtunaampy ja gyobiernë. ¡Jantsy oyë yäˈädë oybyë ääw ayuk ets tsojkëp niˈamukë jäˈäy tnijawëdët! Jesus ojts ttukˈaneˈemy ja yˈëxpëjkpëty ets tkäjpxwäˈkxtët abëtsëmy nyaxwinyëdë (Matewʉ 28:19, 20). ¿Wiˈix tyamë Jyobaa tyestiigëty tmëmëdowdë mëdiˈibë Jesus ojts tniˈanaˈamë?
1. ¿Wiˈix tyam yˈadëyë Matewʉ 24:14?
Jesus duˈun ojts tnaskäjpxë: “Tyäˈädë oybyë ayuk diˈibë nyimaytyakypy ja tsäjpotmëdë kutujkën yajkäjxwäˈxäämp es yajknijawët mä tëgekyë naxwinyëdë” (Matewʉ 24:14). Jyobaa tyestiigëty agujk jotkujk nnayjyawëdë ko tkäjpxwäˈkxtë yäˈädë oybyë ayuk. Abëtsëmy nyaxwinyëdë ja yajkäjpxwaˈkxy naxy tuk mil ayuk. Kom mëjwiin kajaajë yäˈädë tuunk, pääty tsojkëp ja xëëw tiempë, jot mëjääw ets tsojkëp yajxon yajtukniwitsët. Per mbäät duˈun yajtuny mëdë Jyobaa nyaybyudëkë.
2. ¿Wiˈixëts ndundë parëts niˈamukë jäˈäy ndukmëtmaytyäˈäktë ja oybyë ayuk?
Nmëtmaytyaktëbëtsë jäˈäy oyëts mä ndimypyäättë. Nëjkxtëbëts nanduˈun “tëjkmdëjkm”, duˈun extëm ojts ttundë pënaty tim jawyiin pyanëjkxtë Jesus (Apostʉlʉty o Hechos 5:42). Kots duˈun ndundë, tats miyonkˈamë jäˈäy nmëtmaytyäˈäktë jëmëjt jëmëjt. Per kom kyaj nëgoo jäˈäy yajpäättë mä jyëën tyëjk, tats nnaybyëjktäˈägëdë mä mayë jäˈäy nyaxtë. Xëmëts nˈëxtäˈäytyë winmäˈäny wiˈixëts mbäädë jäˈäy ndukmëtmaytyäˈäktë pënën Jyobaa ets ti tyunaampy.
3. ¿Pënatyën nyikëjxmˈäjttëp ets tkäjpxwäˈkxtët ja oybyë ayuk?
Niˈamukë pënaty jyantsy pyanëjkxtëbë Jesukristë, nyikëjxmˈäjttëp ets tkäjpxwäˈkxtët ja oybyë ayuk. Päätyëts nmëjpëjktäˈäktë yäˈädë tuunk etsëts nˈëwäˈkx ngäjpxwäˈkxtë nuˈunëts nmadäˈäktë, pes nimayë jäˈäy yajpäättë okën jëjpˈam (käjpxë 1 Timotee 4:16). Kyajts nyajmëjuytyë kots duˈun ndundë, pesë Biiblyë jyënaˈany: “Mˈaxäjëdë tyäˈädë mëkˈäjtën nadëˈënyë, nan [këdii] myajmëjuytyë ko dëˈën xytyundët” (Matewʉ 10:7, 8). Ets oy nimayë jäˈäy tkamëdowäˈändë, duˈunyëmëts nˈëwäˈkx ngäjpxwäˈkxtë mët ko duˈunëts nmëdundë Jyobaa etsëts nyajnayjyawëdë agujk jotkujk.
AK NIJAWË NIˈIGYË
Min nˈokˈijxëm tijaty tyuundëbë Jyobaa tyestiigëty parë yˈëwäˈkx kyäjpxwäˈkxtë abëtsëmy nyaxwinyëdë ets wiˈixë Jyobaa pyudëkëdë.
4. Nduundëbëtsë mëjääw parëts niˈamukë jäˈäy nmëtmaytyäˈäktë
Nduundëbëtsë mëjääw parëts ndukninëjkxtë jäˈäy ja oybyë ayuk oy mä yajpäättë. Ixtë BIDEO ets nimaytyäˈäktë mëdiˈibë yä yajtëëpy:
-
¿Ti mas niˈigyë mˈoyˈijxypy extëmë Jyobaa tyestiigëty kyäjpxwäˈkxtë?
Käjpxtë Matewʉ 22:39 etsë Romanʉs 10:13-15, ets nimaytyäˈäktë mëdiˈibë yä yajtëëpy:
-
Kots nˈëwäˈkx ngäjpxwäˈkxtë, ¿wiˈixëts nyajnigëxëˈëktë ko ntsojktëbëtsë jäˈäy?
-
¿Wiˈixë Jyobaa tˈixy pënaty yˈëwäˈkx kyäjpxwäˈkxtëp ja oybyë ayuk? (Ixtë bersikulo 15).
5. Yëˈëts mëdë Dios nduunmuktë
Jyobaa yëˈë yajnëˈëyeˈepy yajtuˈuyeˈebyë yäˈädë tuunk. ¿Tiko duˈun njënäˈänëm? Min nˈokˈijxëm tuˈugë ijxpajtën. Jap Nueva Zelanda, tuˈugë Testiigë mëdiˈibë xyëwˈäjtypy Paul, ojts tsyoony ëwäˈkx käjpxwäˈkxpë ets tpaty tuˈugë toxytyëjkjäˈäy. Mä taabë xëëw, të netyë yäˈädë toxytyëjk tˈanëëmë Jyobaa ko yˈixyˈataampy ets ko waˈan pën tyuknigexyëty. Paul jyënaˈany: “Kyumdëgëk oorë tamëtsë nety të njäˈty mä yäˈädë toxytyëjk tsyëënë”.
Käjpxtë 1 Corintios 3:9, TNM ets nimaytyäˈäktë mëdiˈibë yä yajtëëpy:
-
Extëm të yajnimaytyaˈagyë yäˈädë toxytyëjk, ¿wiˈix xytyukˈijxëm ko Jyobaa yëˈë yajnëˈëyeˈepy yajtuˈuyeˈebyë yäˈädë tuunk?
Käjpxtë Apostʉlʉty 1:8 ets nimaytyäˈäktë mëdiˈibë yä yajtëëpy:
-
¿Tiko nyajtëgoyˈäjtëm etsë Jyobaa xypyudëjkëm parë nˈëwäˈkx ngäjpxwäˈkxëm ja oybyë ayuk?
¿Mnijäˈäwëp?
Kots nduˈukmuktë sëmäänoty, japëts nyajtukniˈˈixëdë wiˈixëts nˈëwäˈkx ngäjpxwäˈkxtët. Pën të mˈoknëjkxpë, ¿wiˈix xyˈokˈixy extëmëts jap nˈëxpëktë?
6. Kots nˈëwäˈkx ngäjpxwäˈkxtë yëˈëts nmëmëdoowdëbë Dios
Pënaty tëëyëp myëtsipˈäjttë ja Jesusë yˈëxpëjkpëty, ojts tjayajtuˈuˈadukäˈändë mä nety yˈëwäˈkx kyäjpxwäˈkxtë. Per ja Jesusë yˈëxpëjkpëty wyinguwäˈkëdë ja kuduunk justisë ets yajmoˈoytyët “ja madakën parë yajkäjpxwäˈkxët ja oybyë ayuk” (Filipenses 1:7, TNM). Tyamë Jyobaa tyestiigëty nanduˈunëts ndundë. a
Käjpxtë Apostʉlʉty 5:27-42 ets nimaytyäˈäktë mëdiˈibë yä yajtëëpy:
-
¿Tiko duˈunyëm nˈëwäˈkxäˈän ngäjpxwäˈkxäˈänëm? (Ixtë bersikulo 29, 38 etsë 39).
MBÄÄT NÄÄGË JÄˈÄY MYAJTËYËTY: “¿Tiko Jyobaa tyestiigëty kyäjpxwäˈkxtë winjëën windëjk?”.
-
¿Wiˈix xyˈatsowët?
TI TË NJÄJTËM
Jesus tyukˈanaˈam ja yˈëxpëjkpëty parë tˈëwäˈkx tkäjpxwäˈkxtët ja oybyë ayuk abëtsëmy nyaxwinyëdë. Jyobaa yëˈë tyam pyudëjkëbë nyax kyäjpn parë duˈun ttundët.
Ajamyatsë
-
¿Wiˈix tyam yaˈëwäˈkx yajkäjpxwaˈkxy ja oybyë ayuk abëtsëmy nyaxwinyëdë?
-
Ko nˈëwäˈkx ngäjpxwäˈkxëm, ¿wiˈix nyajnigëxëˈkëm ko ntsojkëmë jäˈäy?
-
¿Mbäädëdaa xyajnayjyäˈäwëm jotkujk ko nˈëwäˈkx ngäjpxwäˈkxëm? ¿Ets tiko duˈun mwinmay?
AK PAYEˈEY
Ix wiˈixë Jyobaa tyestiigëty yˈëwäˈkx kyäjpxwäˈkxtë siudääjoty.
¿Wiˈixë Jyobaa tyestiigëty ttuknijawëdë ja oybyë ayuk pënaty kaktsoktëp?
Nijawë wiˈix tuˈugë toxytyëjk agujk jotkujk nyayjyawëty ko jyukyˈäjtën të dyajtuny mä Diosë tyuunk.
Agujk jotkujkëts nnayjyawëty kotsë yäˈädë jukyˈäjtën nwinˈijxy (6:29)
Nijawë wiˈix të yajwinguwäˈägë kuduunktëjk mä kutujktakn parë duˈunyëm yajkäjpxwäˈkxët ja oybyë ayuk.
a Dios yëˈë xytyukˈanaˈamëm parë nˈëwäˈkx ngäjpxwäˈkxëm. Pääty, kyaj nyajtëgoyˈäjtëm etsë naxwinyëdë jäˈäy xymyoˈoyëmë permisë mëdiˈibë kutujkënë myëdäjtypy parë ngäjpxwäˈkxëm ja oybyë ayuk.