LEKSION 22
¿Wiˈix mbäät xynyimaytyaˈaky ja oybyë ayuk?
Ko xynyijawë ja tëyˈäjtën mëdiˈibë miimp mä Biiblyë, mbäädë net mjënäˈäny: “¡Njatsojkypyëts ets niˈamukë jäˈäy tnijawëdët!”. Ets jantsy duˈun, niˈamukë mbäädë jäˈäy tnijawëdë. Per mbäät xyjëjptsëˈëk xyjëjpjawë wiˈix xynyimaytyäˈägët tijaty kujk mjäjtypy. Min nˈokˈijxëm ti mbäät mbudëkëty parë xynyimaytyäˈägët ja oybyë ayuk mëdiˈibë myajnayjyawëyanëp agujk jotkujk.
1. ¿Wiˈix mbäät xynyimaytyaˈaky tijaty kujk mjäjtypy?
Ja Jesusë yˈëxpëjkpëty duˈun tëgok jyënandë: ‘Ëëtsëty käˈäp tjëgyepy amonyë nˈitëtyëts ets nganigäjpxtëtyëts mëdiˈibëts të nˈix të nmëdowdën’ (Hechos 4:20, TY). Extëm nˈijxëm, mëjwiin kajaa nety dyajtsobäättë ja tëyˈäjtën mëdiˈibë të tnijawëdë, pääty tyukmëtmaytyäˈägandëbë netyë jäˈäy nääk ttimypyäättë. ¿Nanduˈun mijts mnayjyawëty? Pën duˈun, ëxtääyë winmäˈäny wiˈix mbäät xytyukmëtmaytyaˈaky wintsëˈkën myëët tijaty kujk mjäjtypy ja mjëëky mëguˈuk o ja mëtnaymyaayëbëty (käjpxë Kolosʉ 4:6).
Mbäät duˈun xyajtsondaˈaky ja maytyaˈaky
-
Pën yëˈë mdukmëtmaytyäˈägaambyë Biiblyë mjëëky mmëguˈuk, mbäät duˈun xyˈanëëmë: “¿Mnijawëyaampy tits të njaty mä yäˈädë sëmään?”.
-
Pën tuˈugë mëtnaymyaayëbë pëjkëp o jam ti tmëmay tmëdäjy, tukˈix tuˈugë tekstë mëdiˈibë mbäät jyotkujkmoˈoyëty.
-
Ko myajtëwëdët pënaty mëët mdundë, ti të xytyuny sääbëdë domingë, tukmëtmaytyäˈäk ti të xyjyaty ko të mˈëxpëky o ko të mˈotsy reunyonk.
-
Anëëmë mëtnaymyaayëbëty ko mbäät tyëkëdë mä sitio jw.org.
-
Mbäät pën xywyoy mä mˈëxpëkäˈäny o tukˈawanë wiˈix tˈamdowët mä sitio jw.org ets pën yaˈëxpëkëdët.
2. ¿Tiko yˈoyëty xypyëjktäˈägëdë mwinmäˈäny ets mnëjkxët ëwäˈkx käjpxwäˈkxpë?
Ja Jesusë yˈëxpëjkpëty kyaj yëˈëyë ojts ttukmëtmaytyäˈäktë ja oybyë ayuk pënaty yˈixyˈäjttëp. Ojts nanduˈunë Jesus kyaxëdë “nimajtskatyëty es nyëjxët jawyiin mä tëgekyë käjpn” parë yˈëwäˈkx kyäjpxwäˈkxtët (Lukʉs 10:1). Ko duˈun ttuundë, ta ojts mas nimayë jäˈäy ttuknijawëdë ja oybyë ayuk. Ets jantsy agujk jotkujk nyayjyäˈäwëdë ko ojts nyëjkxtë ëwäˈkx käjpxwäˈkxpë (Lukʉs 10:17). Ets mijts, ¿tiko xykyapëjktaˈagyë mwinmäˈäny ets nanduˈun mnëjkxët ëwäˈkx käjpxwäˈkxpë mëdë nmëguˈukˈäjtëm?
AK NIJAWË NIˈIGYË
Min nˈokˈijxëm ti mbäät mbudëkëty parë kyaj nëgoo mtsëˈëk mjawët ko xynyimaytyäˈägët ja oybyë ayuk ets mnayjyawëdët agujk jotkujk.
3. Jyobaa mbudëkëyanëp
Näägë nmëguˈukˈäjtëm janëjkxandëp ëwäˈkx käjpxwäˈkxpë, per jyëjptsëˈk jyëjpjäˈäwëdëp ko wiˈixë jäˈäy jyënäˈändët o ko tkamëdowäˈändët.
-
Ets mijts, ¿mtsëˈk mjäˈäwëp ko xytyukmëtmaytyaˈagyë jäˈäy tijaty kujk mjäjtypy? ¿Ets tiko?
Ixtë BIDEO ets nimaytyäˈäktë mëdiˈibë yä yajtëëpy:
-
Extëm të nˈijxëm mä bideo, ¿ti tyuundë yäˈädë ënäˈktëjk parë kyaj nyekytsyëˈk nyekyjyäˈäwëdë?
Käjpxtë Isaías 41:10 ets nimaytyäˈäktë mëdiˈibë yä yajtëëpy:
-
¿Tiko mbäät xymyënuˈkxtaˈagyë Jyobaa pën mtsëˈkëp mgäjpxwäˈkxët?
¿Mnijäˈäwëbë nety?
Nimayë Testiigë duˈunë nety wyinmaytyë ko ninäˈä kyajotmëktäˈäktët ets nyëjkxtët ëwäˈkx käjpxwäˈkxpë. Extëmë Sergey, duˈunë nety tjawë ko kyaj pën yajtsobäätyëty ets ko kyaj yˈagäjpx yˈamaytyäˈägëty. Per ok, ta tˈëxpëjktsondakyë Biiblyë, yëˈë jyënaˈany: “Jatsëˈk jajäˈäwëbëtsë nety, per tats njotmëktaky ndukmëtmaytyäˈägëdë jäˈäy tijatyëts njäjtypy. Kyajts ndimwinmääy pën jantsy jotkujkëtsë nety xyajnayjyawëyaˈanyëty kots ngäjpxwäˈkxët ets pën mas niˈigyëts xykyuwëˈëmëyaˈany tijatyëtsë nety nˈëxpëjkypy mä Biiblyë”.
4. Wingutsëˈëgë pënaty mmëtmaytyakypy
Mä pën xykyatukmëtmaytyaˈakynyëm ja oybyë ayuk, kyaj jeˈeyë xywyinmayët tijatyën mdukmëtmaytyäˈägaampy, nanduˈunën xywyinmayët wiˈix xytyukmëtmaytyäˈägäˈäny. Käjpxtë 2 Timotee 2:24 etsë Titʉ 3:2, ets nimaytyäˈäktë mëdiˈibë yä yajtëëpy:
-
Extëmë yäˈädë tekstë jyënaˈany, ¿wiˈix mbäät duˈun xytyuny ko jäˈäy xytyukmëtmaytyäˈägëdë Diosë yˈayuk?
-
Mbäät näägë mjëëky mëguˈuk o mëtnaymyaayëbë kyaj tkupëky tijaty mjatukmëtmaytyakypy. ¿Ti ja mdunëp? ¿Ets ti kyaj mbäät xytyuny?
-
¿Tiko niˈigyë yˈoyëty ko xymyëtkäjpx xymyëtmaytyäˈägët wintsëˈkëny myëët ets kyaj ko mëktaˈaky xyˈanëëmët tijaty myëbëkëp?
5. Agujk jotkujk xyajnayjyäˈäwëm ko nimaytyakëm ja oybyë ayuk
Jyobaa yëˈë tyuknipëjkë Jesus ets tkäjpxwäˈkxët ja oybyë ayuk ko myiiny yä Naxwiiny. ¿Wiˈixë Jesus tˈijxyë yäˈädë tuunk? Käjpxtë Fwank 4:34 ets nimaytyäˈäktë mëdiˈibë yä yajtëëpy:
-
Ko njëˈx nbëjkëm tijaty xyˈoytyuˈunëm, xymyoˈoyëmë jot mëjääw ets xyajmëkˈäjtëm. Pääty, ¿tiko Jesus ojts tˈijxkijpxyë ko nduˈunëmë Diosë tyuunk extëm ko ngäˈäy nˈukëm?
-
¿Mbäädëdaa jotkujk mnayjyawëty ko xynyimaytyäˈägët ja oybyë ayuk?
Mbäät duˈun xytyuny
-
Mä reunyonk mëdiˈibë sëmäängujky, ix wiˈix jap nyaxy parë duˈunë jäˈäy xymyëtmaytyaktsoonët.
-
Yajtëw ja mëdiˈibë myaˈëxpëjkëp ti mdëgoyˈäjtxëp xytyunët parë mbäät xyajnäjxnë tijaty mä reunyonk. Pes yëˈë mbudëkëyanëp parë niˈigyë xyjatët wiˈixë jäˈäy xymyëtmaytyäˈägët.
-
Tuundäˈäk wiˈix xyˈatsoowëmbitët ko pën myajtëwëdët extëm myiny mä jyënaˈany “Näägë jäˈäy jyënäˈändë” o “Mbäät näägë jäˈäy myajtëyëty”.
MBÄÄT NÄÄGË JÄˈÄY MYAJTËYËTY: “¿Wiˈix jyaty kyëbety? ¿Ti tyam nduunkˈäjtypy?”.
-
Ko pën duˈun myajtëwëdët, ¿wiˈix mbäät xyˈoktukmëtmaytyaˈaky tijaty kujk mˈëxpëjkypy?
TI TË NJÄJTËM
Jantsy agujk jotkujk xyajnayjyäˈäwëm ko nimaytyakëm ja oybyë ayuk ets mbäät kyaj tsyiptaˈaky xymyëtmaytyaktsoonëdë jäˈäy extëmë nety mwinmay.
Ajamyatsë
-
¿Ti mbudëkëyanëp parë jyënäˈänët ja mˈääw jot ets xynyimaytyäˈägäˈänët ja oybyë ayuk?
-
¿Wiˈix mbäät xynyimaytyaˈaky mëdë mayˈäjt wintsëˈkën?
-
¿Ti mbäät xytyuny parë kyaj nëgoo mtsëˈëk mjawët?
AK PAYEˈEY
Nijawë taxk pëky wiˈix mbäädë jäˈäy xymyëtmaytyaˈaky ko xymyoˈoyëdë tarjetë parë tyëkët mä jw.org.
Nijawë taxk pëky ti mbäät mbudëkëty parë xykyäjpxwäˈkxët ja oybyë ayuk.
“¿Listë myajpääty parë xymyatsäˈänyë jäˈäy?” (Diˈib Xytyukˈawäˈänëm, septiembrë 2020)
Ix wiˈixë Biiblyë tnimaytyaˈaky tuˈugë ijxpajtënë mëdiˈibë mbäät xypyudëjkëm parë ngäjpxwäˈkxëm amëk jotmëk, oy mutsknëm nyajpatëm.
Nijawë wiˈix mbäädë mjëëky mëguˈuk xytyukmëtmaytyaˈagyë Diosë yˈayuk mëdiˈibë kyajnëm tˈixyˈattë Jyobaa.
You May Also Like
DIˈIB XËMË NAYAJTËËWËDËP
¿Wiˈixë Jyobaa tyestiigëty dyaˈëxpëktë jäˈäy?
Ko mˈëxpëkët mëdë Jyobaa tyestiigëty namayˈäjtën, mbäät xyajtunyë Biiblyë mëdiˈibë mdimytsyojkënyëˈajtypy. Mbäät nanduˈun xywyoy pënaty mdimywyowaampy, duˈunë mfamilyë o mëtnaymyaayëbë.
