LEKSION 01

¿Wiˈix mbäädë Biiblyë xypyudëjkëm?

WINʼIX TI AYUK

Nimay ëtsäjtëm nnijawëyäˈänëm tiko duˈun yˈixëtyë yäˈädë jukyˈäjtën, tiko nˈayoˈowëm, nˈoˈkëm ets ti mëdiˈibë miimp këdakp. Nmëmäˈäy nmëdäjëm nanduˈun wiˈix tuˈuk tuˈugë xëëw nyajnäjxëm, extëm wiˈix nbatëmë meeny sentääbë o wiˈix nyajpatëm jotkujk mëdë familyë. Mayë jäˈäy të tpëktë kuentë ko Biiblyë xytyuknijäˈäwëm ja tëyˈäjtënë ets ko xymyoˈoyëmë oybyë käjpxwijën. ¿Ja pën xyˈixyˈaty mëdiˈibë Biiblyë mbäät pyudëkëty?

1. ¿Tijatyë Biiblyë yˈatsoowëmbijtypy?

Biiblyë yˈatsoowëmbijtypy extëm, ¿wiˈix tsyonëˈky tsyondakyë jukyˈäjtën?, ¿tiko yä nyajpatëm?, ¿tiko yˈayoyë naxwinyëdë jäˈäy?, ¿jukyˈäjtˈadëtsëm wiinktsoo ko nˈoˈkëm?, ¿tiko nëgoo tyim jaˈäjnë tsip ets pën niˈamukë yëˈë njatsojkëmë jotkujkˈäjtën?, ¿wiˈixëdaa yäˈädë Naxwinyëdë jyatäˈäny? Biiblyë xyˈanmäˈäyëm ets jap nbayeˈeyëm wiˈix yaˈˈatsoowëmbity. Miyonkˈamë jäˈäy mëdiˈibë duˈun të ttundë agujk jotkujk tyam nyayjyawëdë ko të tnijawëdë.

2. ¿Wiˈixë Biiblyë xypyudëjkëm parë njukyˈäjtëm agujk jotkujk?

Biiblyë myëmiimbyë oybyë ëwij käjpxwijën. Extëm nˈokpëjktakëm, nyimaytyakypy wiˈix mbäädë nfamilyëˈäjtëm yˈity agujk jotkujk, wiˈix kyaj nëgoo tijaty ndimymyëmäˈäy ndimymyëdäjëm ets wiˈix ndukxondakëm ja tuunk ayoˈon. Ko xynyijawët wiˈixë Biiblyë tnimaytyaˈaky, ta xypyëkäˈänyë kuentë ko ja “Diosë jyaaybyajtën” mbäät xypyudëjkëm (2 Timotee 3:16).

Yäˈädë liibrë kyaj twingudëgatsˈatyë Biiblyë, per mbudëkëyanëp parë xyjaygyukët. Pääty, oy ko xykyäjpxtäˈäyët tukëˈëyë tekstë mëdiˈibë miimp parë xyˈijxkijpxyët pën duˈun extëm yajnimaytyaˈaky.

AK NIJAWË NIˈIGYË

Min nˈokˈijxëm wiˈix mayë jäˈäy të pyudëkëdë Biiblyë, ti mbäät xytyuny parë xytyukxondäˈägët ko xykyäjpxët ets tiko yˈoyëty myajpudëkët parë xyjaygyukët.

3. Biiblyë mbäät xytyuˈumoˈoyëm

Biiblyë duˈun tyuny extëm tuˈugë lamprë mëdiˈibë xykyudëˈkxëm nëˈääy tuˈääy. Mbäät xynyëˈëmoˈoy xytyuˈumoˈoyëm mä jukyˈäjtën ets xytyuknijäˈäwëm ti miin këdakp.

Käjpxtë Salmo 119:105 ets nimaytyäˈäktë mëdiˈibë yä yajtëëpy:

Ja mëdiˈibë jyaayë yäˈädë Salmo, ¿wiˈixë nety tˈixyë Diosë yˈAyuk?
Ets mijts, ¿wiˈix xyˈixyë Diosë yˈAyuk?

4. Biiblyë xytyuknijäˈäwëm tijaty nmëmäˈäy nmëdäjëm

Tuˈugë toxytyëjk nyijäˈäwë mä Biiblyë tijatyë nety kanäk jëmëjt të tmëmay të tmëdäjy. Ixtë BIDEO ets nimaytyäˈäktë mëdiˈibë yä yajtëëpy:

BIDEO: Ninäˈä mgawinmayët ko tëdën kyaˈoyë ja mjotmay (1:48)

Extëm të xyˈixy mä bideo, ¿tijatyë nety ja toxytyëjk nyijawëyaampy?
¿Wiˈix pyudëjkë ko tˈëxpëjkyë Biiblyë?

Biiblyë xyˈanmäˈäyëm ets nbayeˈeyëm tijaty nnijawëyäˈänëm. Käjpxtë Matewʉ 7:7 ets nimaytyäˈäktë mëdiˈibë yä yajtëëpy:

Wiˈix mˈokjënäˈäny, ¿japëdaa myiny mä Biiblyë tijaty mjanijawëyaampy? ¿Ti mëdiˈibë mijts mjanijawëyaampy?

5. Mbäät ndukxondakëm ko ngäjpxëmë Biiblyë

Mayë jäˈäy tyukxondaktëp ko tkäjpxtë Biiblyë ets naytyukpudëjkëdëp. Ixtë BIDEO ets nimaytyäˈäktë mëdiˈibë yä yajtëëpy:

BIDEO: Ngäjpxëmë Biiblyë (2:05)

Extëm të xyˈixy mä bideo, ¿tsyojkënyëˈäjttëp nyokykyäjpxäˈändë ënäˈktëjk?
Per ¿tiko net tkäjpxäˈändë Biiblyë?

Tijatyë Biiblyë xytyukniˈˈijxëm, mbäät xypyudëjkëm ets xyˈagujkmoˈoy xyjotkujkmoˈoyëm. Käjpxtë Romanʉs 15:4 ets nimaytyäˈäktë mëdiˈibë yä yajtëëpy:

¿Mˈaknijawëyaampy wiˈixë Biiblyë xyˈagujkmoˈoy xyjyotkujkmoˈoyëm?

6. Mbäät njaygyujkëm tijatyë Biiblyë myaytyakypy ko pën xytyukmëtmaytyakëm

Mayë jäˈäy kyäjpxtëbë Biiblyë naytyuˈuk, per të tpëktë kuentë ko mas niˈigyë tjaygyukëdë ko jam pën pyudëkëdë. Käjpxtë Apostʉlʉty o Hechos 8:26-31 ets nimaytyäˈäktë mëdiˈibë yä yajtëëpy:

¿Ti naybyudëkë ntsojkëm parë njaygyujkëmë Biiblyë? (Ixtë bersikulo 30 etsë 31).

Ja yetyëjk mëdiˈibë Etiopía yajtëgoyˈäjt ets pën tyukjaygyukëdët ja Diosë jyaaybyajtën. Tyam, yˈoyjyäˈäwëdëp nanduˈun mayë jäˈäy ko pën pyudëkëdë parë Biiblyë tˈëxpëktë.

NÄÄGË JÄˈÄY JYËNÄˈÄNDË: “Nëgoobë xëëw tiempë nyajtëgoˈoyëm ko nˈëxpëjkëmë Biiblyë”.