Ntsojktëp mëguˈuk:

Mijts mnijäˈäwëp ko mä Biiblyë yajmaytyakpë jäˈäy diˈib jantsy jukyˈäjttë. Yajmaytyakpë yetyëjk toxytyëjk diˈib myëduundë Dios ets nan pyattë amay jotmay extëm ëtsäjtëm (Santya̱ˈa̱gʉ 5:17). Nääk myëgëjx myëdujktë amay jotmay o axëëk yajnayjäˈäwëdë ti tyuundë ja wiinkpë Dios mëduumbë. Ets nimay kyaj nyekyyajotkujkˈäjtëdë ko tpokyjäˈäwëdë ti tyuundë.

Tyäˈädë jotmay tukmastutëdë Jyobaa. Per ¿ojtsëdaa jatëgok tnijëmbittë? Ojts. Nimay duˈun jyënandë extëm diˈib jyaayë Salmo ko tmënuˈkxtakyë Jyobaa: “Tëjëts nduˈudëgoy extëm tuˈugë borreegë yoˈoytyëgoy. Ëxtäˈäy ja mduumbë, mët ko kyajts të njäˈäytyëgoyë mˈanaˈamën” (Salmo 119:176). ¿Të näˈä duˈun mnayjawëty?

Jyobaa ninäˈä tkajäˈäytyëgoyë tyuumbë diˈib të myëjagamgeˈegyëty. Niˈigyë tˈëxtäˈäy, näˈäty mët yëˈëgyëjxmë nmëguˈukˈäjtëm diˈib mëët nduˈukmujkëm. Extëm nˈokpëjtakëm, okwinmay wiˈixë Jyobaa tpudëjkë Job diˈib pyatë amay jotmay mëjwiin kajaa, yajtëgooyë jyukyˈäjt myadakën, oˈktääyë yˈuˈunk yˈënäˈk ets patë tuˈugë mëk päˈäm. Ets ja myëguˈuktëjk diˈibxyëp ojts jyapudëkëty, niˈigyë yajtsayujtë mëdë ää ayuk. Job ninäˈä tmastutyë Jyobaa, per tuk tiempë tëgatsy wyinmääy (Job 1:22; 2:10). ¿Wiˈixë Jyobaa pyudëjkë parë jatëgok oy wyinmayët?

Yëˈë yajtuunë Elihú, tuˈugë Dios mëduumbë. Elihú jawyiin tmëdoowˈijty ko Job tyukmëtmaytyakë ja yˈamay jyotmay, taanëm tˈanmääy wiˈix yëˈë wyinmay. ¿Wiˈix tˈanmääy? ¿Yˈëbat kyäjpxpat o yˈanmääy ko pääty duˈun jyaty mët ko të pyokytyuny ets dyajnayjäˈäwë axëëk? ¿Waˈanë Elihú nyayajnäjxë mëj këjxm mä Job? Niwiˈixtsoo. Mët yëˈëgyëjxmë Diosë myëjää tˈanmääyë Job: “Dios windum nanduˈunëts naxy extëm mijts, nan moˈontsëts ojts ngojy”. Ta net tˈanmääy parë kyaj tsyëˈëgëdët ets kyaj wiˈix nyayjawëdët extëmë nety tˈanëëmëyaˈany (Job 33:6, 7). Kyaj niˈigyë axëëk dyajnayjäˈäwë Job, tsuj yajxon ojts tkäjpxwijy ets tmëjämooy.

Nanduˈunëts të nyaˈoyëdë tyäˈädë ëxpëjkpajn. Diˈibëts tim jawyiin të ndundë, yëˈëjëts të nmëdoowˈittë yajxon wiˈix jyënäˈändë kanäägë nmëguˈukˈäjtëm diˈib të tmëjagamgaˈaktë Diosë kyäjpn etsëts të nˈixtë wiˈix yaˈix yajpäättë (Proverbios 18:13). Tajëtsë net të nuˈkxtäˈäktë etsëts të nˈëxpëktë mä Biiblyë wiˈixë Jyobaa tpudëjkë pënaty mëduunë ko tpattë duˈumbë jotmay. Ets tim ok, tajëtsë net të nyajtuˈukmujktäˈäytyë diˈibë Biiblyë myaytyakypy ets extëm tyam jyattë nmëguˈukˈäjtëm parë të yajjäˈäyë tyäˈädë foyetë. Pääty myaˈˈanëëmë ets yajxon xyˈëxpëkët. It seguurë ko mëk ntsoktë.

Diˈib wyooyoˈoytyëbë Jyobaa tyestiigëty