WIˈIXË JÄˈÄY NYAJTËJKËM ËXPËJKPË
LEKSION 10
Jotmayˈat ja mëdiˈibë myaˈëxpëjkypy
Biiblyë jyënaˈany: “Jaˈko miits ntsoktë, pääty të ndukˈawäänëdë ja oy ääw oy ayuk ets käˈäp yiˈiyëty, nan nˈënandëbëts es nguˈoogëdëty” (1 Tes. 2:8, TY).
¿Ti tyuunë Jesus?
1. Ixë BIDEO o käjpxë Fwank 3:1, 2, ets winmay mëdiˈibë yä yajtëëpy:
-
¿Tidaa ko Nicodemo ojts tninëjkxyë Jesus koots? (Käjpxë Fwank 12:42, 43).
-
¿Wiˈixë Jesus dyajnigëxëˈky ko jyotmayˈajtypyë nety ja Diosë tyuunk?
¿Ti xytyukniˈˈijxëmë Jesusë yˈijxpajtën?
2. Kom ntsojkëmë jäˈäy, pääty njotmayˈäjtëm ets nyaˈëxpëjkëm.
Panëjkxë Jesusë yˈijxpajtën
3. Yaˈëxpëk ja jäˈäy ti oorë tnigajpxy ets mä ttsojkënyëˈaty xynyinëjkxët. ¿Të ja jäˈäy tnigajpxy ti xëëw ets ti oorë yˈëxpëkäˈäny? ¿Mä ttsojkënyëˈaty yˈëxpëkäˈäny: mä tyuny, mä tyëjk o jam muum wiinktsoow? Oy ko xytyunëdë mëjääw ets xynyinëjkxët ti oorë yˈëxpëkäˈäny.
4. Yaˈëxpëk ja jäˈäy näˈä mëët të mnaygyajpxyëty. Pën kyaj mmadäˈägäˈäny xynyinëjkxët ja jäˈäy, mbäät xytyuny extëm yä yajnigäjpxäˈäny.
5. Mmënuˈkxtäˈägë Jyobaa ets kyaj tëgatsy mwinmayët mä ja jäˈäy. Anëëmë Jyobaa waˈan mbudëkëty ets duˈunyëm xyjyotmayˈatët ja jäˈäy mëdiˈibë myaˈëxpëjkypy. Ets mas niˈigyë mbäät duˈun xytyuny, pën kyaj yˈëxpëky jëjwitsë o tsiptakxëp tkuytyunët tijaty jyajtypy (Filip. 2:13). Anëëmë Jyobaa waˈan mbudëkëdët ets yëˈëyë xyˈixët wiˈix ja jäˈäy jantsy oy jyaˈayˈaty.
