WIˈIXË JÄˈÄY NMËTMAYTYAKTSOˈONËM
LEKSION 6
Nˈokˈijtëm jotmëk
Biiblyë jyënaˈany: “[Ojtsëts] ja Dios xypyudëkë ets myajtukˈawäänëdëty ja ääw ayukë oybyë. Amëk jotmëkëts ojts ngäjpxwäˈkxtë” (1 Tes. 2:2, TY).
¿Ti tyuunë Jesus?
1. Ixë BIDEO o käjpxë Lukʉs 19:1-7, ets winmay mëdiˈibë yä yajtëëpy:
¿Ti xytyukniˈˈijxëmë Jesusë yˈijxpajtën?
2. Ko tsojkëp nˈijtëm jotmëk parë niˈamukë jäˈäy ndukmëtmaytyakëm ja Diosë yˈayuk.
Panëjkxë Jesusë yˈijxpajtën
3. Amdoowë Jyobaa nyaybyudëkë. Jesus yëˈë ojts pyudëkëty ja Diosë myëjääw parë ojts yˈëwaˈkxy kyäjpxwaˈkxy amëk jotmëk, ëtsäjtëm yëˈë nanduˈun xypyudëkëyäˈänëm (Mat. 10:19, 20; Luc. 4:18, TNM). Amdowë Jyobaa ja jotmëkˈäjtën parë xymyëtmaytyäˈägët ja jäˈäy mëdiˈibë mtsëˈkëp (Apos. 4:29).
4. Kyaj tëgatsy nwinmayët mä ja jäˈäy. Näˈäty, kyaj ja jäˈäy nmëtmaytyäˈägäˈänëm mët ko yëˈë xyˈatsëˈkëm ko nˈijxëm wiˈix yˈixëty, wiˈix ja jyukyˈäjtënë dyajnëjkxy, pën myëdäjtypyë meeny sentääbë o tijaty myëbëjkypy. Per oy ko nyaˈijtëm winmäˈänyoty ko:
-
Ëtsäjtëm kyaj mbäät nˈijxëm ja jäˈäyë jyot kyorasoon, yëˈëjënë Jyobaa mëdiˈibë yˈijxypy.
-
Kyaj mbäät nwinmäˈäyëm ko taabë jäˈäy ninäˈä Jyobaa kyapudëkëyaˈanyëty.
5. Jotmëk mˈitët, per wijy kejy (Mat. 10:16, TNM). Yaˈixëdë mayˈäjt wintsëˈkënë ets kyaj mëdë jäˈäy mnayˈoojëdët. Ets pën ja jäˈäy kyaj tmëdoowˈitäˈäny ja Diosë yˈayuk o mˈijxypy ko jamˈatäämbë jotmay, oy ko ja maytyaˈaky xyajjëjpkëxët (Prov. 17:14).
