TUˈUGË uˈunkteety diˈib Nueva York (E.U.A.) jyënaˈany: “Jonathan yëˈë naty të tninëjkxy ja myëtnaymyaayëbë diˈib wingon tsënääytyëp. Ja nnëdoˈoxyëtsë Valentina xëmë jyotmayˈooky koogoo jam nyijkxy, yëˈko mayë karrë jyantsy myiny jyantsy xyëptë. Perë Jonathan wingëmë naty dyaˈˈaˈoyëyanë tijaty tuump jëën mëët, pääty tninëjkxy ja myëtnaymyaayëbë diˈib myëdäjttëp tuˈugë tayeer mä mbäät ttukˈëxpëjktaˈaky. Ëjts, tamëtsë naty mätsë ndëjk Manhattan, Nueva York, etsë nnëdoˈoxyëts të naty nyijkxy Puerto Rico parë tkuˈixäˈänyë fyamilyë. Tajëts nwinmääy jadaa Jonathan tyimjäˈtanë. Ko ajotkumonë yajpeenyë timbrë. Tajëts njënany yëˈëdaa net jäjtp, per kyajtëmë naty yëˈëjëty. Yëˈë natyë polisiyë mëdë jäˈäy diˈib yˈijxtëp ko pën tsyayuty. Tajëts ja polisiyë xyajtëëy: ¿Mˈëxkajpyë tyäˈädë lisensyë? Tajëts nˈatsooy: Nˈëxkajpyëts yëˈëtsë nˈuˈungë jyaˈa. Pes axëëk të jyaty të kyëbety, të ayoˈon tyuny jyatyëty ets ja mˈuˈunk... ja mˈuˈunk... të yˈooky. Netyëts ndimnaˈˈatsooy: ¡Kyajts nmëbëkäˈäny! Ko duˈun tyuun jyäjtë, wintsujktuˈuty winxaˈaduˈutypyëmtsë ngorasoon njäˈäwëdë ets axtë tyambäät kyajts njäˈäytyëgoytyë oy të jyanäjxnë kanäk jëmëjt”.

 Tuˈugë uˈunkteety diˈib Barcelona (España) tkujayë: “Jantsy jotkujkëtsë naty nyajpäättë [...] mëdëtsë nnëdoˈoxyë María ets nidëgëëktsë nˈuˈunk, David diˈibë jyëmëjt 13, Paquito 11 etsë Isabel 9.

”Per marsë poˈo, mä ja jëmëjt 1963, ta Paquito jyajty jantsy pëjkpë kyëbäjk, jamë naty tsyoony eskuelë. Kyajtsë naty nnijawëdë tidën ko duˈun jyaty, per ko waanë yˈijty tajëts nnijäˈäwëdë, pes kyumdëgëk oorë yaˈoˈkë tuˈugë hemorragia cerebral.

”Oy të nyäjxnë 30 jëmëjt mä Paquito yˈoˈky, duˈunyëmëts njawëdë jäj jëmuˈumën axtë tyambäät. Ko tääk teety yˈoogyë yˈuˈunk, duˈun tjawëdë extëmxyëbë nyiniˈkx pyuwäˈätsy, ets duˈunyëm tjawëdë oyxyëp jekyë tiempë jyanäjxpë o tjaˈˈakpatpëdë yˈuˈunk”.

Diˈib yä majtsk peky të yajnimaytyaˈaky yëˈë xytyukˈijxëm ko tääk teety mëjwiin kajaa tjawëdë jäj jëmuˈumën ko yˈooky tuˈugë yˈuˈunk ets  tsip tjäˈäytyëgoytyët. Pääty tëyˈäjtën extëm jyënaˈany tuˈugë doktoor: “Mas mëk yajjawë ets yajmëmony yajmëduky ko yˈooky tuˈugë mixyuˈunk o kixyuˈunk ets kyaj dyuˈunëty ko yˈooky tuˈugë mëjjäˈäy mëˈˈënäˈkpë, yëˈko ja uˈunk yëˈë diˈib yaˈˈawijxp yˈoogët tim ok. [...] Ko yˈooky tuˈugë uˈunk kyaj mbäät ti ja tääk teety tnekyˈawixtë [extëmë myëˈt, xyakxy o yˈok] ets tëgooytyaapy tijatyë naty yˈawijxtëp [...] ttundët ja yˈuˈunk yˈënäˈk”. Ko tuˈugë toxytyëjkë yˈuˈunk yˈooky diˈib kyajnëm myaxuˈunkˈaty nan mëk tjawë jäj jëmuˈumën.

Tuˈugë toxytyëjk diˈib kuˈoˈk tnimaytyaˈaky ja nyaˈay: “Russell yëˈë pyudëjkë ja doktoortëjk ko tyuunë Segunda Guerra Mundial, jatsoo mä Océano Pacífico, yëˈë yˈijx wiˈixë jäˈäy jyantsy tsyiptuundë ets kyaj wiˈix jyajty. Ta jyëmbijty Estados Unidos mä kyaj ti nëgoo tnekymyëmääy tnekymyëdäjy. Ok, ta tyëjkë Dios mëduumbë. Ko naty 60 naxyë jyëmëjt, ta pyatë päˈäm mä kyorasoon. Tyuundääy tijaty mbäät pyudëkëty parë yˈakmëkˈatët, per julië poˈo, mä 1988, ta ja kyorasoon wyäˈkˈäˈäwë ets yˈoˈky. Axëëgëts njantsy nyayjäˈäwë ets kyajts mëët ojts nekynyayjëgajpxyëty. Kyajts jeˈeyë nyaˈayˈajty o nyeˈeytyëjkˈäjtyëts nanduˈunëts nˈoymyëtnaymyaayëbëˈäjty. Jats mëët ojts ntsëënë 40 jëmëjt. Nwinmääyëts ko jantsy tsip nimëjääjëts naytyuˈuk njukyˈatët”.

Duˈunën mayë familyë jyattë jabom jabom abëtsemy nyaxwinyëdë. Ets may diˈib të yˈooky extëmë yˈuˈunk, tyääk tyeety, nyaˈay o myëtnaymyaayëbë jyënäˈändë ko tëyˈäjtën extëm ojts tkujayë apostëlë Pääblë ko oˈkën yëˈë duˈun ja tim “okpë mëtsip”. Ets ko ayoˈon tyuny jyatyëty mayë jäˈäy kyaj tkupëkäˈändë ets jyënäˈändë: “¡Kyajts nmëbëkäˈäny! Kyaj tyëyˈäjtënëty”. Per kyaj jeˈeyë duˈun jyënäˈändë, ok nˈakˈixäˈänëm wixaty mas nyayjawëdë (1 Korintʉ 15:25, 26).

Per mä nganijäˈäjëm wiˈix nyayjawëdë, min jawyiin nˈokˈatsoˈojëmbijtëmë tyäˈädë yajtëˈëwën. ¿Jabäädëdaa jäˈäyë jyukyˈäjtënë jyëjpkexy ko yˈooky? ¿Nëjkxëbëdaa näˈä jatëgok nˈijxëm ja jäˈäy diˈib mëk ntsojkëm?

Apostëlë Pääblë xyjotkujkmoˈoyëm ko ojts tkujayë ko ja tim “okpë mëtsip diˈibë Dios yajkutëgoyaampy, yëˈë ja oˈkën” (1 Korintʉ 15:26). ¿Tiko yˈijty seguurë? Yëˈko yëˈë naty këˈëm të tyukniˈˈixëtyë Jesukristë diˈib jukypyëjk mä ja oˈkpë (Apostʉlʉty 9:3-19). Pääty nanduˈun tkujäˈäyë: “Dëˈën extëm tuˈugë yetyëjk [Adan] dyajtsondaky ja oˈkën naxwiiny, nandëˈën tuˈugë yetyëjk [Jesukristë] dyajtsondaky es ja oˈkpëty jyikypyëktët. Diˈibëts nmaytyakypy, jaˈa dëˈën ko nidëgekyë jäˈäyëty yˈooktë mët ko tyëëmpˈat yˈäätsˈatëdë Adan, es nandëˈën diˈibaty yˈaxäjëdëp ja Jesukristë extëmë Yajnitsokpë, Dios yajjikypyëkëdëp” (1 Korintʉ 15:21, 22).

Jesus mëk tjantsy pyaˈˈayooy ja kuˈookytyoxytyëjk diˈibë naty ja yˈuˈunk të yˈooky jam Nain. Biiblyë tmaytyaˈaky: “Es ko [Jesus] jyajty käjpnbëˈääy, net tˈijxy ko tmëmin[dë] es dyajnaxtëkëyäˈändë tuˈugë oˈkpë. Es ja oˈkpë yëˈë ijty tukpajkyë määnkˈäjtëp yëˈë tyääk diˈibë naty kuˈeeky. Es mayjyaˈay ja oˈkpë tpanejxy. Ko tˈijxy ja Jesus, net tpaˈˈayooy ja kuˈeekytyoˈoxy es tˈanmääy: Katë mjëˈëy. Net ja Jesus tmëwingoony es ttoony ja oˈkpë këˈëyën, es ja diˈibë naty kyiipy wyäˈkˈäˈädë. Es ja Jesus tˈanmääy ja oˈkpë: Mexy, ëjts mij nˈanmaapy: ¡Pëdëˈëk! Net diˈibë naty të yˈeeky oj wyaˈtskujkë es kyäjxeˈky, es ja Jesus ttukëdëjkë ja tyääk. Es ko taadë tˈijxtë, nidëgekyë tsyëˈkëtyaaytyë es tˈawdäjttë ja Dios es jyënandë: Tuˈugë Diosë myëj kugäjxpë të kyëxeˈeky mä ëtsäjtëm. Es nandëˈën nyayjënanëdë:  Dios të myiny es tpudëkëyaˈany ja kyäjpn”. Yä nbëjkëmë kuentë ko Jesus mëk tjantsy pyaˈˈayooy ja kuˈookytyoxytyëjk ets pääty ojts dyajjukypyeky ja yˈuˈunk. ¡Okpawinmay ti net tyunaampy mä tiempë myiny kyëdaˈaky! (Lukʉs 7:12-16.)

Kyaj mbäät yajjäˈäytyëgoyë tyäˈädë mëjˈäjtën diˈibë Jesus tyuun mayjyaˈay wyinduuy. Yëˈë yajnigëxëˈk ko tëyˈäjtën extëmë naty të jyënaˈany, ko dyajjukypyëkäˈänyë oˈkpë yä Naxwiiny ko naty yˈaneˈemy jam tsäjpotm. Pes të naty jyënaˈany: “Jäˈtäämp ja tiempë mä ja oˈkpëty diˈibë të nyaxtëkëdë myëdowëp kots ëj ngäjxët, es diˈibë oy të jyikyˈaty yä naxwiiny, yëˈë jikypyëkëp” (Fwank 5:28, 29; 2 Peedrʉ 3:13; Diˈibʉ Jatanʉp o Apocalipsis 21:1, 3, 4).

Apostëlë Peedrë mët ja myëguˈuktëjk diˈib pyajëdijttë Jesus nan yˈijxtë wiˈix kanäägë oˈkpë jyukypyejky. Ets axtë myëdoodë wiˈixë Jesus diˈibë naty të jyukypyeky myëgäjpxë mä ja mejny diˈib Galileeë. Biiblyë tmaytyaˈaky: “Net ja Jesus tˈanmääytyë ja yˈëxpëjkpëty: Min mˈarmusalˈattë. Es ni pën tkaˈˈanmääytyë: ¿Mbënëdën mij?, mët ko nyijäˈädëbë naty ko jaˈa ja Nintsënˈäjtëm. Netë Jesus myëjwaˈky es tkoneˈky ja tsäjkaaky es tmooytyë ja yˈëxpëjkpëty. Es nandëˈën ttuuny mët ja äjkx. Jaˈa tyäˈädë ja myëdëgëkˈok nibëdëˈëk mä tpäättë ja yˈëxpëjkpëty ko naty të jyikypyeky mä yˈeˈky” (Fwank 21:12-14).

Peedrë jyantsy myëbëjk, pääty tkujäˈäyë: “Nˈokˈawdäjtëm ja Dios, Nintsënˈäjtëm Jesukristë Tyeety, diˈibë të xytsyojkëm es xypyaˈˈayoˈom es xyajmiˈin xyajjäjtëm jemy es xytyukˈawijxëm ja jikyˈäjtën diˈibë winë xëë winë tiempë, jaˈa ko ja Nintsënˈäjtëm Jesukristë jyikypyejky jatëgok” (1 Peedrʉ 1:3).

Apostëlë Pääblë nan myëbëjk ko seguurë ja oˈkpë jyukypyëkäˈändë, pääty jyënany: “Nmëbejkypyëts tëgekyë Moisesë yˈanaˈamën es tëgekyë diˈibë Diosë kyugäjxpë kyäjxtë. Es ëj nmëbejkypyëts extëm yëˈëjëty nandëˈën ko yëˈë Dios dyajjikypyëkäˈäny tëgekyë oˈkpë diˈibë ijt oyjyaˈay es nandëˈën diˈibë ijt kaˈoyjyaˈay” (Apostʉlʉty 24:14, 15).

Pääty, miyonkˈamë jäˈäy tˈawix tjëjpˈixtë yä Naxwiiny ja myëguˈuk diˈib të yˈooky, per kyaj nyekydyuˈunˈatäˈäny ja jukyˈäjtënë extëm tyam. ¿Wiˈix yˈixˈatäˈäny? Mä tyäˈädë foyetë kyëjxnë mä jyënaˈany: “Seguurë ja oˈkpë jyukypyëkäˈändë”, jap niˈigyë yajnijawëyaˈany ti diˈibë Biiblyë yˈawäˈänëp parë ja nmëguˈukˈäjtëm diˈib të yˈoˈknë.

Per oy ko jawyiin nˈatsoˈojëmbijtëm diˈib mbäät mnayajtëyëty ko xynyimony xynyiduky ja jäˈäy diˈib të yˈooky: ¿Axëëgëdaa kojëts duˈun nayjawëty? ¿Wiˈixëts mbäät nmëmadaˈagyë tyäˈädë jotmay? ¿Wiˈixëts mbäät nyajpudëkë? ¿Wiˈixëts mbäät nbudëkë ja diˈib moon tujkp? Ets ¿ti yˈawäˈänëbë Biiblyë parë jäˈäy diˈib të yˈoˈknë? ¿Waˈanëtsëdaa näˈä jatëgok nëjkx nˈixy? Ets pën nëjkxëbëts nˈixy, ¿mää?