¿TI YAM tëgatsy mˈijxypy mä tyäˈädë dibujë? Yëˈë jäˈäyëty diˈib yam mˈijxypy. Ja tim jawyiimbë yetyëjk ets ja toxytyëjk. ¿Pën të dyajkojy? Yëˈë Dios. ¿Mnijäˈäp ti Dios txëˈaty? Ja txëˈaty Jyobaa. Etsë tyäˈädë yetyëjk yajxëëmoojy Adán ets ja toxytyëjk Eevʉ.

Jyobaa Dios dëˈënë Adán ojts dyajkojy. Mëdë naxmoˈonts tpojtsy tuˈugë yetyëjkë nyiniˈx kyëbäjk jantsy oy, tuˈugë niniˈx këbäjk diˈib kyaj pyoky myëëdëty. Ta net tjëjpˈyeemy, ets dëˈën jyukypyejkyë Adán.

Dios tyuunkmooyë Adán. Tˈanmääjy ets txëëmoˈoyët tëgekyë jëyujk animal. Waˈan ja Adán jeky tniˈijxy tkuˈijxy ja jëyujk animal ets oy txëëmooytyaˈayët. Mä nety jam dëˈën tniˈixy tkuˈixy ja jëyujk animal, ta jam ti tˈijxpaty. ¿Mnijäˈäp ti yˈijxpat?

Tˈijxy ko ja jëyujk animal ak nimajtskaty. Tamë netyë elefantë yaˈaybyë etsë toˈoxypyë, kääjë yaˈaybyë etsë toˈoxypyë. Perë Adán kyaj nety pënë jyamyëët. Päätyë Jyobaa dyajmäädëgooyë Adán ets ta tjuˈty tuˈugë päjk mä tukˈaduˈumë kyaatsy. Tyäˈädë käätsypyäjk yëˈë diˈib yajtuun ets ojts dyajkojy tuˈugë toxytyëjk diˈibë Adán nyëdoˈoxyˈäjt.

¡Jantsy jotkujkë netë Adán nyayjäˈäjë, ets nandëˈënë Eevʉ ko nety jyukyˈatäˈändë mä ja it lugäärë tsujpë! Mbäädë nety tmëdattë yˈuˈunk yˈënäˈk ets jyukyˈattët agujk jotkujk.

Jyobaa tsyojk etsë Adán mëdë Eevʉ jyukyˈattët winë xëë winë tiempë. Tsyojk etsë Naxwinyëdë dyajjëmbittët mëk tsuj dëˈën extëm ja Eden. ¡Wiˈix tyim nayjäˈäjëdë jotkujkë Adán mëdë Eevʉ ko twinmääytyë dyajjëmbittëdë Naxwinyëdë mëk tsuj! ¿Ojxyëp xytsyojkënyëˈaty xyajjëmbitëdë Naxwinyëdë extëm tuˈugë it lugäärë tsujpë? Per ja jyotkujkˈäjtënë Adán mëdë Eevʉ kyaj jyejky. Min nˈokˈijxëm tiko.