OK IXË Kaín mëdë Abel. Nimajtsk të yaˈknëdë. Kaín kamduump ujts tuump ijty. Yëˈë yaˈijtypyë ääytsyäˈäm ujtstsäˈäm etsë wiingatypyë jeˈxy peky.

Abel yëˈë kyuentˈäjtë borreegë. Wingëm ijty tkuentˈatanë borreeguˈunk. Ja borreeguˈunk jyantsy yaaktë mëjatyëty, ets ok ta Abel ojts tmëdäjnë tukajpëˈëgë byorreegë diˈib kyuentˈäjtypy.

Tuˈugë xëë Kaín mëdë Abel tnamooytyë tijatyë Dios. Kaín yëˈë myënëjxë jeˈxy peky diˈib yaˈijtypy. Etsë Abel yëˈë myënëjx tuˈugë borreegë mas oybyë diˈibë nety myëdäjtypy. Jyobaa kyaj tˈoyˈijxyë Kaín ets kyaj ttukjotkëdaky diˈib namooyë, per yˈoyˈijxë Abel ets tyukjotkëdak diˈib namooyë. ¿Mnijäˈäp tiko?

Kyaj yëˈëjëty ko Abel niˈigyë yˈoyëtyë jyaˈa ets kyaj dyëˈënëtyë Kaín. Yëˈë dëˈën ko Abel oyjyaˈay. Tsyojkypyë Jyobaa etsë myëgaˈax. Perë Kaín axëkjäˈäy ets kyaj ttsokyë myëgaˈax.

Päätyë Dios tˈanmääyë Kaín ko tsojkëp tyëgatsët. Perë Kaín kyaj tjaygyujkë. Niˈigyë jyantsy jotˈambejky yëˈko Dios yëˈë kyupëjkë Abel. Ta Kaín tˈanmääyë Abel: Joˈomdë kamoty. Ko jam nimajtsk yajpattë, ta Kaín tjantsy wyojpyë myëgaˈax, tjantsy myoojy mëk axtë ko dyaˈoˈky. ¿Këdii mëk axëëk dëˈën yˈadëtsyë Kaín?

Oyë Abel yˈoˈky, Dios jamyajtsëp axtë tyambäät. Abel oyjyaˈay yˈijty, etsë Jyobaa ninäˈä tkajäˈäytyëgoyë dëˈëmbë jäˈäy. Pääty ko tiempë tpäädët Jyobaa Dios yajjukypyëkaambyë Abel, ets ninäˈä kyanekyˈoogäˈäny. Jyukyˈatäˈäny winë xëë winë tiempë yä Naxwiiny. ¿Këdii oy nëjx nˈixyˈäjtëmë dëˈëmbë jäˈäy extëmë Abel?

Perë Dios kyaj tkupekyë jäˈäyëty diˈib dëˈën extëmë Kaín. Pääty, ko ja Kaín dyaˈoˈky ja myëgaˈax, ta Dios tyukumëdoojë ets kyajxë jagam tsënaabyë, mä nety kyaj jyamëtyë jyiiky myëguˈuk. Ko Kaín ojts nyëjxnë wiink it wiink naxwinyëdë tsënaabyë ta ojts tmënejxy tuˈugë yˈutsy diˈib nyëdoˈoxyˈäjt.

Ok, ta ja Kaingë nyëdoˈoxy tpatyë yˈuˈunk yˈënäˈk. Ets ja wiingatypyë nyëëx myäängë Adán mëdë Eevʉ pyëjk yˈuktë nandëˈënë ets tpattë yˈuˈunk yˈënäˈk. Ta tim tsojk ja jäˈäy ojts myayënë yä Naxwiiny. Nˈokˈixyˈäjtëm tuˈuk majtsk.