TËGEKYË oyˈäjtënë jam të tsyoony mä Dios. Yëˈë yajkojë Xëë ets xykyudëˈxëm xëëny, etsë Poˈo mëdë mëtsäˈä ets xykyudëˈxëm koots. Etsë Naxwinyëdë yëˈë ets nduktsënäˈäyëm.

Perë Dios kyaj yëˈë tim jawyiinë ojts dyajkojˈyë Xëë, Poˈo, mëtsäˈä etsë Naxwinyëdë. ¿Mnijäˈäp ti diˈib tim jayëjp yajkoj? Yëˈë jäˈäyëty diˈib dëˈën extëm yëˈë. Tyäˈädë jäˈäyëty kyaj mbäät nˈijxëm dëˈën extëmë Dios kyaj nˈijxëm. Biiblyë ja ttijy anklësëty. Dios yajkojë anklësëty ets mëët jam tsäjpotm tsyëënëdët.

Ja tim jawyiimbë anklës diˈibë Dios yajkoj tëgatsy mëdë wiingatypyë anklës. Yëˈë kyaˈaxkopk Uˈunk diˈib mëët tyuundë ets pyudëjkë mä dyajkojtääjy tijaty. Yëˈë pudëjkë mä ojts dyajkojˈyë Xëë, Poˈo, mëtsäˈä ets Naxwinyëdë.

¿Wiˈixë nety yˈixëtyë tyäˈädë Naxwinyëdë? Mä nety kyaˈoyënëm, kyaj nety mbäät pën tsyëënë. Yëˈëyë nety jaˈäjtpë mëj mejny diˈib yajnipaˈtstaapy tëgekyë. Per diˈibë Dios tsyojk yëˈë ets mä ja Naxwinyëdë tsyëënëdë jäˈäyëty, pääty dyaˈoˈoyëtsyondaky. ¿Ti tyuun?

Wenë, tim jayëjp tsojkëbë netyë tëˈx jäjënë yä Naxwiiny. Päätyë Dios tpëjtakyë Xëë ets tkudëˈx tkujäjëdë Naxwinyëdë. Dëˈëntsoo mbäädë nety jyaˈatyë xëënyˈat etsë kootsˈat. Ok ta netë nax dyajnëwimbëtseemy.

Tim jawyiin nitii nety yä Naxwiiny. Dëˈënë nety kyëxeˈeky extëmë tyäˈädë dibujë diˈib yä mˈijxypy. Kyaj nety jyamëtyë pëjy ni ääjy kepy ni jëyujk animal. Kyaj nety jyapëtyë äjkx mäjatyë mejny. Dios kajaa netyë tyuunk tmëdaty ets dyaˈoyëdë Naxwinyëdë tsuj, ets mbäät oy jyukyˈatyë jëyujk animal etsë jäˈäyëty.