JA JÄˈÄY diˈib kyaj tyëjkëdë arkoty dëˈënyëm jyukyˈäjttë, kyaj tmëbëjktë pën minäämbë Ayoˈonduu. Xyiktë extëm ninäˈänëmë nety kyaxiˈiktë. Per ko waanë yˈijty ta ojts xyikˈamoonedë.

Ajotkumonë ja tuu kyäˈätsondaky. Tyëjkë tuubë extëm jyawë nëë ngutaˈamnäjxëm. ¡Noˈee, tëyˈäjtënë nety të jyajënäˈäny! Per kyaj nety mbäät pën nyekytyëkë arkoty, yëˈko Jyobaa të nety yajxon dyaˈadujknë tëjkˈää.

Ko waanë yˈijty ta tëgekyë joy nyëpaˈtstääjy, ets dëˈën kyëxeˈky xitsoo yatsoo extëmë mëj nëë ko kyemy, tmëbëdeˈkyë tsää kepyë mëjatypyë ets jyantsy pyuˈuy jyantsy myoˈty. Ja jäˈäy jyantsy nyayˈatsëˈkëdë, pyajttë mä tun kopkë këjxmatypyë. ¡Ojxyëp tmëmëdowdë Noˈee ets ojxyëp tyëkëdë arkoty mä nety ja tëjkˈää kyaˈadikynyëm! Per kyaj nety mbäät pën nyekytyëkë.

Ta ja nëë niˈigyë ojts kyoomnë, 40 xyëë 40 tsyuˈum tyuujy, ko waanë yˈijty ta axtë ja tun kopkë këjxmatypyë nyëpaˈtstääjy. Niˈamukë jäˈäy etsë jëyujk animal diˈib kyaj tyëjkëdë arkoty oˈktääytyë dëˈën extëmë netyë Dios të jyënaˈany, yëˈëyë tsoktë diˈibë nety jap arkoty.

Noˈee mëdë yˈuˈunk yˈënäˈk yajxon ja arkë dyaˈoˈoyëdë. Pääty ja arkë myëbëdëˈkë ja nëë ta ojts kyënaantsoˈonë. Ok pawinmayë net wiˈix kyëxeˈky ko tyuunäjxy ets ja xëë pyëtseemy, jeˈeyë yajnasˈijxë xitsoo yatsoojë mëj mejny. Diˈib jeˈeyë këxëˈk yëˈë ja arkë kyënanëdity mejnywyingëjxy.

Kyaj nety pënë päjkˈyeny jyaˈay pën nyekyˈaxëktunëbë jäˈäy. Të nety niˈamukë yˈoˈktäˈäytyë mëdë tyääk ets mët niˈamukë axëkjäˈäy. Per ¿wiˈix jyäjttë ja tyeetyëty?

Ja päjkˈyeny jyaˈayëty kyaj tteetyˈäjttë naxwinyëdë jäˈäy. Yëˈë tyeetyˈäjttë anklësëty diˈib nayajjëmbijtëdë extëmë yetyëjkën yä Naxwiiny. Pääty, ko myiiny ja Ayoˈonduu kyaj yˈoˈktë extëmë wiingatypyë jäˈäy. Nyayajjëmbijtëdë jatëgok extëmë anklës ta jyëmbijttë tsäjpotm. Perë Dios kyaj tnekynyaˈijxy ets yˈittët jam tsäjpotm mëdë wiingatypyë yˈanklës. Ta yëˈë ojts yˈanklësˈäjtëndë Satanás. Mä Biiblyë ja jap yajxëëmoˈoytyë kaˈoybyëty.

Ta netë Dios dyajnäjxyë poj mä ja mejny, ta ja nëë jyënäjk tsoˈony. Kyum mëgoxk poˈo ta ja arkë nyaxkëdaky mä tuˈugë kopk. Kanäk xëë nyajxy, ets ninëˈënë nety jap arkoty yˈijxtë wiˈix nyiwatstääjy ja tun kopk. Ets ja nëë ta jyënajky wanaty wanaty.

Ok ta netë Noˈee tnasmäjtsë tuˈugë yëk joon diˈib xyëˈäjtypy jooky. Jeˈeyë waanë ojts kyaagëdity ta jatëgok jyëmbijty ets kyëxkeky mä ja arkë. Ets xëmë dëˈën nyejxy ets jyëmbity jatëgok yëˈko kyaj tpatyë lugäär mä kyakwëˈëmët.

Noˈee yëˈë nety yˈixaampy pën të ja nëë tyëˈëtsy, pääty tnasmäjtsë tuˈugë pak. Perë tyäˈädë pak nandëˈën jyëmbijty yëˈko kyaj tpaty mä kyakwëˈëmët. Mä ja myëmajtskˈokpë tnasmatsë, ta jyëmbijty mët tuk jëbipyë ujtsˈääy tˈatsemyˈaty. Të nety ja nëë kujk jyënaky. Noˈee ta myëdëgëkˈokpë tnasmäjtsë tyäˈädë pak, taanëm tpatyë lugäärë tëˈëtspë mä kyakwëˈëmët.

Ta netë Dios tˈanmääyë Noˈee: Pëtsëm arkoty. Mëbëtsëmë mfamilyë ets tëgekyë jëyujk animal. Të nety yˈijnëdë tuk jëmëjt naxy jap arkoty. ¡Ok pawinmay wiˈix jotkujk jyantsy nyayjäˈäjëdë ko pyëtsëëmdë juuky mä ja arkë!