¿MNIJÄˈÄP ti txëˈäjtyë tyäˈädë kiixy? Ja txëˈäjty Rebekʉ. Ets diˈib yam nyimiimpy yëˈë Isa̱a̱ diˈibë nety nyaˈayˈataampy. Min nˈokˈijxëm wiˈixë Isa̱a̱ tpatyë tyäˈädë nyëdoˈoxy.

Abra̱a̱n yëˈë myäänk tyukpëkan tuˈugë kiixyë oyjyaˈaybyë. Kyaj ttsojky etsë Isa̱a̱ tpëkët ja toxytyëjk diˈib tsënaapy Kanán, yëˈko kyaj tˈawdattë Jyobaa. Päätyë Abra̱a̱n tmëjwoojy tuˈugë tyuumbë ets tˈanmääjy: Nëjx Arán mä tsyëënëtsë njiiky nmëguˈuk ets jam xywyowët tuˈugë kiixy diˈibëtsë nmäänk pyëkëp.

Ta ja Abra̱a̱në tyuumbë tyuˈudëjkë mët nimäjkë kameyë. Ko jyäjttë Arán, ta ojts tyuˈuboˈxtë mä tuˈugë nëgoondakn. Të nety tsyuˈujënë ets ja mä ja toxytyëjkëty myindë nëgoombë. Pääty ja Abra̱a̱në tyuumbë tmënuˈkxtakyë Jyobaa ets tˈanmääjy: Tadë toxytyëjk diˈibëts xyajnëˈukp ets diˈibëtsë ngameyë yajnëˈuktaapy yëˈë diˈibë nety mijts të xywyinˈixy ets tnëdoˈoxyˈatëdë Isa̱a̱.

Waanë yˈijty ta Rebekʉ myiiny nëgoombë. Ko ja Abra̱a̱në tyuumbë yˈamdoojë nëë ta dyajnëˈuky ets ta nandëˈën tyëjkë nëëjuˈtpë ets dyajnëˈuktääyë kameyë. Mëk tyuuny yëˈko kameyë extëm kom tyim nëˈuknëdë.

Ko dyajnëˈuktääjy ja kameyë, ta ja Abra̱a̱në tyuumbë dyajtëëjy ja Rebekʉ ti txëˈatyë tyeety ets pën mbäät yajjäjtaˈagyëty. Ta yˈatsoojy ko yëˈë tyeetyˈajtypyë Betuel ets ko tamë lugäär mä jyäjtäˈägët. Ja Abra̱a̱në tyuumbë nyijäˈäbë nety ko Betuel yëˈë tyeetyˈajtypyë Nakoor, ets ko Nakoor tukaˈax mëdë Abra̱a̱n. Pääty nyaygyoxtënääytyakë ets tmooyë dioskujuyëmë Jyobaa ko nety të myëjäˈtyëty mä ja jyiiky myëguˈugë Abra̱a̱n.

Ko jyäjttë mä ja Rebekʉ tyëjk, ta ja Abra̱a̱në tyuumbë tˈanmääyë Betuel mëdë Laban ja myëgaˈaxë Rebekʉ, ko yëˈë nety jyawowaambyë Rebekʉ ets tpëkëdë Isa̱a̱. Betuel mëdë Laban ta jyënandë ko oy, oy twowëdë Rebekʉ. Per ta dyajtëëdë Rebekʉ pën nëjxäämp ets tpëkëdë Isa̱a̱, yëˈë yˈatsoojy ko oy, oy nyëjxët. Pääty ja kum bom tsyoˈondë kameyëkëjxy, ets ta ojts jyëmbijnëdë Kanán.

Ko jyäjttë Kanán të nety tsyuˈujënë. Ta Rebekʉ tˈijxy ko tam tuˈugë yetyëjk yoˈoyëdity, yëˈëdëmë netyë Isa̱a̱. Ets ko ja Isa̱a̱ tˈijxyë Rebekʉ ta jyantsy xyondaky, pes të netyë tyääk yˈoˈknë tyëgëk jëmëjtëp ets yˈaknimääjy yˈaknidajpyë nety. Per ko ojts pyëjknë mëdë Rebekʉ ta jatëgok ojts jyotkujkënë.