Moisés yëˈë diˈib yajpëtsëëm ja israelitëty jap Ejiptʉ ets ojts tmëjäˈty axtë mä ja Sinaˈii kopk, mä Dios dyajky ja yˈanaˈamënë. Ok ta ja Moisés tkejxy nimäjmajtskë yetyëjk ets nëjx tniˈijxy ja nax diˈib Kanán. Per ja nimäjkpë kyaj oy myaytyaktë. Pääty ja israelitëty jyëmbitandë jatëgok Ejiptʉ. Ets mët ko kyaj tmëdäjttë ja mëbëjkën, ta Dios tyukumëdoojëdë ets 40 jëmëjt tsyënääyëdijttë mä ja lugäärë äänëˈëk tëtsëˈëkpë.

Tim ok, ta Joswee yajwinˈijxy ets yëˈë tmëdëkët ja israelitëty jam Kanán. Jyobaa yëˈë tyuunë mëjˈäjtënë ets mbäät ja nax käjpn tjaˈabëktë. Ojts dyajtëˈëtsy ja Jordán mëj nëë, ojts ja Jerikoo gäjpnë nyabots dyajjijtäˈäy, ets ojts ja xëë dyajwäˈkwëˈëmë mä nety tsyiˈidanë. Tëdujk jëmëjt nyajxy ets ja israelitëty tpëjkëtyaaytyë ja nyaxë jäˈäyëty diˈib Kanán.

Jam Israel yëˈë net ojts yˈanaˈamdë fesëty, Joswee yëˈë diˈib jawyiin tuun fes. Ja ojts yˈanaˈamdë ja fesëty 356 jëmëjt. Ok nˈaknijawëyäˈänëm mä wiˈix jyukyˈäjttë näägë fesëty, extëmë Barak, Jedeon, Jeftee, Sansón etsë Samwel. Nandëˈën nijawëyäˈänëm näägë toxytyëjk diˈib jukyˈäjttë, extëmë Raap, Debora, Jael, Rut, Noemii etsë Dalila. Nëˈën tëgekyë tyäˈädë MYËDËGËK Peky xynyijawëyaˈany, ja nyajxyë tiempë 396 jëmëjt.