OK IXË tyäˈädë täjk diˈib yam të pyëjy ets të tyëëmpˈaty. Yëˈë Arongë tyäjk. Mä tuˈugë ux ojts pyëjˈyë tyäˈädë täjk ets tyëëmpˈäjty. Min nˈokˈijxëm tiko.

Ja israelitëty jekyë nety kujk tsyënääyëdijnëdë mä ja lugäärë äänëˈëk tëtsëˈëkpë, ets tam nääk diˈib kyaj tnekytsyoktë etsë Moisés yˈitët wintsën, ets ja Arón tniwintsënˈatët ja saserdotëty. Koree yëˈë diˈib dëˈën winmääjy mëdë Datan, Abiram ets mët ja 250 israelitëty diˈib nyiwintsënˈäjttëp ja käjpn. Pääty ojts tninëjxtë Moisés ets tˈanmääytyë: ¿Tiko mijts mnayajnaxyëty këjxm mä niˈamukë ëëtsëty?

Ta Moisés tˈanmääyë Koree mëdë jyaˈayëty: Bom jopy mindë mä Diosë tyëjk, mëmindë diˈib päˈäkxuˈkp extëmë poom etsë mˈabëjkënë mä xynyoˈogäˈändë, ets nˈijxëm pënë Jyobaa wyinˈijxypy.

Ja kum bom ta Koree mët ja 250 jyaˈayëty myiindë mä ja Diosë tyëjk. Nandëˈën myiindë jäˈäyëty diˈib pyuwäˈkëdëbë Koree. Jyobaa ta jyantsy jyotˈambejky ets jyënany: Katë xymyëwingondë jyëën tyëjkë tadë axëkjäˈäyëty, ets katë ti xytyondë diˈib yëˈë jyaˈäjttëp. Ta ja israelitëty myëdoodë ets tmëjagamgaktë ja jyëën tyëjkë Koree, Datan etsë Abiram.

Ta net ja Moisés tˈanmääjy ja israelitëty: Tyamë net xynyijawëdët pënë Jyobaa të twinˈixy. Ko yˈawäˈätsëdë nax ets tjëˈëndäˈäyëdë axëkjäˈäy.

Ko ja Moisés dëˈën jyënäändääjy, ta ja nax yˈawatsy ets tyëjkëtyaajy nääxoty tëgekyë diˈibë nety myëdäjtypy ja Koree, Datan etsë Abiram, ta ja nax yˈadijky. Ko ja israelitëty tmëdoodë wiˈix ja jäˈäy jyantsy yäˈäxtë diˈib ja nax jëˈënëdëp, ta yaxkaktë: ¡Nˈokkakëm! ¡Ko nandëˈënë nax xyjëˈënëm!

Koree mët ja 250 jyaˈayëty tamë nety tabernakulo tëjkwiiny. Ta Jyobaa tkejxyë jënˈyaˈank, ets tyooytyaaytyë niˈamukë. Ta net tˈanmääyë Elyaza̱a̱r ja myäängë Arón, ets dyajmujktäˈäyët ja oˈkpë yˈabëjkënë mä nety të tnoˈoktë diˈib dëˈën extëmë poom, ets dyajtukˈëëtsët ets yëˈë mëët dyajnitukët ja lugäär mä yajnoˈogyë jëyujk animal. Tyäˈädë yëˈë tyukjamyatsëp ja israelitëty ko yëˈëyë Arón mëdë yˈuˈunk yˈënäˈk mbäät tyundë saserdotë mä ja tabernakulo.

Perë Jyobaa yëˈë yajxon tyukjaygyukëyanë israelitëty ko yëˈë dëˈën të twinˈixyë Arón mëdë yˈuˈunk yˈënäˈk ets tyundët saserdotëty. Pääty tˈanmääyë Moisés: Waˈan tmëminyë tyäjk pënaty nyiwyintsënˈäjtypy tuˈuk tuˈugë familyë mëdë nyidëëmp nyiˈääts. Mä Leví tyëëmp yˈääts yëˈë Arón myëminëbë tyäjk. Ta net xypyëjtäˈägët tëgekyë täjk mä tadë kääxë diˈib jap ijtp mä tabernakulo. Etsë tadë jäˈäy diˈib pëjpë tyäjk yëˈëtsë nety të nwinˈixy ets tyunët saserdotë.

Ko ja kum bomë Moisés tˈijxy, ¡yëˈë ja Arongë tyäjk të pyëjy ets të tyëëmpˈaty! ¿Mbejkypyë netë kuentë tiko Jyobaa ojts dyajpëjˈyë Arongë tyäjk?