¿TË XYˈOKMËDOYˈÄJTPË tuˈugë burrë kyajxy? Kyaj, ¿këdii? Pesë jëyujk animal kyaj kyäjxtë. Perë Biiblyë myaytyakypy tuˈugë burrë diˈib ojts kyajxy. Min nˈokˈijxëm wiˈix tyuun jyäjtë.

Ja rey Balak diˈib anaˈamp Moˈap tsyëˈkë ja israelitëty, yëˈko tamë nety tyëkëyanëdë Kanán. Pääty tnigajxë tuˈugë wijy jyaˈay diˈib xyëˈäjt Balán, ets nëjx ttuknikäjxpetyë ayoˈon ja israelitëty. Tˈawäˈänë mayë meeny, pääty ja Balán ttukwaˈtspejty ja byurrë ets ojts tninejxy ja Balak.

Jyobaa kyaj ttsojky etsë kyäjpn nëjx yajtuknikäjxpetyë ayoˈon. Pääty tkejxy tuˈugë anklës mëdë yˈespäädë ets tˈawäˈktukëdë Balán. Balán kyaj netyë tˈijxpaty ja anklës per ja byurrë yˈijxpat. Pääty tmëjagamgekyë anklës, ok ta axtë nyaygyoˈkë. Balán ta jyantsy jotˈambejky, ets ta tkepywyojpy ja byurrë.

Ta netë Jyobaa ojts dyajkajxy ja burrë ets ja Balán tmëdowët. Tˈanmääjy ja Balán: ¿Wiˈixëts mijts të nduny kots nëgoo xytyim wojpnë?

Ta ja Balán yˈatsoojy: Tsuu lokëts mijts xyˈixy, ¡koxyëbëts nˈokmëdatyë nˈespäädë tyamyëxyëbëts mijts nyaˈooky!

Ta ja burrë yajtëëjë: ¿Tëts mijts dëˈën nˈoktuumbë?

Ta ja Balán yˈatsoojy: Kyaj.

Ta netë Jyobaa ttukˈijxy ja Balán ko tam ja anklës tyanë tuˈääjy mëdë yˈespäädë. Ta ja anklës yˈanmääyë: Të nminyëts etsëts mijts nyajtuˈudukäˈäny, ets kyaj nëjxë israelitë xytyuknikäjxpetyë ayoˈon. ¿Tiko të xywyopyë mburrë? Koxyëp të mgamëjagamgeˈegyëty tëxyëbëts mijts nyaˈooky, perë tadë mburrë kyajxyëbëts wiˈix të nduny.

Ta ja Balán jyënany: Tëts nbokytyuny. Kyajts të nˈixy pën ja nety mdanë tuˈääjy. Ta ja anklës yajnäjxë, ets ojts tninejxy ja Balak. Ets oy tjatuknikäjxpatany ja ayoˈonë israelitëty, Jyobaa kyaj tnaˈijxy, yëˈë tyuun ets ja Balán tkunuˈxët tëgëk ok ja israelitëty.