¿TIDËN yam mëët kyutëgoyë tyäˈädë Jerikoo gäjpn? Dëˈënxyëp extëm tuˈugë bombë të yajtukukäˈtseˈeky. Per mä tadë tiempë kyaj nety yaˈixyˈatyë bombë. ¡Yëˈë ja tuˈugë mëjˈäjtënë diˈibë Jyobaa tyuun! Min nˈokˈijxëm wiˈix tyuun jyäjtë.

Jyobaa tˈanmääyë Joswee: Mijts mëdë mtsiptuumbëty mnaˈawdittëbë Jerikoo gäjpn. Tëdujk xëë xynyaˈawdittët, tëgokatyë tuˈukpë xëë. Mënëjxtëbë tadë kääxë kajxyˈatypyë. Ets jëxtujkë saserdotë yoˈoytyët jayëjp ets ttukxuˈuxtëdë tsäjkäwäj.

Mä myëjëxtujk xëë, ja xynyaˈawdittët jëxtujk ok. Ets ko xynyaˈawdijtäˈäytyët ta net jekyë tadë saserdotëty ttukxuˈuxtëdë tsäjkäwäj, ets myaxkaˈaktët dëˈën extëm ko mtsiptundë. Ets ta tadë käjpnë nyabots jyitandäˈäy.

Ta Joswee mëdë jyaˈayëty ttuundë dëˈën extëmë Jyobaa jyënany. Ak amonyë ja käjpn tnaˈawdijttë. Yëˈëyë jeˈeyë yajmëdoo ko ja tsäjkäwäj yajtukxuˈuxy ets ko ja teky nyojktaˈaky. Mëk ja jäˈäy jyantsy tsyëˈkëdë diˈib tsënääytyëp Jerikoo. ¿Mˈijxypyë tyäˈädë tejxynyë tsaptspë diˈib jam këxotsy mä bentanë? ¿Pënë tyäˈädë byentanë? Yëˈë Raap. Raap tyuun extëm ja nimajtskpë käjpn niˈijxpë yˈanmääyë. Yajtuˈukmujktääyë fyamilyë ets yˈijxtë wiˈix tijaty tyuun jyäjtë.

Taanëmë net mä ja myëjëxtujk xëë ko tnaˈawdijtääytyë jëxtujk ok, ttukxuxtë ja tsäjkäwäj ets ta yaxkaktë extëm ko tsyiptundë, ta ja käjpnë nyabots jyijtääjy. Ta Joswee jyënany: Yaˈooktë niˈamukë jäˈäy ets noˈktäˈäytyë tëgekyë, yëˈëyë kyaj xynyoˈoktëdë oorë, platë, koobrë etsë yerrë, yëˈko yëˈë jap yajmënëjxäˈäny mä tabernakulo.

Ta net ja Joswee tˈanmääjy ja nimajtskpë käjpn niˈijxpë: Nëjx yajpëtsëmë Raap mët niˈamukë fyamilyë. Dëˈën ja Raap tsyoktë mëdë fyamilyë extëm ja käjpn niˈijxpë yˈanmääyëdë.