¿MˈIJXYPY ti yamë jäˈäy tyuundëp? Nëˈuktëp yam. Yëˈë israelitëty diˈib tsiptuundëp. Ets diˈib jam windënääyëp yëˈë fes Jedeon. Yëˈë jam yˈijxypy wiˈix nyëˈuuktë.

Ok ix yajxon ko tadë jäˈäy tëgatsyaty jam nyëˈuuktë. Tam diˈib nëgukoodëp, ets tam diˈib naytyukˈawäˈxëdëbë nëë ets tˈixtë ti tuun jäjtëp. Diˈib naytyukˈawäˈxëdëbë nëë yëˈë dëˈën oy nëˈuktëp, yëˈko Jyobaa të nety tˈanëëmë Jedeon ko yëˈëyë yajwëˈëmëbë jäˈäy diˈib ijxëˈkp mä jam nyëˈuuky, ets diˈib kyaj ta jyëmbijtääynyëdët mä tyëjk. Min nˈokˈijxëm tiko.

Ja israelitëty ojts jyotmaybyäättë jatëgok yëˈko kyaj tmëmëdoodë Jyobaa. Axëëk jyantsy tyuunëdë madyanitëty ets kyaj tnekymyëmadaktë. Pääty tˈamdoodë naybyudëkë Jyobaa, ets ta Jyobaa pyudëjkëdë.

Jyobaa ta tˈanmääyë Jedeon etsë tsyiptuumbëty dyajnaymyukëdët, ta Jedeon dyajnaymyujkë 32,000 tsiptuumbëty. Per ja diˈib mëët tsyiptunäˈändë ja nyimayëty 135,000. Perë Jyobaa ta tˈanmääyë Jedeon: Nimay xymyëdatyë mtsiptuumbëty. ¿Tiko dëˈën tˈanmääjy?

Yëˈko pën madaktëp ja israelitëty mbäät wyinmaytyë ko yëˈë këˈëm madaktëp ets ko kyaj tim tsojkëdë Jyobaa nyaybyudëkë ets myadäˈäktët. Päätyë Jyobaa tˈanmääyë Jedeon: Anëëmë niˈamukë pënaty tsëˈkëdëp ets jyëmbijtäˈäytyët mä tyëjk. Ko ja Jedeon tˈanmääjy dëˈën ja tsyiptuumbëty, ta jyëmbijttë 22,000. Ta jeˈeyë ojts wyeˈemy 10,000 ets tsyiptundët mët ja 135,000.

Per, okmëdowë net wiˈixë Jyobaa tˈanmääyë Jedeon: Nimaynyëmë mtsiptuumbëty yˈakweˈemy. Pääty mënëjxtë nëˈagëˈëy ets nyëˈuuktët, ets niˈamukë diˈib nëgukoodëp xykyajxtäˈäytyët mä tyëjk. Ta netë Jyobaa yˈanmääyë: Ëjts diˈib mijts nyajmadäˈägaampy mëdë tyäˈädë 300 mtsiptuumbë diˈib kyaj të nyëgukowdë.

Ta jyajtyë tiempë ets tsyiptunäˈändë. Jedeon ta dyajnaywyäˈxë tëgëk peky ja tsyiptuumbëty. Ta tmoojy këjk tuˈugë tsyäjkäwäj xuxn, ets mët këjk tuˈugë tyuˈts diˈib myëdäjtypy, dëˈën extëmë tsin jëën. Ta ko ojts tsyuˈpë ta dyajnadujktääytyë ja myëtsip mä nety jam të nyaynyikojëdë. Ta net ttukxuxtë ja tsyäjkäwäj ets ja tyuˈts ojts tpuˈudë, ets yaxkaktë: ¡Tyäˈädë tsip yëˈë tsyipë Jyobaa mëdë Jedeon! Ta ko ja myëtsipëty ojts jyotwijtë kyaj tnijäˈäjëdë ti tuun jäjtëp ta tsyëˈkëdë. Ta niˈamukë kyaktääytyë ets ja israelitëty myadaktë.