¡OK IX! ¿Ti yam tyuundëbë jäˈäy? ¡Yëˈë yˈawdäjttëp tuˈugë tsäjkää maxuˈunk! ¿Tidën ko dëˈën jam yˈadëˈëtstë?

Ko ja Moisés kyaj yˈoktsojkjënäjknë mä ja kopk, ta ja israelitëty nyayjënanëdë: Kyaj nijäˈäjëm ti ja Moisés të jyatyëty. Min nˈokˈyaˈoˈyëm tuˈugë dios diˈibë net yä xyajpëtsëˈëmëm.

Ta Arón, ja myëgaˈaxë Moisés jyënany: Oy, yajjënäjktäˈäytyë tëgekyë mˈoorë tatsktëy ets yajmindë. Ta dyajjënäjktääytyë ets tmooytyë Arón, ta ja Arón dyajtukˈëˈtsë ja oorë ets dyaˈoˈoyë tuˈugë awinax dëˈën extëmë tsäjkää maxuˈunk. Ta ja israelitëty jyënandë: ¡Tyäˈädë dëˈën nDiosˈäjtëm diˈib të xyajpëtsëˈëmëm Ejiptʉ! Ta tjantsy tyuundë tuˈugë mëj xëë ets tˈawdäjttë ja tsäjkää maxuˈunk diˈib oorë.

Ko Jyobaa dëˈën tˈijxy, ta jyantsy jotˈambejky. Ta tˈanmääyë Moisés: Jotëgoy jëjptäˈäk. Mëk axëëk jap yˈadëˈëtstë israelitëty. Tëts ja nˈanaˈamënë tjäˈäytyëgoytyë ets yëˈë jap yˈawdäjttëp tuˈugë tsäjkää maxuˈunk diˈib oorë.

Ta netyë Moisés jyënajky jam kopkëjxy. Ets ko jap jyajty ta tˈijxy ja jäˈäy tjantsy wyinˈëw tjantsy wyinˈatstë ja tsäjkää maxuˈunk. Moisés ta jyantsy jotˈambejky ets tnaxkubuˈujëtyaajy ja tsää mä nety ja Dios të tkëxjäˈäy ja yˈanaˈamën. Ta net ojts tninejxy ja tsäjkää maxuˈunk ets dyajjëmbijty puˈxm.

Axëëk dëˈën ja käjpn jyantsy adëtsy. Päätyë Moisés tˈanmääjy ja yetyëjkëty ets tpëjtäˈäktëdë yˈespäädë ets dyaˈooktët ja axëkjäˈäy diˈibë nety të tˈawdattë ja tsäjkää maxuˈunk. ¡Pääty ja nidëgëk milë jäˈäy yˈoˈktë! ¿Këdii yëˈë tyäˈädë xytyukˈijxëm ko tsojkëp naygyuentˈäjtëm ets yëˈëyë nˈawdäjtëmë Jyobaa ets kyaj wiink dios?