KO JA Davit yˈanaˈam tsondaky jam Jerusalén, ta Jyobaa pyudëjkë ets ja tsyiptuumbëty myadäˈäktët mäjatyë tsip. Jyobaa të nety ttukwandaˈaky ja israelitëty ko tmoˈoyaˈany ja nax diˈib Kanán. Ets päätyë Jyobaa pyudëjkëdë ets tjaˈabëjktäˈäytyët ja nax.

Davit jantsy oy ojts yˈaneˈemy. Tsyojkë Jyobaa, pääty ko Jerusalén käjpn tjaˈabejky ta netyë dyajjäjtyë Jyobaa kyääxë kajxyˈatypyë. Ta jyënany nandëˈën ko tkojäˈänyë Diosë tyëjk ets jap yˈitët ja kääxë.

Ko waanë nyajxy ja tiempë, ta Davit ttuunyë mëj poky. Yëˈë nyijäˈäbë nety ko axëëk ko ti jäˈäy ttony tmëwäˈäny diˈib kyaj tjaˈajëty. Per mä tuˈugë ux, tamë nety tyëjknikëjxy yˈijxkeˈeky ko tkuˈijxnäjxy tuˈugë toxytyëjk jantsy tsuj diˈib xyëˈäjt Batˈseba, ja nyaˈay ja txëˈäjty Uriiʉs, tuˈugë Davitë tsyiptuumbë.

Davit mëk ttsojkyë Batˈseba ta tnigajxë ets yajmëminët mä ja tyëjk. Ja nyaˈay tamë nety jagam tsyiptuny. Ta ja Davit yˈijty tsyënääjy mët ja Batˈseba. Ok ta Davit tnijäˈäjë ko uˈunk päädäämp, ta jyantsy jotmaytyuktëjkë ets tˈanmääyë Joab ja diˈib nyiwintsënˈäjtypyë tsiptuumbëty etsë Uriiʉs tpëjtäˈägët tsip jëjpˈam ets yˈoogët. Ta ko yˈoˈky ja Uriiʉs ta Davit ojts tpëjknë Batˈseba.

Jyobaa ta ttukjotˈambejky mëkë Davit. Ta tkejxyë tyuumbë Natán ets ttukmëgäjxëdë pyoky. ¿Mˈijxypy yamë Natán mëdë Davit? Davit mëk axëëk nyayjäˈäjë ko nety dëˈën të yˈadëˈëtsy, perë Jyobaa kyaj yaˈoˈkë. Per ta yaˈanmääjy: Mët ko axëëk të mˈadëˈëtsy mëdataambyë net mëjwiin kajaa amay jotmay. ¡Ets mëjwiin kajaa Davit tpatyë amay jotmay!

Tim jawyiin, yëˈë oˈk ja yˈuˈungë Batˈseba. Ta netë Amnon ja Davitë kyaˈaxkopk määnk tˈaguanëˈäjty ja myëgaˈax diˈib xyëˈäjt Tamar ets mëët nyaygyoˈogëdët. Ko tnijäˈäjë Absalon ja tuˈukpë myäängë Davit ta jyotˈambejky ets dyaˈoˈky ja Amnon. Ok ta ja Absalon tˈëxtääjy mayë jyaˈay diˈib yajtëkëdëp rey. Ta tsyiptuundë per yëˈë Davit madak, Absalon ta yˈoˈky. Mëjwiin kajaa Davit tpatyë amay jotmay.

Mä tëgekyë tyäˈädë dëˈën tyuun jyäjtë ja mä Batˈseba tpaty ja tuˈugë yˈuˈunk diˈib xyëˈäjt Salomonk. Ta ko nety ja Davit të myëjäˈäyënë ets pyëjkënë, ta ja myäänk Adonias jyatëkëyany rey. Perë Davit ta tˈanmääjy tuˈugë saserdotë diˈib xyëˈäjt Sadok ets ttukutaamëˈëgëdë aseytë Salomonk ets dëˈën yajnijawët ko yëˈë diˈib reyˈatäämp. Ko waanë yˈijty ta ja Davit ojts yˈoˈknë, ja netyë jyëmëjt tmëdaty 70. Ja ojts yˈaneˈemy 40 jëmëjt. Ta netë Salomonk tyëjkë rey.