JA FILISTEETY tamë nety jatëgok tsyiptunäˈändë mët ja israelitëty. Nidëgëëk ja Davitë yˈajtsy ojts nyëjxtë tsiptuumbë mët ja syoldäädëtyë Saúl. Päätyë Jesee tˈanmääyë Davit: Nëjx moˈoyë kyaˈay yˈukënë mëgaˈaxëty. Ets xyˈixët wiˈix jam jyattë.

Ta ko ja Davit jyajty mä nety jam të nyaynyikojëdë, ta ojts nyejxy pëyeˈegyë jam tsipjëjpˈam ets tpäädäˈäny ja myëgaˈaxëty. Ko jam jyajty tamë nety të pyëtsemy ja filistee diˈib xyëˈäjtypy Goliat, diˈib nyixiky tyukxikypyë israelitëty, dëˈënë nety të ttuunkˈaty 40 xyëë, jopy ets tsuu jam myiny ets jyënaˈany: Winˈixtë tuˈugë jäˈäy diˈibëts mëët ntsiptunët. Pën xymyëmadakpëts ets xyaˈoˈkpëts tats miitsëty xytyuumbëˈattët, per pën ëjts madakp ets nyaˈoˈkypyëts tats miitsëty nduumbëˈattët. Aber pën mbattëp pën, diˈibëts mëët ntsiptunët.

Davit ta dyajtëëjy niduˈuk nimajtsk ja tsiptuumbë: ¿Ti yajmoˈoyäämp ko pën dyaˈoogëdë Goliat ets dyaˈawäˈätspëtsëmëdë Israel mä yajnixiˈiky yajtukxiˈiky?

Ta tuˈuk ja tsiptuumbë yˈatsoojy: Saúl yakaambyë mëkjäˈäyˈäjtënë mëjwiin kajaa, ets nan yakaambyë nyëëx ets tpëkëdë tadë jäˈäy diˈib yaˈoˈkypyë Goliat.

Per niˈamukë ja israelitëty ak tsyëˈkëdëbë Goliat yëˈko extëm tyim päjkˈyenyˈäjnë. Ja yenyëty naa tëgëk metrën, ets tam tuˈugë tsyiptuumbë diˈib kyiipy ja pyujxn diˈib kuwanëp.

Nääk ja tsiptuumbë ta ojts tˈawanëdë ja rey Saúl ko Davit tsiptuunäämp mëdë Goliat. Pääty ja Saúl tˈanmääjy ja Davit: Kyaj xymyëmadäˈägët yëˈko mutsknëm, tadë Goliat taayëmë tsyiptuunë. Davit ta yˈatsoojy: Ëjts tëts nyaˈooky tuˈugë osë ets tuˈugë kää diˈibëtsë nety ndeetyë byorreegë tsyëëmgakëp. Ets tyamë tadë filistee nandëˈënë net yˈoogët. Jyobaa yëˈëts diˈib xypyudëkëyäämp. Ko dëˈën ja Davit jyënany, ta Saúl yˈanmääyë: Nëjx ets waˈanë Jyobaa mbudëkëty.

Davit ta jyëjptaky nëˈagëˈëy ets tkoneˈky mëgoxkë tsääjë tëˈxkatypyë ta tpëjtaky byolsoty. Ta pyatëjkë mä nety tsyiptunäˈäny mëdë Goliat. Goliat kyaj tmëbëkany pën yëˈë dëˈënë tadë mixyuˈunk diˈib mëët tsyiptunäˈäny. Wyinmääjy ko pojënë dyaˈoogëdë Davit.

Pääty tˈanmääjy: Min ja yamtsoo etsë tadë mniniˈx mgëbäjk nmoˈoyëdëtsë jëyujk animal ets twintsuˈutsët. Per ja Davit ta tˈatsoojy: Mijts xynyiminyëts mëdë mˈespäädë etsë mlansë, per mijts ninejxy xyëëgëjxmë Jyobaa. Tyamë Jyobaa mgëyakäˈänyëty, ets ëjts mijts nyajjëbijpkëdäˈägaampy.

Ta ja Davit ojts nyejxy pëyeˈegyë mä Goliat. Ta tjuˈty jap byolsoty ja tsää ets tpëjtaky mä ja tyiˈpxën, ta net tjëduujy mët tëgekyë jyot myëjää. ¡Ta ja tsää tyëjkë mä Goliatë wyimbok, ta ojts kyaˈay ooky! Ko ja filisteety tˈijxtë ko të ja tsyiptuumbë mas kumëjääbë kyaˈay, ta kyaktääytyë. Ta ja israelitëty pyatsoˈonëdë ets myadaktë mä ja tsip.