KO JA rey Jeroboˈan ojts yˈoˈknë, tuˈuk tuˈugë netë rey diˈib tëjkë anaˈambë mä ja nimäjkpë familyë mëdë tyëëmp yˈääts ak tim axëëk ojts yˈanaˈamdë. Per pën mas axëëk ojts yˈaneˈemy yëˈë rey Akab. ¿Mnijäˈäp tiko? Tuk nax yëˈko yëˈë nyëdoˈoxyˈäjt tuˈugë reyna diˈib mëk axëkjäˈäy, txëˈäjty Jezabel.

Jezabel kyaj yˈisraelitëty. Yëˈë tyeetyˈäjtë rey diˈib Sidón. Jezabel yëˈë yˈawdäjtë dios Baal diˈib kyaj tyëyˈäjtënëty, ta ttukˈawdäjtyë Akab ets nandëˈën mayë israelitë. Jezabel yˈaxëkˈijxë Jyobaa ets ojts dyaˈooky mayë Diosë kyugajpxy, tam diˈib nayuˈtsëdë këdiibë yˈooktët. Nandëˈënë Jezabel axtë yaˈoˈkypyë ijtyë jäˈäy ets tjaˈbeky ti ja jäˈäy myëdäjtypy.

Tuˈugë xëë ja rey Akab axëëk nyayjäˈäjë. Päätyë Jezabel yajtëëjë: ¿Tiko axëëk mnayjawëty?

Ta Akab yˈatsoojë: Yëˈko yëˈëtsë Nabot të njaˈanëëmë etsëtsë yˈuubës kam xytyukmëdoogët. Per tats të xyˈatsoy, ko kyajts mbäät xymyoˈoy.

Ta Jezabel yˈanmääyë: Maˈxtuk ëjts mijts nmoˈoyëp.

Ta ja Jezabel tnijäˈäyë jäˈäyëty diˈib mëj ijttëp mä ja Nabotë kyäjpn ets tˈanmääjy: Waˈan majtskë yetyëjk diˈib axëkjäˈäy tjënäˈändë ko Nabot të tmëgäjxtëgoyë Dios etsë rey. Ta net xyajpëtsëmët mä käjpn ets xykyukäˈätstët.

Ta netyë ko Jezabel tnijäˈäjë ko të ja Nabot yajkukäˈätsy ta tˈanmääyë Akab: Tyam mijtsë netë tadë mˈuubës kam yëˈko të ja Nabot yˈoˈknë. ¿Këdii mëk axëëk yˈadëtsyë Jezabel ets nitëjkë yajtukumëdowët?

Pääty ko tiempë nyajxy, ta Jyobaa tkejxy tuˈugë yetyëjk diˈib xyëˈäjt Jeˈuu ets ttukumëdowëdë Jezabel. Ta ko Jezabel tnijäˈäjë ko ta myinyë Jeˈuu, ta nyaywyinˈujkë ets tsuj kyëxëˈëgët. Per ko Jeˈuu myiiny ets tˈijxyë Jezabel mä ja bentanë, ta tˈanmääyë jäˈäyëty diˈibë nety jam mëët: ¡Kujëbijpnaxtë! Ta ja jäˈäyëty tmäjtstë Jezabel extëm yam xyˈixy mä dibujë. Ta tkujëbijpnäjxtë ets ta yˈoˈky. Dëˈën kyugëjxë jyukyˈäjtënë ja reyna diˈib mëk axëkjäˈäy.