KOXYËP mˈokˈooky, ¿wiˈixyëbë mdääk nyayjawëty koxyëp jatëgok mjukypyeky? ¡Jantsy jotkujkxyëp nyayjawëty! Per ¿mbäädë oˈkpë jyukypyeky? ¿Të dëˈën yˈoktuun yˈokjäjtëbë?

Ok ix mä dibujë tadë yetyëjk, tadë toxytyëjk etsë mixyuˈunk. Tadë yetyëjk yëˈë kugajpxy Eliiʉs. Etsë tadë toxytyëjk yëˈë tuˈugë kuˈooky jyaˈay diˈib tsënääjy Sareptʉ ets tadë mixyuˈunk yëˈë yˈuˈunk. Tuˈugë xëë ta pyäˈämbejtyë tadë mixyuˈunk. Ta myëjtaky ets yˈoˈky. Ta Eliiʉs tˈanmääyë tadë toxytyëjk: Moogyëtsë tadë mˈuˈunk.

Eliiʉs ta tmëbatëjkë ja mixyuˈunk mä ja kuartë anikëjxypyë ets ta tkëxkoˈky myabajngëjxy. Ta net tmënuˈkxtakyë Jyobaa: Ay Jyobaa yajjukypyëkë tyäˈädë mixyuˈunk. ¡Ta ja mixyuˈunk xyajpejky ets ta jyukypyejky! Ta ja Eliiʉs tmëjënajkyë mixyuˈunk ets tˈanmääjy ja toxytyëjk: ¡Ok ix të ja mˈuˈunk jyukypyeky! Ta ja toxytyëjk jyantsy nyayjäˈäjë jotkujk.

Ja tuˈugë Jyobaa kyugajpxy ja txëˈäjty Eliseeʉ. Diˈib pyudëjkë Eliiʉs. Ko ja tiempë nyajxy ta Jyobaa nandëˈën tmooyë Eliseeʉ mëjää ets ttunëdë mëjˈäjtënë. Tuˈugë xëë ta ojts nyejxy mä ja Sunem käjpn, jam tam tuˈugë toxytyëjk diˈib wingëm tyim oyjyaˈayˈäjnë. Ok ta tyäˈädë toxytyëjk tpaty tuˈugë myäänguˈunk.

Tëgok mëjnë nety ja myäänguˈunk ko ojts nyejxy kamoty mä ja tyeety jam tyuny. Ta ajotkumonë yaxkeky: ¡Pëjkpëtsë ngëbäjk! Ta ojts yajmënejxy mä tyëjk per ta yˈoˈky. ¡Jantsy jotmaymyëëdë tyääk nyayjäˈäjë! Pääty ja uˈunktääk ojts tˈëxtäˈäy ja Eliseeʉ.

Ta ko ja Eliseeʉ jyajty, ta tyëjkë mä nety jap ja oˈkpë. Ta tmënuˈkxtakyë Jyobaa, ets ta nyaygyëxkoˈkë mä ja oˈkpë. Ta netyë ja mixyuˈungë nyiniˈx jyokxtëjkë, ets ta yˈantsyijëˈäjty jëxtujk ok. ¡Jantsy jotkujkë tyääk nyayjäˈäjë ko tyëjkë tëgoty ets tˈijxy ja yˈuˈunk të jyukypyeky!

Nëˈën kujkë tiempë nyaxy nimay kujkë jäˈäy yˈoˈknëdë. Ets may täj wyëˈëmdë jyiiky myëguˈuk etsë myëtnaymyaayëbë. Ëtsäjtëm kyaj mbäät nyajjukypyëjkëmë oˈkpë. Perë Jyobaa mbäät dyajjukypyeky. Ok nijawëyäˈänëm wiˈix dyajjukypyëkäˈäny miyonkˈamë jäˈäy diˈib të yˈoˈknëdë.