¿MNIJÄˈÄP tiko tyäˈädë yetyëjk yam nyuˈkxtaˈaky? ¿Ets tiko tadë noky të tnaskonë mä Diosë tyëjk? Tyäˈädë yetyëjk txëˈäjty Ezekiiʉs, yëˈë reyˈäjt jam Israel mä ja majtsk grupë jäˈäy mëdë tyëëmp yˈääts. Per ta net tpaty mëjwiin kajaa amay jotmay. ¿Mnijäˈäp tiko?

Yëˈko ja tsiptuumbëty diˈib Asirië nyimiinëdë ets yajkutëgoyanëdë. Jyobaa të nety tnaˈixy ets kyutëgoytyët ja mäjk grupë jäˈäy mëdë tyëëmp yˈääts mët ko axëëk yˈadëˈëtstë.

Ja rey diˈib Asirië ojts ttuknigexyë noky ja rey Ezekiiʉs. Ets yëˈë tadë noky diˈib yamë Ezekiiʉs të tpëjtaˈaky mä Diosë tyëjk. Tyukxikypy japë Jyobaa, ets nandëˈën jap yaˈanëëmë rey Ezekiiʉs ets nyaygyëyakëdët. Päätyë Ezekiiʉs tmënuˈkxtakyë Jyobaa: Ay Jyobaa, yaˈawäˈätspëtsëëmgëdëts mä tadë rey diˈib Asirië. Net niˈamukë nax käjpn tnijawët ko mijts tukpäjk mDios. ¿Myëdoodaa Diosë tyäˈädë nuˈkxtakën?

Ezekiiʉs oy ojts yˈaneˈemy. Kyaj axëëk yˈadëtsy extëm diˈib reyˈäjttë mä ja nimäjk grupë jäˈäy mëdë tyëëmp yˈääts, nan kyaj dyëˈënˈäjty extëmë tyeety Akas diˈib axëëk reyˈäjt. Ezekiiʉs myëmëdoo yajxonë Jyobaa yˈanaˈamënë. Pääty ko nyuˈkxtaktääjy ta ja kugajpxy Isaiiʉ yˈanmääyë wiˈixë netyë Jyobaa të jyënaˈany: Yëˈë rey diˈib Asirië kyaj tyëkëyaˈany Jerusalén, ets ni tuˈugë tsyiptuumbë mgamëwingonäˈänëdë. Ets nituˈuk kyamëjtujpatäˈäny kyamëjtiˈpxpatäˈäny mä tyäˈädë käjpn.

Ok ixë tyäˈädë dibujë diˈib yä abatkëˈëy. ¿Mnijäˈäp pënatyë tadë tsiptuumbë diˈib të yˈoˈktäˈäytyë? Yëˈë ja tsiptuumbëty diˈib Asirië. Jyobaa yëˈë kyajx tuˈugë anklës, etsë tyäˈädë anklës yëˈë yaˈoˈk mä tuˈugë ux 185,000 asiriëty. Ko dëˈën tˈijxy ja rey diˈib Asirië ta ojts jyëmbijnë.

Dëˈën kyaj kyutëgooytyë ja jäˈäyëty diˈibë netyë Ezekiiʉs yˈaneˈempy. Per tuk tiempë jeˈeyë jyotkujkˈäjttë. Pes ko ojts yˈoˈknë ja rey Ezekiiʉs, ta tyëjkë rey ja myäänk Manasés. Tyäˈädë Manasés mëdë myäänk Amon diˈib nandëˈën reyˈäjt, axëëk yˈadëtstë. Pääty tëgekyë naxwinyëdë tyuktujktääjy mëdë axëkˈäjtënë. Ta ko ja rey Amon ojts yaˈoogëdë tyuumbëty, ta net tyëjkë rey ja myäänk Josiiʉs mä ja majtsk grupë jäˈäy.