OK IXË Samwel tamë tyäˈädë yetyëjk ttukutaameˈegyë aseytë. Dëˈën ijtyë jäˈäy yajtuny ets kyëxeˈeky ko Jyobaa të wyinˈixyëty ets tyunët rey. Jyobaa yëˈë yˈanmääyë Samwel ets nëjx ttukutaameˈegyë aseytë Saúl. Yëˈë tuˈugë aseytë oybyë diˈib päˈäkxuˈkp.

Saúl dëˈën nyayjäˈäjë extëm kyaj nyitëkëty tyunët rey. Pääty tˈanmääyë Samwel: Ëjts jats nminy mä tyëëmp yˈäätsë Bejamingʉ, diˈib mas niwaanë mä israelitëty. ¿Wiˈix ko mjënäˈäny ndunëdëts rey? Jyobaa tyukjotkëdakë Saúl yëˈko kyaj nyayajnäjxë mëj. Pääty twinˈijxy ets tyunët rey.

Perë Saúl kyaj yˈayoobë jäˈäyëty, mëkjäˈäyë fyamilyë. Ets nan kyaj myutskuˈungëty, päjkˈyeny ets jantsy tsuj, ak kyejkyëjxyë jäˈäy pyäädëdë. Mëk nandëˈën jyantsy pyëyeˈeky, yëˈë tuˈugë yetyëjk diˈib kumëjää. Ja jäˈäyëty jantsy jotkujk nyayjäˈäjëdë ko Jyobaa twinˈijxyë Saúl ets tyunët rey. Niˈamukë jyantsy yaxkaktë: ¡Waˈan mëj tˈityë rey!

Ja myëtsipëtyë israelitëty kyaj pën mbäät myëmadäˈägëdë. Näämnëmë netyë Saúl tyëkë rey ko ja amonitëty nyibëdëˈkëdë. Perë Saúl ta dyajnaymyujkë nimayë tsyiptuumbëty, ets yëˈëjëty madaktë. Ja israelitëty jotkujk nyayjäˈäjëdë ko Saúl tˈreyˈäjttë.

Nyajxy kanäk jëmëjt, etsë Saúl yëˈë diˈib pyudëjkë israelitëty ets myadäˈäktët mäjaty tsyiptundë. Myëdäjt tuˈugë myäängë jotmëkpë, Jonatan. Jonatan nan pyudëjkë israelitëty ets myadäˈäktët mäjaty tsyiptuundë. Ja filisteety yëˈë dëˈën diˈib mas niˈigyë myëtsipˈäjttë Israel. Tuˈugë xëë, milˈamë filisteety tnibëdëˈktë ja israelitëty ets mët tsyiptunäˈändë.

Samwel ta tˈanmääyë Saúl ets yˈawixëdët axtë ko yëˈë jyäˈtët taanëm twintsëˈëgëdë Jyobaa. Perë Samwel kyaj tsojk jyajty. Päätyë Saúl jyawyiinˈäjty ets ojts tmooygyojy ja wintsëˈkënë Jyobaa mët ko tsyëˈkë ko ja filisteety tyëkëdët tsiptuumbë. Ta ko ja Samwel jyajty ta tˈanmääyë Saúl: Mijts kyaj të mëdoy, päätyë Jyobaa twinˈixäˈäny ja tuˈugë jäˈäy diˈib tunëp rey yä Israel.

Ok ta jatëgokë Saúl kyaj ojts myëdoogojpë. Ta Samwel yˈanmääyë: Mas oy ko nmëmëdoˈojëmë Jyobaa ets kyaj dyëˈënëty ko ndukwintsëˈkëmë oyatypyë borreegë. Ets mët ko kyaj të xymyëmëdoyë Jyobaa, yëˈë kyaj mnekyyajtunäˈänyëty rey yä Israel.

Tyäˈädë yëˈë xymyoˈoyëm tuˈugë ijxpajtën. Yëˈë xytyukˈijxëm ko jëjpˈam ets xëmë nmëmëdoˈojëmë Jyobaa. Nandëˈën xytyukˈijxëm ko tuˈugë jäˈäy diˈib oyjyaˈay mbäät ok yˈaxëkjäˈäytyaˈaky dëˈën extëmë Saúl. ¡Nˈawijxëm ets ninäˈä dëˈën ngajäjtëm!, ¿këdii?