KO JA Davit dyaˈoˈkyë Goliat, ta ja Abner diˈib nyiwintsënˈäjtypyë tsiptuumbëty ojts myënejxyëty mä Saúl. Saúl ta tpëjtakyë Davit ets nandëˈën tniwintsënˈatëdë tsiptuumbëty, ets tˈanmääjy tsyëënët mä tyëjk.

Ok ta jatëgokë Davit ojts nyëjxtë tsiptuumbë mëdë filisteety, ta ko jyëmbijttë ta ja toxytyëjkëty yˈëëdë: Saúl të dyaˈooky milˈam, perë Davit mäjk milˈam. Saúl ta tjäˈäjë naywyinaxë yëˈko niˈigyë ja Davit yajmëjkugäjxë ets kyaj dyëˈënëty yëˈë. Perë Jonatan ja myäängë Saúl kyaj tjäˈäjë naywyinaxë. Tsyojkë Davit, etsë Davit nan tsojkë nandëˈën. Pääty nyayˈanmääyëdë ko xëmë nyaymyayäˈänëdë.

Davit jantsy oy ttukoyë arpë, etsë Saúl yˈoymyëdoo extëm kyoy. Per tuˈugë xëë Saúl mëk tjantsy axëkˈijxyë Davit ets pääty tjatunany axëëk. Tamë netyë Davit ttukoy ja arpë ko ja Saúl tkäjpeˈkyë lyansë ets ttukjëduuyë Davit ets tˈanmääjy: ¡Tyamëts mijts nmëjkuˈpatäˈäny jam potsywyinm! Perë Davit ta tˈagooduty ja lansë. Ok ta jatëgokë Saúl ojts ttukjëduugojpë ja Davitë lansë. Davit ta tpejkyë kuentë ko tsojkëp nyaygyuentˈatëdët.

¿Mjamyejtsypy ti yˈawäˈänë Saúl tmoˈoyaˈany ja jäˈäy diˈib yaˈoˈkypyë Goliat? Yëˈë yˈawäˈänë nyëëx. Ok taanëmë netë Saúl tˈanmääyë Davit ko myoˈoyaampy ja nyëëx Mikal, per net pën yaˈoˈkypy mëgoˈpxë filistee. ¡Ok winmay! Saúl yëˈë dëˈën tsyojk ets ja filisteety dyaˈoogëdë Davit. Per kyaj dëˈën jyajty, päätyë Saúl dyajky ja nyëëx etsë Davit tnëdoˈoxyˈatët.

Tuˈugë xëë ta Saúl tˈanmääyë Jonatan ets niˈamukë ja tyuumbë ko yaˈoogaambyë Davit. Perë Jonatan ta yˈanmääyë: Katë wiˈix xytyunyë Davit. Yëˈë ninäˈä wiˈix mgatunyëty niˈigyë të mbudëkëty. Ojtsë jyukyˈäjtënë tpëjtaˈaky ayoˈon jëjpˈam ko dyaˈoˈkyë Goliat, ets ko dëˈën xyˈijxy ta mxondaky.

Saúl ta tjaygyujkë ko dëˈën ja myäänk yˈanmääyë ta jyënany ko kyaj wiˈixë Davit ttunäˈäny. Ta myiiny jatëgokë Davit mä Saúl ets tmëduuny jatëgok. Per ta jatëgok Saúl ttukjëduuyë Davitë lansë mä nety jam kyoy. Davit ta tˈagooduty, ets ta ja lansë yˈaguˈpë potsyoty. ¡Myëdëgëkˈok kujk dëˈën yˈadëtsnë! ¡Davit ta tpejkyë kuentë ko tsojkëp kyaˈagët!

Ja ux mä kyekyë Davit ta ojts nyejxy mä tyëjk, perë Saúl ta tkejxyë jäˈäy ets yaˈoogëdët. Mikal nyijäˈäjë ti nety ja tyeety tyunaampy. Pääty tˈanmääyë Davit: Kaˈagë tyäˈädë ux, yëˈko bom të nety mˈooky. Ta ja Mikal pyudëjkë ets kyaˈagët mä bentanë. Jëxtujk jëmëjtë Davit yuˈutsy jyëdijty mët ko ja Saúl yaˈooganë.