TË NETY kujk nyaxy mäjk jëmëjt mä ja rey Nabukodonosoor ojts tmënejxy ja israelitë ëxpekyatypyë jam Babiloñʉ. ¡Ets ok ixë net! Tam tyoy ja Jerusalén käjpn ets ja israelitëty diˈib kyaj të yˈooktë tam yajmënëjxtë tsimytsyënaabyë Babiloñʉ.

Jamyats ko ja kugajpxyëty jyënandë ko dëˈën tyunäˈäny jyatäˈänyëty pën ja israelitëty kyaj tmatstuˈuttë axëkˈäjtënë. Per ja israelitëty kyaj tmëmëdoodë ja kugajpxyëty. Jaˈayëm yˈawdäjttë ja diosëty diˈib kyaj tyëyˈäjtënëty ets kyaj tˈawdäjttë Jyobaa. Pääty nitëjkëdë yajtukumëdowët. Nijäˈäjëm tëgekyë tyäˈädë, yëˈko Esekyeel tkujäˈäyë tijaty axëkˈäjtënë nety ja israelitëty tyuundëp.

¿Mnijäˈäp pën Esekyeelˈäjt? Yëˈë tuˈugë mixy diˈibë Nabukodonosoor nandëˈën myënëjx Babiloñʉ, ja tiempë mä ojts tmënejxyë Daniel mëdë myëtnaymyaayëbëty, ja Sadrak, Mesak etsë Abednego. Ja mäjk jëmëjtë nety yˈaktëgoyëty mä kyutëgoyaˈany ja Jerusalén käjpn.

Jamë netyë Esekyeel yajpääty Babiloñʉ ko Jyobaa tyukˈijxë ja axëkˈäjtënë diˈibë nety tyuundëbë israelitëty jam Jerusalén. Tyäˈädë yëˈë tuˈugë mëjˈäjtënë diˈibë Jyobaa tyuun. Yëˈko Esekyeel kyaj nety jam tsyëënë Jerusalén ko yajtukˈijxy tijatyë nety jam tuun jäjtëp mä Jyobaa tyëjk. ¡Ets mëk axëëgë dëˈën diˈib ja Esekyeel yˈijx!

Jyobaa ta tˈanmääyë Esekyeel: Ok ix tijaty axëkˈäjtënë jäˈäy tyuundëp määtsë ndëjk. Ok ix potsykyëjxy të tnijääytyuˈuttë tsäˈäny etsë wiingatypyë jëyujk animal. ¡Ets ok ixë israelitëty yëˈë jam yˈawdäjttëp! Esekyeel tëgekyë tˈijxtääjy ti tuun jäjtëp ta tkujäˈäyë.

Jyobaa ta dyajtëëyë Esekyeel pën yˈijxypyë israelitëtyë wyintsën ti nety jam tyuundëp ayuˈutsyë. Esekyeel yˈijx ko tam 70 yetyëjk tˈawdattë dios diˈib kyaj tyëyˈäjtënëty, ets jyënäˈändë: Jyobaa kyaj xyˈijxëm, të muum wiinktsoo nyejxy.

Ta netë Jyobaa ttukˈijxyë Esekyeel näägë toxytyëjk diˈib jam mä tuˈugë tëjkˈää. Tam yˈuˈunyëdë tˈawdattë ja dios diˈib xyëˈäjtypy Tamus. Esekyeel ta nandëˈën tˈijxy jam tëjkˈagëˈëy 25 yetyëjk, jamtsoo nyasˈixëdë mä xëë pyëtsemy. ¡Ets yëˈë jam nyiwindaktëp ets yˈawdäjttëbë xëë!

Jyobaa ta jyënany: Tyäˈädë jäˈäyëty kyajts xywyintsëˈëgëdë. ¡Kyaj jeˈeyë ttundë axëkˈäjtënë, nandëˈën myindë mätsë ndëjk ets yˈadëˈëtstë axëëk! Päätyë Jyobaa twandaky: Nyijawëyandëp wiˈixëts njotˈambeky ets kyajts nbaˈayowäˈändë ko nëjx kyutëgoytyë.

Jeˈeyë nety kujk nyaxy tëgëk jëmëjt, ko ja israelitëty kyaj tnekymyëmëdoodë Nabukodonosoor. Ta nyibëdëˈkëdë ets mëët tsyiptuundë. Ets kyum jëmëjt ja kujm ta babilonyëty tyëjkëdë Jerusalén ets tnoˈktääytyë ja käjpn. May ja jäˈäy ojts yˈooktë ets may ojts yajmënëjxtë tsimy tsyënaabyë Babiloñʉ.

¿Tiko Jyobaa tnasˈijxë ets ja israelitëty tyukminëdët ja mëj kutëgoˈoyën? Yëˈko kyaj tmëmëdoodë Jyobaa, ets nan kyaj ojts tmëmëdowdë yˈanaˈamënë. Tyäˈädë yëˈë xytyukˈijxëm ko tsojkëp xëmë nduˈunëm diˈibë Dios xytyukˈanaˈamëm.

Per kyaj niˈamukë ja israelitë nyëjxtääytyë Babiloñʉ, ojtsë Nabukodonosoor dyajweˈemy tuk grupë, ets yëˈë tyuknipëjkë Gedaliyës ets kyuentˈatëdët. Per ko waanë ja tiempë nyajxy, ta ja israelitëty dyaˈoˈktë ja Gedaliyës, ets ko dëˈën yˈadëtstë ta tsyëˈkëdë ko ja babilonyëty nyiminëdët ets yajkutëgoyëdët. Pääty ta ttukutëjkëdë ja Jeremiiʉs ets mëët kyaˈaktët, ta ojts nyëjxtäˈäytyë Ejiptʉ.

Dëˈën tyukwatsy ja israelitë yˈit lyugäär. Ets 70 jëmëjt dëˈën yˈijty. Kyaj pën nyekytsyënääjy. Perë Jyobaa ta twandaky ko dyajjëmbitäˈäny ja israelitëty mä ja nyax kyäjpn ko nyaxët 70 jëmëjt. Per minë net nˈokˈijxëm tijaty ja israelitëty jam jäjtëdë ko yˈijttë Babiloñʉ.