JYOBAA tyukˈijxë kyugajpxy Isaiiʉ tuˈugë it lugäär tsujpë naa dëˈën extëmë tyäˈädë dibujë. Isaiiʉ ja jyukyˈajty mä netyë Jonás të yˈoˈknë.

¿Të xyˈokˈijxpë dëˈëmbë dibujë mä tyäˈädë liibrë? Të, yëˈë ja lugäärë tsujpë mä Dios tpëjtakyë Adán mëdë Eevʉ, ¿këdii? Per, ¿waˈandaa näˈä Dios dëˈën jatëgok dyajjëmbitëdë Naxwinyëdë?

Jyobaa ojts tˈanëëmë ja kyugajpxy Isaiiʉ ets tkujayët mä wiˈix yˈixˈatäˈäny ja it lugäärë tsujpë diˈib myoˈoyaambyë kyäjpn. Isaiiʉ tkëxjääjy: Loobë mëdë borreegë tuˈugyë yˈitäˈändë. Tsäjkää maxuˈunk mëdë kää maxuˈunk tuˈugyë jyëˈxmukäˈändë ets yëˈë ënäˈkuˈunk diˈib kuentˈatanëdëp. Ets axtë tuˈugë uˈunguˈunk kyuyatäˈäny mä awäˈän tsäˈänyë jyutˈää ets kyaj wiˈix tyunäˈänyëty.

Per mbäädë jäˈäy jyënäˈändë: Taˈadë niwindim xëë dëˈën kyatun kyajatëdët, xëmë jyaˈatyë ayoˈon yä Naxwiiny ets xëmë jyaˈatäˈäny. Per ok jamyats, ¿wiˈixë nety yˈixëty ja it lugäär diˈib Dios myooyë Adán mëdë Eevʉ?

Dios pyëjtakë Adán mëdë Eevʉ mä tuˈugë it lugäärë tsujpë, per kom kyaj Dios tmëmëdoodë ta dyajtëgooytyë ja lyugäär. Ta ojts myëjäˈäyëndë ets ojts yˈoˈknëdë. Perë Dios wyandakypy ko pënatyëty yëˈë tsojkëdëp myoˈoyaambyë dëˈëmbë oyˈäjtënë extëm diˈib yajtëgooyë Adán mëdë Eevʉ.

Mä ja jembyë jyukyˈäjtënë nitii xykyaˈaxëktunäˈänëm. Jamˈatäämbë tuˈugyëˈäjtënë. Niˈamukë jäˈäy yajpäädäˈändë oy mëk ets agujk jotkujk dëˈën extëmë Dios ttsojky tëëyëp etsë naxwinyëdë jäˈäy yˈittët. Ok nijawëyäˈänëm wiˈixë Dios dëˈën ttunäˈäny.