Ja tiempë nëˈën ja israelitëty jam yˈijttë Babiloñʉ, ojts kanäk ok dyaˈixëdë ko jyantsy myëdäjttëbë mëbëjkënë. Sadrak, Mesak mëdë Abednego ojts yajkujëduwëdë mä ja ornë mëk ambë, perë Dios ojts yajtsoˈogëdë. Ok të nety ja medos etsë persas tjaˈabekyë Babiloñʉ käjpn ko ja Daniel ojts yajkujëduwë kää jutoty, per ojts nandëˈënë Dios kyuniˈxyëty ko tkejxyë yˈanklës ets ja kää tˈamäjtstääjy.

Tim ok, ta ja Ciro ja rey diˈib Persia ojts dyaˈawäˈätspëtsemy ja israelitëty. Ta jyëmbijttë Jerusalén 70 jëmëjtë nety të nyaxy mä yajmënëjxtë tsimytsyënaabyë Babiloñʉ. Ets ko jyäjttë Jerusalén, diˈib tim jawyiin ojts tkojtë yëˈë Jyobaa tyëjk. Per ja myëtsipëty netyë ojts dyajtuˈuwëˈëmëdë ja tuunk. Pääty ja nety ja tiempë të nyaxy 22 jëmëjt mä të jyäˈttë Jerusalén ko tkojˈabajttë ja Diosë tyëjk.

Ok ta net nijawëyäˈänëm ko Esdras ojts nyejxy Jerusalén ets dyaˈoytyëkëyaˈanyë Diosë tyëjk. Ja nety kujk nyaxy 47 jëmëjt mä ja Jyobaa tyëjk yajkojˈabety jam Jerusalén. Ta nyajxy mäjktëgëk jëmëjt, ta ja Neˈemiyës ojts tpudëkë ja israelitëty ets tnabojtstë ja Jerusalén käjpn. Tyäˈädë MYËMËGOXK Peky ja nyajxyë tiempë 152 jëmëjt.