¿TI YAMË jäˈäy tyuundëp? Mëj käˈäy mëj ukënë yam tyuundëp. Ja rey diˈib Babiloñʉ ojts twoomujktäˈäy milˈamë jäˈäy diˈib ijttëp mëj mä ja käjpn. Ets yëˈë jam tyukˈukëdëbë kopë diˈib oorë ets platë ja diˈib yajjuˈt mä Jyobaa tyëjk jam Jerusalén. Tamë nety kyay yˈuuktë ko ajotkumonë tuˈugë këˈë tyëjkë jaabyë potsykyëjxy. Ta niˈamukë tsyëˈkëtyaaytyë.

Ja yˈokë Nabukodonosoor diˈib xyëˈäjt Belsasar yëˈë nety jam anaˈamp. Ko dëˈën tˈijxy ja letrë jam potsykyëjxy, ta yaxkeky ets jyënany yajmëjwowët niˈamukë wijy jyaˈayëty. Ta ko yajmëjwoodë ta tˈanmääytyë ko pën kyäjxtëp ja letrë ets pën yajnikajtëp, ta tnamoˈoyaˈany tijatyëty ets ko tëkëp nandëˈën anaˈambë. Per ni tuˈuk ja wijy jyaˈay tkajäjty tkäjxët ja letrë ets ni dyajnikajët.

Ta ko ja reyë tyääk tmëdoojy ja jäˈäy jyantsy ëëˈook jyantsy kyäjxˈooktë, ta tyëjkë mä ja kääytyakn. Ta tˈanmääjy ja rey: Ok ix, këdii nëgoo mdimnayˈatsëˈëgëty, nëˈënë jäˈäy mijts xyˈaneˈemy ta tuˈugë jäˈäy diˈib nyijäˈäbë Diosë tëyˈäjtënbë. Ja txëˈaty Daniel. Ko mdatwelë Nabukodonosoor ojts yˈaneˈemy, yëˈë pyëjtakë Daniel ets tniwintsënˈatëdë wijy jyaˈayëty. Waˈan nëjx dyajwoy, ets yëˈë diˈib mˈawanëdëp wiˈix nyikejˈyë tyäˈädë letrë.

Ta netyë ja Daniel yajmëjwoojy. Ta ja rey tnamoˈoyanyë Daniel tijatyëty, per yëˈë kyaj tkupejky. Daniel ta net ttukmëtmaytyakyë Belsasar ko tëgokë Jyobaa ojts tpëjkë ja Nabukodonosoorë yˈanaˈamën, mët ko nety tmëdatyë mëjˈäjt këjxmˈäjtënë ets pääty yajtukumëdoojy.

Ta net tˈanmääjy: Per mijts mnijäˈäjëtyaapy wiˈix jyajtyë mdatwelë, ets dëˈënyëm xymyëdatyë mëjˈäjt këjxmˈäjtënë extëm yëˈë. Ix yëˈë jam mdukˈukëdëbë kopë diˈib yajmëtsoˈon mä Jyobaa tyëjk. Ets yëˈë të xymyëjkugäjxë mdios diˈib tsää ets kepy, ets kyaj të xymyëjkumayë Dios diˈib të xyajkojëm. Päätyë Dios të dyajkëxeˈegyë tadë këˈë ets të tjäˈäyë tadë letrë.

Tadë letrë dëˈën jyënaˈany: MENÉ MENÉ, TEKEL ets PARSÍN

MENÉ yëˈë yˈandijpy ko Dios të tmaytsyoy näk xëë yˈakweˈemyë mˈanaˈamënë ets jyëjpkëxët. TEKEL yëˈë yˈandijpy ko dëˈënxyëp extëm të myajkijxy mä balansë, ets të myaˈixy ko kyaj mˈoyjyaˈayëty. PARSÍN yëˈë yˈandijpy ko mˈanaˈamënë yëˈë yajmoobyë medos etsë persas.

Tamnëmë netyë Daniel kyakäjxtäˈäy ko ja medos etsë persas tyëjkëdë Babiloñʉ. Ta tjaˈabëjktë ja käjpn ets dyaˈoˈktë Belsasar. ¡Ja diˈib yajkëxjääjy potsykyëjxy netyë yˈadëëjy ja ux! Per, ¿wiˈixë net jyäjttë ja israelitëty? Ok nijawëyäˈänëm, min jawyiin nˈokˈijxëm wiˈix jyajtyë Daniel.