TYÄˈÄDË kiixyë tsujpë ja txëˈäjty Mariiʉ. Israelitë yëˈë, ets jam tsyënääjy mä ja käjpn diˈib xyëˈäjtypy Nazaret. Dios nyijäˈäbë nety ko ja Mariiʉ jantsy oyjyaˈay. Pääty ttuknigejxyë yˈanklës diˈib xyëˈäjtypy Gabryel. ¿Mnijäˈäp wiˈix ja Gabryel tˈanmääyë Mariiʉ? Min nˈokˈijxëm.

Dios maygyepyëty Mariiʉ, niˈigyë mijtsë Jyobaa mtsokyëty ets yˈity mët mijts. Mariiʉ kyajnëmë nety tim ixyë tadë jäˈäy. Ta jyotmaytyuktëjkë yëˈko kyaj tnijawë tidën ko dëˈën yˈanëˈëmxëty. Per ta netyë Gabryel jyotkujkmooyë.

Ta tˈanmääyë Mariiʉ: Katë mtsëˈëgë mëkë Jyobaa ttukjotkëdaˈaky extëm mijts mjäˈäyˈaty. Päätyë Dios moˈoyaˈanyëty tuˈugë uˈunk, diˈib mdukxëˈatëp Jesús.

Tyäˈädë mixyuˈunk yëˈë itäämp mëj ets yajtijäˈäny Diosë yˈUˈunk. Jyobaa yëˈë yajtunanëp rey extëm tyuunyë Davit. ¡Jeˈeyë ko Jesús winë xëë winë tiempë tyunäˈäny rey, etsë yˈanaˈamënë ninäˈä kyajëjpkëxäˈäny!

Ja Mariiʉ ta dyajtëëjy: Per ¿wiˈix dëˈën tyun jyatëdët? Kyajnëmëts nbeky ets kyajts nˈity ntsëënë mët tuˈugë yetyëjk. ¿Wiˈixëts nyajmaxuˈunkˈatët tuˈugë uˈunk?

Ta ja Gabryel yˈanmääyë: Ja Diosë Tsäjpotmëdë myajnitukanëp mëdë myëkˈäjtënë. Päätyë tadë uˈunk diˈib jäˈtäämp Naxwiiny yëˈë Diosë yˈUˈunk. Ets ok ix, mëguˈuk Elisabet pyäädaampy nandëˈën tuˈugë yˈuˈunk, oyë jäˈäy jyajënäˈäny ko të myëjäˈäyënë etsë yˈuˈunkpäädët. Pääty mbäät xypyekyë kuentë ko Dios nitii kyatsiptakxëty.

Ta netyë ja Mariiʉ jyënany: ¡Ëjtsë Jyobaa xytyuumbëˈäjtp! Waˈan ttuny tjatyëty extëmëts të xyˈanëëmë. Ta ja anklës ojts nyëjxnë.

Ja Mariiʉ ta ojts nyejxy mä ja Elisabet. Ets ko ja Elisabet dyoˈkmëdoojy ja Mariiʉ, ta ja yˈuˈungë Elisabet ojts yiˈxy mëdë xondakën ets ta tyuktëjkë Diosë yˈespiritë santë, ta tˈanmääyë Mariiʉ: Nituˈuk dëˈënë toxytyëjk të kyayajkuniˈxy extëm mijts. Ta netë Mariiʉ tëgëk poˈo yˈijty mëdë Elisabet ta ojts jyëmbijnë Nazaret.

Ja Mariiʉ pëkäämbë nety mët tuˈugë yetyëjk diˈib xyëˈäjt Josee. Per ko ja Josee tnijäˈäjë ko ja Mariiʉ uˈunk mëët, ta jyënany ko kyaj tnekypyëkäˈäny. Net ja Diosë yˈanklës yˈanmääyë: Katë mtsëˈëgë, pëkë Mariiʉ. Pes yëˈë Dios diˈib të myoˈoyëtyë tadë uˈunk. Päätyë Josee tpejkyë Mariiʉ ta tˈawijxtë etsë Jesús myaxuˈunkˈatët.