AXËËGË nety të tyim jäjnë. Të nety ja Fwank Yajnëbajtpë jäˈäy yaˈoogyëty. Ja reyë nyëdoˈoxy diˈib xyëˈäjtypy Erodiiʉs yëˈë nety axëkˈijxëp. Ets yëˈë diˈib ojts jyënaˈany ets ja rey tniˈanaˈamët etsë Fwangë kyëbäjk yajniboodët.

Ko ja Jesús tnijäˈäjë, ta jyotmaytyuktëjkë. Ta ojts nyejxy anaytyuˈuktuujy, per ta pyanëjxë ja may jyaˈay. Ets ko ja Jesús tˈijxy ja may jyaˈay, ta tpaˈayoojy. Ets pääty ttukmëtmaytyaky ti tyuunaambyë Diosë yˈAnaˈam Kyutujkënë, ets ta nandëˈën dyaˈagëdakyë päˈäm jäˈäy.

Ta ko ojts tsyuˈujënë ta nyimiinëdë yˈëxpëjkpëty ets yˈanmääyëdë: Të tsyuˈujënë ets ni pën yä kyatsëënë, anëëmë tadë jäˈäyëty waˈan tnëjxnëdë ets nëjx tjuytyë kyaˈay yˈukënë mä wingombë käjpn.

Jesús ta yˈatsoojy: Yëˈëjëty kyaj tiko nyëjxtët, yajkaytyë miitsëty. Ta tniˈijxˈawdijty ja Felipʉ ets dyajtëëjy: ¿Mä net njuˈuyëmë kaaky etsë tyäˈädë may jyaˈay niˈamukë kyaytyët?

Felipʉ ta yˈatsoojy: Mayë meeny sentääbë tsyokyëty ets joˈom njuˈuyëmë käˈäy ukën ets ni dëˈënën tkapäädët ets yajxon kyaaytyaˈaytyët. Andrés ta jyënany: Tyä tuˈugë mixyuˈunk diˈib myëdäjtypy mëgoxkë tsäjkaaky ets majtskë äjkx. Per windim tpäädët ets niˈamukë jäˈäy kyaaytyaˈayët.

Ta ja Jesús jyënany: Anëëmë niˈamukë jäˈäy ets nyaxwaatstët. Ta net tmooyë dioskujuyëmë Dios mët ja käˈäy ukënë, ets ta ojts ttujkwaˈxy ja äjkx mëdë tsäjkaaky. Ja yˈëxpëjkpëty ta ojts dyajwäˈxtë ets tmooytyë niˈamukë jäˈäy. Ja nety jam mëgoxk milë yetyëjk, ets abeky milˈamë toxytyëjk mëdë ënäˈkuˈunk. Niˈamukë kyaay yˈuktë jotkëdaˈaky. Ets ko ja Jesusë yˈëxpëjkpëty dyajmujktë diˈibë nety të nyadëkë, ¡ja dyajmujktë tim mäjmajtsk katsynyë!

Ta netë Jesús tˈanmääyë yˈëxpëjkpëty ets tyëkëdët mä tuˈugë mutsk barkë ets myejny awinaxtët. Ta mä tadë tsuˈum jyantsy myiinyë mëk poj ets ja mejny jyantsy nyikapy, ets ja barkë jyantsy yiˈxy xitsoo yatsoo. Ja Jesusë yˈëxpëjkpëty ta mëk jyantsy tsyëˈkëdë. Ta jepymyonyëmë nety ko tˈijxtë tuˈugë jäˈäy nyiminëdë ets yoˈoy mejny wyingëjxy. Ta jyantsy yaxkaktë, yëˈko kyaj tnijawëdë tidën yˈijxtëp.

Jesús ta jyënany: Ëjtsë dëˈën. Katë mtsëˈëgëdë. Per kyaj tmëbëkandë. Ta ja Peedrʉ yˈanmääyë: Wintsën pën mijtsë dëˈën anmaagyëts etsëts nëjxët nëë wingëjxy mä mijts jam. Jesús ta yˈatsoojy: ¡Pes min! ¡Ta ja Peedrʉ pyëtseemy barkoty ets tyëjkë yoˈobyë mejny wingëjxy! Per ta tsyëˈkë ets ta nyëpaˈts tsondaky, per ta Jesús jyuˈtë.

Ok ta jatëgokë Jesús ojts dyajkääygyojpë milˈamë jäˈäy. Jeˈeyë mët jëxtujkë tsäjkaaky ets tuˈuk majtskë äjkxuˈunk. Ets niˈamukë kyaay yˈuktë jotkëdaˈaky. ¿Këdii jantsy oy ko nijäˈäjëm wiˈixë Jesús dyajkääjy dyaˈukyë may jyaˈay? ¡Mä ja yˈanaˈamënë kyaj ti jam nëjx nmëmayäˈän nmëdäjäˈänëm!