TË NETYË Jesús dyaˈagëdaˈaky ja nimajtskpë wiints, ko tˈijxy tuˈugë käjpnë mutskpë diˈib myëwingonˈäjtypyë Jerusalén. Ta tˈanmääjy nimajtskë yˈapostëlëty: Nëjxtë mä tadë käjpn ets jam xypyäädäˈändë tuˈugë burrë patˈyaak. Mëgajëdë ets xyajmindët.

Ta ko tmëmiindë ja burrë, ta Jesús ttukwaˈtspejty. Ta ojts nyejxy burrëkëjxy Jerusalén, pes tamyë nety wingon wyeˈemy. Ets ko nety jam tyëkëyanë ta ja may jyaˈay ojts jyëjpˈyoˈoyëdë. Ta ja tuˈu ttukwinˈyaˈpëdë wyit, ets tam diˈibë tëëxy pyëjtaktë, ets jyënandë: ¡Dios kyunuˈxëbë rey diˈib miimp xyëëgëjxmë Jyobaa!

Tim tëëyëp, ja jembyë rey diˈib Israel dëˈën ijty tyëkëdë Jerusalén burrëkëjxy, ets ja nax käjpn yˈixëdët. Etsë Jesús dëˈën tyëjkë. Etsë tyäˈädë jäˈäy yëˈë yam yaˈijxëdëp ko tsyojktëbë Jesús ets ryeyˈatët. Per kyaj mayë jäˈäy tsyojkëdë. Min nˈokˈijxëm wiˈix tˈanmääytyë Jesús ko ojts nyejxy mä ja Diosë tyëjk.

Mä ja Diosë tyëjk japë Jesús ojts dyaˈagëdaˈagyë wiints etsë xux. Ets ko ja ënäˈkuˈunk dëˈën tˈijxtë ta tmëjkumääytyë Jesús mëdë ëy. Per ja saserdotëty ta jyotˈambëjktë, ets ta tˈanmääytyë Jesús: ¿Mëdoopy wiˈix jamë ënäˈkuˈunk jyënäˈändë?

Jesús ta yˈatsoojy: Nmëdoobyëts, ¿ti kyajnëm xykyäjxtë Biiblyë mä jyënaˈany ko yëˈë Dios diˈib dëˈënë ënäˈkuˈunk yajkäjxaampy? Ta ja ënäˈkuˈunk niˈigyë tjantsy myëjkumääytyë ja rey diˈibë Dios yajmiin.

Ëtsäjtëm nandëˈën mbäät nduˈunëm extëm ja ënäˈkuˈunk, ¿këdii? Mbäät mayë jäˈäy kyaj ttsoktë ets ëtsäjtëm nigäjx nimaytyakëmë Diosë yˈAnaˈam Kyutujkën. Per ëtsäjtëm nˈokmaytyakëm xëmë tadë oyˈäjtënë diˈibë Jesús tyukmëdunaambyë naxwinyëdë jäˈäy.

Ko Jesús yˈijty yä Naxwiiny kyajnëmë netyë tiempë tpääty ets tyëkët anaˈambë. ¿Näˈä nety ja tiempë jyäˈtäˈäny? Yëˈë diˈibë yˈëxpëjkpëty nyijawëyandë. Ets yëˈë diˈib yaptsoo nˈixäˈänëm.