TËGOKË Jesús tˈanmääjy tuˈugë yetyëjk ets ttsokëdë myëguˈuk. Ja yetyëjk ta yajtëëjë: ¿Pënëtsë dëˈën nmëguˈukˈäjtypy? Jesús nyijäˈäbë nety ko ja yetyëjk dëˈën wyinmay ko yëˈë myëguˈukˈäjtypy diˈib myëgugäjpnˈäjtypy o diˈib tiˈigyë mëdë relijyonk tmëdattë. Pääty min nˈokˈijxëm wiˈixë Jesús yˈanmääyë.

Jesús ojts nandëˈën ttukjaygyujkë jäˈäy mët yëˈëgyëjxmë jeky myaytyaˈaky. Extëm diˈib tyukmëtmaytyakë tyäˈädë yetyëjk yëˈë mä tuˈugë judiyë mët tuˈugë samaritanë. Të nˈoknijäˈäjëmbë ko ja judiyë kyaj tˈixäˈändë samaritanë. Min nˈokˈijxëm wiˈix ja Jesús tmaytyaky.

Tëgok tuˈugë netyë judiyë jyëjptaˈaky mä ja tuˈu diˈib nëjxp Jerikoo. Ko ja maˈtspë myäjtsë. Ta yajpëjkëtyaayë myeeny syentääbë ets ta axëëk yajtuuny axtë yajnikeky oˈktseˈeky.

Ok ta myiiny tuˈugë judiyë diˈib tuump saserdotë. Ta tˈijxy ja yetyëjk diˈibë nety axëëk të yajtuny. ¿Tidaa tyuun? Ojts tnayoˈoy ets ta ojts nyejxy. Ta ja tuˈugë jäˈäy nyajxy, tuˈugë levitë diˈib mëkë ryelijyonk ttsoky. ¿Ojtsëdaa wyäˈkwëˈëmë ets tpudëkët ja yetyëjk? Kyaj, kyaj ojts wyäˈkwëˈëmë. Ok ix mä tadë dibujë tam ja saserdotë mëdë levitë jagam jyëjptaknëdë.

Per ok ix pën jam mëdë tadë yetyëjk diˈib axëëk të yajtuny. Yëˈë tuˈugë samaritanë. Yëˈë ojts tpudëkë tadë yetyëjk. Ojts dyajtsoybyajtë tsyayut. Ok ta ojts tmënejxy mä mbäät pyeˈxy ets yˈagëdäˈägët.

Ko ja Jesús myaytyaktääjy, ta tˈanmääjy ja diˈibë nety të yajtëyëty pënë dëˈën myëguˈukˈäjtypy: Mä tyäˈädë nidëgëëkpë jäˈäy, ¿pën diˈib myëguˈukˈäjt ja tsayut jäˈäy, ja saserdotë, levitë o ja samaritanë?

Ja yetyëjk ta yˈatsoojy: Yëˈë ja samaritanë yëˈë oyjyaˈaytyak mët ja jäˈäy diˈibë nety axëëk të yajtuny.

Jesús ta tˈanmääjy: Oy të mˈatsoy. Pääty, nëjx ets jäˈäyˈat dëˈën mëdë wiink jäˈäy, extëm ttuuny ja samaritanë.

Jantsy oyë Jesús ttukjaygyujkë jäˈäy, ¿këdii? Ëtsäjtëm mbäät nandëˈën tijaty njäjtëm mä Biiblyë mä wiˈixë Jesús jyënaˈany.