¿MˈIJXYPYË tadë jäˈäy diˈib jam nyiˈijxëbë tadë mëtsäˈä diˈib jantsy tëˈxp? Tyäˈädë jäˈäyëty yëˈë ijty nyiˈëxpëjkëdëbë mëtsäˈä. Jam tsyoondë mä xëë pyëtsemy. Ets jam tˈijxtë tuˈugë jembyë mëtsäˈä, ta wyinmääytyë ko mbäät myënëjxëdë mä tuˈugë jäˈäyë jëjpˈambë.

Ta tsyoˈondë ets ko jyäjttë Jerusalén ta dyajtëëdë ja israelitëty diˈib nandëˈën yajtijtëp judiyëty: ¿Mä net ja mixyuˈunk diˈib ryeyˈataambyë judiyëty? Pes ntsoondëts mä xëë pyëtsemy ets jamëts të nˈijxëdë myëtsäˈä. Päätyëts nmindë ets nˈawdatäˈändëts.

Ko Eroodʉs, ja rey diˈib Jerusalén tmëdoojy dëˈën, ta axëëk jyantsy nyayjäˈäjë. Yëˈko kyaj nety ttsoky etsë wiink jäˈäy ryeyˈatët. Pääty dyajtëëjy ja saserdotëty diˈib tuundëp jëjpˈam: ¿Mä myaxuˈunkˈatäˈäny ja rey diˈib tëëyëp yajnigäjx? Ta yˈatsoodë: Biiblyë jyënaˈany ko jam Belén.

Ta ja Eroodʉs tˈanmääjy ja jäˈäy diˈib tsoˈondëp mä xëë pyëtsemy: Nëjx jam ëxtäˈäytyë tadë mixyuˈunk ets ko xypyäättët awäˈänëgëts etsëts ëjts nandëˈën nëjx nˈawdaty. ¡Per ja Eroodʉs kyaj nety nëjx tjantsy awdatäˈäny ja mixyuˈunk, yaˈoogaambyë nety!

Ko ja jäˈäyëty tsyoˈondë Jerusalén ta pyëtseemy jatëgok ja mëtsäˈä ta tyëjkë yoˈobyë axtë Belén, ets jam ojts wyäˈkwëˈëmë mä ja tëjk mä nety jamë Jesús. Ko tyäˈädë jäˈäy tyëjkëdë tëgoty, ta jap tpattë ja Mariiʉ mëdë Jesús. Ta tijaty tnamooytyë Jesús. Ok ta Jyobaa tˈanmääyë tyäˈädë jäˈäyëty tsuujoty kumäˈäyoty ets kyaj jyëmbittët mä Eroodʉs. Pääty ta ojts tpëktë wiink tuˈu ets ojts nyëjxnëdë mä ja nyax kyäjpn.

Ko ja Eroodʉs tnijäˈäjë ko të tpëktë wiink tuˈu ta jyantsy jotˈambejky. Ta ojts tniˈanaˈamë ets yˈoˈktäˈäyët jam Belén niˈamukë mixy ënäˈkuˈunk diˈib majtskë jyëmëjt axtë waanë mutskpë. Per të netyë Jyobaa tˈanëëmë Josee mä tuˈugë kumäˈäy ets tmënëjxëdë Mariiʉ etsë Jesús jap Ejiptʉ. Ok, ko ja Josee tnijäˈäjë ko të ja Eroodʉs yˈoˈknë, ta jyëmbijttë jatëgok Nazaret. Ets jamë Jesús yeˈky pyejty.

Wiˈix mˈokwinmay, ¿pën diˈib ojts dyajkëxeˈeky ja jembyë mëtsäˈä? Waˈan yëˈëjëtyë Satanás tadë Mʉjkuˈugópk diˈib yajkëxëˈk ja mëtsäˈä, pes yëˈë nety yaˈoogambyë Diosë yˈUˈunk. Yëˈë nyijäˈäbë nety ko ja rey Eroodʉs diˈib Jerusalén mbäät dyaˈoogyë Jesús. Pääty ja yetyëjkëty diˈib tsoˈondë mä xëë pyëtsemy, jayëjp ojts nyëjxtë Jerusalén ko tˈijxtë ja mëtsäˈä.