Tyëgëk xëëbë netyë Jesús të yˈooky, ko pyëdeˈky. Mä tadë xëë ja mëgoxk okë Jesús nyaytyukˈijxëdë yˈëxpëjkpëty ets 40 xyëë kyëxeˈky. Ta net ojts pyatëjkënë tsäjpotm ets yˈijxëdë yˈëxpëjkpëty. Ta kyum mäjk xëë, ta Dios ttuknigejxyë espiritë santë ja Jesusë yˈëxpëjkpëty diˈibë nety jam awijxtëp Jerusalén.

Ok ta ja jäˈäyëty diˈibë Dios myëtsipˈäjttëp ojts tniˈanaˈamëdë ets ja ëxpëjkpëty yajpëjtäˈäktët pujxndëgoty, per ta tuˈugë anklës yaˈawäˈätspëtsëëmëdë. Ta net ja Esteebʉ kyukäˈtsëdë myëtsipëty. Per ta net nijawëyäˈänëm ko Jesús twyinˈijxy tuˈugë jäˈäy diˈibë nety pyajëdijtypyë ëxpëjkpëty ets tyunët jëjpˈam. Tyäˈädë yëˈë apostëlë Pa̱a̱blʉ. Ta tëgëk jëmëjt ja kujmë nety të nyaxy mä Jesús yˈooky, ko Dios tkejxyë apostëlë Peedrʉ ets nëjx tmëtmaytyaˈagyë Kornelyʉ mëdë fyamilyë diˈib kyaj jyudiyëty.

Kyum mäjktëgëk jëmëjt ta Pa̱a̱blʉ tpatsondaky ja tim jawyiimbë byäjë mä yˈëwaˈxy kyäjxwaˈxy. Ets mä myëmajtskˈokpë ta Timotee pyatsoˈonë. Mä dëˈën ja Pa̱a̱blʉ Dios mëduuny mëdë jyamyëëdëty, wiˈixëm jyäjt kyëbajttë. Ok ta Pa̱a̱blʉ yˈijty pujxndëgoty Romʉ. Ets kyum majtsk jëmëjt ta yˈawäˈätspëtseemy, per ok ta jatëgok yajpëjtaky pujxndëgoty ets ja mä jäˈäy ojts yaˈoˈkënë. Mä tyäˈädë MYËJËXTUJK Peky ja nyajxyë tiempë 32 jëmëjt.