OK IXË tyäˈädë anklës diˈib yam yaˈawatsypyë tyäˈädë pujxndëjkˈää. Yëˈë jam yaˈawäˈätspëtseembyë tadë Jesusë yˈapostëlëty. Min nˈokˈijxëm tiko ojts yajpëtäˈäktë pujxndëgoty.

Waanë nety kujkë tiempë nyaxy mä ja espiritë santë yajmoˈoytyë ja ëxpëjkpëty. Ko Peedrʉ mëdë Fwank ojts nyëjxtë tsuu mä ja Diosë tyëjk jam Jerusalén. Ta jam tˈijxtë tuˈugë yetyëjk diˈib maxuˈunkˈäjt tekymyäˈät. Jamë jäˈäy bom bom myënejxyëty etsë meeny sentääbë tˈamdowët. Ta ko Peedrʉ mëdë Fwank tyëjkëdë ta yaˈamdoodë meeny. ¿Ti tyuundë?

Ta ojts wyäˈkˈawëdë ets tˈijxtë. Ta Peedrʉ tˈanmääjy: Kyajts nmëdatyë meeny sentääbë per nmoˈoyëp tits nmëdäjtypy. ¡Xyëëgëjxmë Jesús, pëdëˈëk ets yoˈoyëˈëk! Ta Peedrʉ tkëˈëmëmäjtsë ja yetyëjk, ta tyënääygyujkë ets yoˈoybyejky. Ta tyäˈädë mëjˈäjtënë dëˈënyë jäˈäy dyajmonyˈijx dyajmonyjäˈäjë ets dyajxondaktë.

Peedrʉ ta tˈanmääjy ja jäˈäyëty: Yëˈë Diosë myëjää diˈib yajpëdëˈkë Jesús, yëˈë diˈib të ttunyë mëjˈäjtënë. Tamë nety dëˈënë Peedrʉ mëdë Fwank kyäjxtë ko myiindë ja diˈib nyiwintsënˈäjttëbë relijyonk. Ta jyotˈambëjktë yëˈko Peedrʉ mëdë Fwank tˈanëëmëdë jäˈäy ko Jesús të pyëdeˈeky. Pääty tmäjtstë ets tpëjtaktë pujxndëgoty.

Ja kum bom ta ja wintsëndëjk tyuˈukmujktë. Ta tmëjwoodë Peedrʉ mëdë Fwank ets ja yetyëjk diˈib nety të dyaˈagëdaˈaky. Ta dyajtëëdë: ¿Pën të moˈoyëdë mëkˈäjtënë ets xyaˈagëdäˈägëdë tyäˈädë tekymyäˈät?

Peedrʉ ta yˈatsoojy ko yëˈë mëdë Diosë myëjää diˈib yajpëdëˈkë Jesús. Ja saserdotëty kyaj tnijäˈäjëdë ti tyundëp, yëˈko kyaj mbäät jyënäˈändë ko kyaj ja tekymyäˈät të yˈagëdaˈaky. Pääty tˈanmääytyë apostëlëty ets kyaj tnekynyimaytyäˈäktëdë Jesús, ta ojts tnasmatsëdë.

Ta nyajxy kanäk xëë ets ja apostëlëty dëˈënyëm tnimaytyaktë Jesús ets dyaˈagëdaktë päˈäm jäˈäy. Ta ojts jyantsy yajmaytyakwaˈxy ko ttundë mëjˈäjtënë. Pääty axtë may jyaˈay diˈib kyaj tsyëënëdë Jerusalén tmëmiindë päˈäm jäˈäy ets ja apostëlëty dyaˈagëdäˈäktët. Päätykyëjxmën ja wintsëndëjk tˈaxëkˈijxtë ja apostëlëty ets ttsuumdë. Per ¿mnijäˈäp ti net tuun jäjtë?

Koots tuˈugë Diosë yˈanklës dyaˈawatsy ja pujxndëjkˈää, extëm yam xyˈixy. Ja anklës ta yˈanmääyëdë: Nëjxtë mä Diosë tyëjk ets mëtmaytyakˈadëˈëtstë jäˈäy. Ja kum bom ko ja wintsëndëjk tnigajxëdë ets yajmëmindët ja apostëlëty, kyaj pën tpattë. Ok ta tpattë mä ja Diosë tyëjk ets ta ojts tmënëjxtë mä nety ja wintsëndëjk të tyuˈukmuktë.

Ta ja wintsëndëjk yˈanmääyëdë: Të myaˈanëëmëdë ets kyaj xynyekynyimaytyäˈäktëdë Jesús. Per miitsëty të xyajtuktuktë Jerusalén käjpn mëdë mdukniˈijxënë. Ja apostëlëty ta yˈatsoodë: Yëˈëjëts nmëmëdowandëbë Dios extëmë anaˈambë ets kyaj yëˈëjëtyë naxwinyëdë jäˈäy. Ta ja apostëlëty dëˈënyëm ojts tˈëwäˈx tkäjxwäˈxtë ja “oybyë ää ayuk”. ¡Jantsy oyë ijxpajtënë tpëjtaktë!