TYÄˈÄDË yetyëjk diˈib yam koxtanë yëˈë Esteebʉ. Tuˈugë Jesusë yˈëxpëjkpë diˈib xëmë mëdoo. ¡Per ok ix wiˈix yam jyaty! Yëˈë yamë tyäˈädë yetyëjkëty tukäˈtsëdëbë mëjatypyë tsää. ¿Tiko tˈaxëkˈijxtë mëkë Esteebʉ ets pääty dëˈën ttuundë? Min nˈokˈijxëm.

Dios yëˈë xëmë pyudëjkë Esteebʉ ets ttunëdë mëjˈäjtënë. Etsë yëˈë diˈibë tyäˈädë yetyëjkëty kyaj tˈoyˈijxtë, ta mëët nyaygyajxytsyiˈkëdë, yëˈko Esteebʉ tyukniˈixë tëyˈäjtën. Perë Dios ta tmoojy kajaa wijyˈäjtënë Esteebʉ ets ttukˈixëdë tyäˈädë yetyëjkëty ko kyaj tyukniˈixëdë tëyˈäjtënë. Pääty niˈigyë jyotˈambëjktë, ta tmäjtstë ets ta tˈanmääytyë näägë jäˈäy ets tniwäämbattëdë Esteebʉ.

Ja saserdotë wintsën ta dyajtëëyë Esteebʉ: ¿Tëyˈäjtën extëm jyënäˈändë? Esteebʉ ta yˈatsoojy mët tuˈugë oybyë maytyaˈaky diˈib mä Biiblyë. Ok ta jyënany ko të nety tëëyëbë axëkjäˈäy tˈokˈaxëkˈijxpëdë Diosë kyugajpxy. Ta net tˈanmääytyë: Nandëˈënë dëˈën miitsëty, myaˈoˈktë Jesús, ja Diosë tyuumbë, ets kyaj të xymyëmëdowdë Diosë yˈanaˈamën.

¡Ta jyantsy jotˈambëjktë diˈib nyiwintsënˈäjttëbë relijyonk! Ets mët ja yˈawäˈänˈat, ta nyaytyëtskäˈtëdë. Ta ja Esteebʉ kyoojeˈky ets jyënany. ¡Ixtë! Tëximëts nˈixyë Jesús tyanë yˈagäˈänytsyoojë Dios. Tyäˈädë yetyëjkëty ta tˈamäjtstë tyatsk, ets ta tmäjtstë Esteebʉ, ets tjëdojtpëtsëëmdë käjpnoty.

Ta tjaandë wyit ets tmooytyë ja mixy diˈib xyëˈäjtypy Saulʉ ets tkuentˈatët. ¿Mˈijxypy jamë Saulʉ? Ta net tkukäˈtstsoˈondë Esteebʉ. Yëˈë ta nyaygyoxtënääytyakë extëm yam xyˈixy, ta tmënuˈkxtakyë Dios ets tˈanmääjy: Jyobaa katë xytyukumëdoy extëm yam axëëk yˈadëˈëtstë, ko dëˈën jyënäändääjy ta ojts yˈoˈknë. Ojts tˈanëëmë Jyobaa ets kyaj ttukumëdowët yëˈko tamë nety nääk diˈibë wintsëndëjk të wyinˈëën të wyinxäjëdë.

Ko pën axëëk mdunyëty, ¿mdukmëjëmbijtypy nandëˈën axëëk o mˈanmaabyë Dios ets axëëk ttunët? Esteebʉ mëdë Jesús kyaj dëˈën yˈadëtstë. Oyjyaˈay yˈijttë axtë mëdë jäˈäy diˈib axëëk tuunëdë. Min ëtsäjtëm nandëˈën nˈokjäˈäyˈäjtëm.