NYAJXY kanäk xëë, etsë Jesús ta nyaytyukˈijxë kanäk okë yˈëxpëjkpëty. Tëgok ja mëgoxk mëgoˈpxë yˈëxpëjkpëty yˈijxëdë. Ets ko mëët nyaybyatëdë, ¿mnijäˈäp ti Jesús myaytyak? Yëˈë Diosë yˈAnaˈam Kyutujkën. Jyobaa tkejxyë Jesús Naxwiiny ets ttukmëtmaytyäˈägëdë jäˈäyë tadë Anaˈamënë. Ets yëˈë dëˈën diˈibë Jesús tyuunˈadëts ko pyëdeˈky.

¿Mjamyejtsypy tidën yˈandijpy Diosë yˈAnaˈam Kyutujkën? Yëˈë tuˈugë anaˈamënë diˈibë Dios të tpëjtaˈaky jam tsäjpotm, ets yëˈë të twinˈixyë Jesús ets tyunët rey. ¡Extëm të nˈijxëm, Jesús ojts dyaˈixyëty ko jantsy oy tyunäˈäny ko tyëkët rey, ojts dyajkayë may jyaˈay diˈibë nety yuˈoˈkëp, ojts dyaˈagëdaˈagyë päˈäm jäˈäy, ets axtë ojts dyajpëdeˈegyë oˈkpë!

Pääty ko tsäjpotmë Jesús tyëkët anaˈambë tuk mil jëmëjt, ¿wiˈix jyatäˈänyë tyäˈädë Naxwinyëdë? Dëˈën jyëmbitäˈäny extëm tuˈugë it lugäärë tsujpë. Kyaj nyekyjaˈatäˈänyë tsip, axëkˈäjtënë, päˈäm, ets ni oˈkën. Nijäˈäjëm ko dëˈën tyunäˈäny jyatäˈänyëty, mët ko Dios ojts dyajkojˈyë Naxwinyëdë ets yˈitët extëm tuˈugë it lugäärë tsujpë mä jäˈäy jyotkujkˈatët. Pääty ojts dyaˈoyë ja lugäär diˈib xyëˈäjt Eden. Etsë Jesús yëˈë diˈib nëjx ttunäˈäny ti Dios tsyojkypy yajtunët.

Ta jyajty ja tiempë mä Jesús jyëmbijnët tsäjpotm. Ja yˈijty 40 xyëë ets nyaytyukˈijxë yˈëxpëjkpëty, ets tnijawëdët ko yëˈë të jyukypyeky. Per mä kyajëmbitynyëm tsäjpotm ta tˈanmääyë yˈëxpëjkpëty: Wëˈëmdë yä Jerusalén axtë koonëm xyˈaxäjëdët ja espiritë santë. Tyäˈädë espiritë santë yëˈë Diosë myëjää, kyaj yaˈixy dëˈën extëmë poj, yëˈë diˈib pudëjkëdë ets ja ëxpëjkpëty ttuundë Diosë tyuunk. Ok ta Jesús yˈakjënany: Miitsëty xynyimaytyäˈägandëbëts nëˈën tëgekyë Naxwinyëdë.

Ko dëˈën jyënäändääjy, ¡ok ix ti net ojts tyuny jyatyëty! Ja Jesús ojts tsyäjp pajnë, extëm yam xyˈixy mä dibujë. Ta net tuˈugë yoots ojts yajnitukyëty, ets kyaj ja yˈëxpëjkpëty nyekyˈijxëdë. Jesús ta ojts nyëjxnë tsäjpotm, ets ta tˈanaˈamtsondakyë yˈëxpëjkpëty diˈib yä Naxwiiny.