¡AY OK IX! ¿Ti yam tuun jäjtëp? ¿Waˈandaa tadë mixyuˈunk kajaa të tsyayuty diˈib jam naxkëjxy? Ok ix, niduˈugë tadë yetyëjk diˈib jam pëtsëëmp yëˈë Pa̱a̱blʉ. ¿Mˈijxypy nandëˈënë Timotee? ¿Ti waˈandaa tadë mixyuˈunk të kyunaxy bentanë agëˈëy?

Jamë dëˈën të kyunaxy. Pa̱a̱blʉ yëˈë nety jam myëtmaytyakypy ja ëxpëjkpëty diˈib Troʉs, yëˈë nyijäˈäbë nety ko jeky ja tiempë nyaxäˈäny mä kyaj tnekyˈixäˈändë, yëˈko jakum bomë nety tsyoonanë barkoty. Pääty ojts tmëtmaytyäˈäktë axtë tsuˈpën.

Tyäˈädë mixyuˈunk diˈib xyëˈäjt Eutikʉ, jamë nety yˈuˈunyë bentanë agëˈëy ko ojts myanaxy. ¡Ta kyumäänäjxy mä ja tëjk diˈibë nety këjxm tëgëk nikëˈëy! Pääty yamë tyäˈädë jäˈäy jyantsy jotmayˈooktë. Ets ko twijtsëˈktë ja mixyuˈunk ¡të nety jyantsy yˈooky!

Ko Pa̱a̱blʉ tˈijxy ko të nety ja mixyuˈunk yˈooky, ta nyaygyëxkoˈkë jam ets tmëneeny. Ta jyënany: Katë mjotmayˈooktë. ¡Kyaj wiˈix të jyaty! Ets jantsy tëyˈäjtënë, yëˈko Pa̱a̱blʉ dyajjukypyejky ja mixyuˈunk. ¡Yëˈë tuˈugë mëjˈäjtënë! Ta mëjwiin kajaa ja jäˈäy jyantsy xyondaktë.

Ta niˈamukë jatëgok pyatëjkëdë ets ta kyaaytyë. Etsë Pa̱a̱blʉ ta yˈakmaytyaky axtë ko ojts xyëënyë. ¡Per mbäät nˈijtëm seguurë ko ja Eutikʉ kyaj ojts nyekymyanaxy jatëgok! Ta netë Pa̱a̱blʉ, Timotee ets pënatyëty jamyëdäjtëdë ojts tsyoˈonëdë barkoty. ¿Mnijäˈäp mä ojts nyëjxnëdë?

Pa̱a̱blʉ yëˈë nety yajkugëjxënëp ja myëdëgëkˈokpë byäjë mä kyäjxwaˈxy. Ja mas jeky jyëdijty ets kyaj dyëˈënëty mä myëmajtskˈokpë. Extëm nˈokpëjtakëm jam Éfesʉ ja yˈijty tëgëk jëmëjt.

Ko ojts tsyoˈonëdë Troʉs, ta ojts yˈittë tuk tiempë Miletʉ. Ets kom tamyë nety wingon wyeˈemyë Éfesʉ, ta Pa̱a̱blʉ tnigajxë ja mëjäˈäytyëjk diˈibë nety jam naymyujkëp ets myindët Miletʉ ets mëët yˈakmaytyäˈäktët. Ok ta ja Pa̱a̱blʉ ojts tyëjkënë barkoty, ¡extëm ojts tyim jotmayˈoˈknëdë ko ja Pa̱a̱blʉ ojts tˈijxtsoˈonëdë!

Taanëmë net ja barkë jyajty Sesareeʉ. Tamë nety ja Pa̱a̱blʉ yˈity mä ja tyëjkë ëxpëjkpë Felipʉ, ko tuˈugë kugajpxy diˈib xyëˈäjt Agaabʉ jyënany ko Pa̱a̱blʉ jyäˈtët Jerusalén ta yajpëjtäˈägäˈäny pujxndëgoty. Ets dëˈënën tyuun jyäjtë extëm ja Agaabʉ jyënany. Majtsk jëmëjtë nety kujk yˈity pujxndëgoty Sesareeʉ, ko Pa̱a̱blʉ yajkejxy Romʉ ets ja yajkutujkpë kopk yajjustisëpäädëdët. Min nˈokˈijxëm ti tuun jäjtë ko nety yajmënejxy Romʉ.